کیا کبھی آپ نے ایسے جادوئی مناظر دیکھے ہیں؟

کبھی کبھی قدرت ایسے حسین اور دلکش مناظر بھی دکھاتی ہے کہ انسانی عقل بمشکل ہی ان پر یقین کر پاتی ہے- اور یہ مسحور کن مناظر کسی اور ہی دنیا کے نظارے معلوم ہوتے ہیں- درحقیقت ہم جن نظاروں کی بات کر رہے ہیں انہیں خلا کے جادوئی مناظر کہا جاتا ہے- ان خوبصورت نظاروں کی منفرد تصاویر دنیا بھر کے مختلف فوٹوگرافروں نے ایک خاص مقابلے کے لیے کھینچی ہیں- فلکیات کی بہترین تصاویر کا یہ مقابلہ گذشتہ پانچ برس سے منعقد کیا جا رہا ہے، اور اس کا اہتمام گرینچ میں واقع رائل آبزرویٹری ’ سکائی ایٹ نائٹ میگزین ‘ کے اشتراک سے کرتی ہے۔ مقابلے کے فاتح کو 1500 پاؤنڈ کی رقم دی جائے گی، جب کہ سال کے نوجوان فوٹوگرافر کا انعام جیتنے والے کو 500 پاؤنڈ دیے جائیں گے۔

یوسی مٹی پارک کے اوپر خلاؤں کی عظیم بیکرانی میں گھومتی ہوئی کہکشاؤں کی اس تصویر کو 2013 کی فلکیات کی بہترین تصاویر کے مقابلے میں منتخب کیا گیا ہے۔

اس تصویر میں دُم دار ستارے پین سٹار کی دم میں موجود گرد اور گیس دکھائی دے رہے ہیں۔

اس منتخبہ تصویر میں برطانیہ میں واقع قدرتی محراب ’ڈرڈل گیٹ‘ پیش منظر میں ہے جب کہ اس کے پیچھے آسمان پر ملکی وے کہکشاں پھیلی ہوئی نظر آ رہی ہے۔

مائیک کری کی ’ناردرن لائٹس XXIII‘ کو سر پیٹرک مور انعام کے لیے منتخب کیا گیا ہے۔

الیگزینڈر کونو کی اس تصویر میں سیارہ زہرہ سورج کے آگے سے گزر رہا ہے۔ یہ تصویر بحیرۂ اسود میں لی گئی تھی۔

سٹیفانو ڈی روزا نے کوہِ الپس پر طلوع ہوتے ہوئے ماہتاب کو اپنے کیمرے میں مقید کر لیا۔

فوٹوگرافر وین انگلینڈ نے کہکشاں کی یہ تصویر کچھ اس انداز میں کھینچی کہ محسوس ہوتا ہے کہ آسٹریلیا کی پارکیس خلائی دوربین سے پھل جھڑیوں کی طرح ستارے نکل رہے ہیں۔