اب ہنسی علاج غم بھی نہیں رہی

لیجیئے صاحب ، اب ہنسی علاج غم بھی نہیں رہی۔ ماہرین کا کہنا ہے کہ ہنسنا اور دل کھول کر ہنسنا کبھی کبھی زندگی کے لیے خطرناک ثابت ہو سکتا ہے۔ طب کی دنیا میں کی جانے والی ایک نئی تحقیق میں بتایا گیا ہے کہ ہنسی کے نام نہاد فوائد سب پر یکساں نہیں ہو سکتے ہیں۔آکسفورڈ یونیورسٹی سے وابستہ محققین نے مریضوں میں ہنسی کے فوائد کا جائزہ لینے کے بعد بتایا ہے کہ ہنسنے کو ایک بہترین دوا سمجھنے والوں کو اس بات سے حیرانی ہو سکتی ہے کہ ہنسنا سو فیصد فائدہ مند نہیں ہے بلکہ اچانک ہنسی کا دورہ صحت کے لیے خطرناک ثابت ہو سکتا ہے جس سے دل پھٹ سکتا ہے یا دمے کا دورہ اور بے ہوشی طاری ہو سکتی ہے۔

برٹش میڈیکل جرنل کے کرسمس کی اشاعت کے خاص ایڈیشن میں ہنسنے کے فوائد اور نقصانات کا جائزہ لینے کے حوالے سے ایک سائنسی رپورٹ پیش کی گئی ہے۔سائنسدانوں کو 1946 سے رواں برس تک مریضوں پر کیے جانے والے ایک تجربے سے پتا چلا ہے کہ اچانک قہقہوں کی وجہ سے نرخرا یا دل پھٹ سکتا ہے جبکہ دوران قہقہ تیزی سے سانس لینے سے دمے کا دورہ پڑ سکتا ہے اس کے علاوہ دیگر نقصانات میں ہرنیا، درد شقیقہ کا بڑھنا یا جبڑے کی ہڈی بھی اتر سکتی ہے۔تاہم برمنگھم اور آکسفورڈ سے تعلق رکھنے والے سائنسدانوں کا کہنا ہے کہ درجنوں تحقیقی مطالعوں میں ماہرین کی جانب سے ہنسی کو ایک اچھی دوا کے طور پر تجویز کیا گیا ہے جس سیقلبی اور نفسیاتی تناؤ کی کیفیت میں آرام آتا ہے۔ ہنستے رہنے سے بلڈ پریشر کم رہتا ہے اور دل کے دورے کا خطرہ بھی کم ہو جاتا ہے۔مسخروں کے ہمراہ کیے جانے والے اس تجربے سے ثابت ہوا کہ مسخروں کی وجہ سے مریضوں کے پھپھڑوں کے افعال میں بہتری آئی اسی طرح دن بھر کی حقیقی ہنسی 200 کیلوریز جلانے کے کام آئی اسی طرح ذیا بیطس کے مریضوں میں بلڈ شوگر بھی کم ہوئی۔انھوں نے مزید کہا کہ اچانک سے ہنستے رہنا اور بے قابو قہقہوں کے باعث پیٹ پر دباؤ پیدا ہوتا ہے جس سے آنتوں کی نقل وحرکت بڑھ سکتی ہے۔محققین نے کہا کہ ان کا جائزہ اس نظریہ کو چیلنج کرتا ہے کہ ہنسنا ایک مکمل طور پر فائدہ مند نسخہ ہے تاہم کسی بھی شکل کے مزاح کا فائدہ نقصان سے کہیں زیادہ بڑا ہوتا ہے اور ایسا معلوم ہوتا ہے کہ ہنسنا دل کی ضرورت ہے لیکن پھر بھی ہنسی مذاق نہیں ہے۔ سائنسدانوں نے نتیجے میں کہا کہ ’’ہنسنا خالصتاً فائدہ مند نہیں ہے لیکن ہنسی کے فوائد عام طور پر فرض کر لیے جاتے ہیں جن کا حقیقی طور پر مظاہرہ نہیں ہوتا ہے لیکن اس کے نقصانات فوری نوعیت کے ہوتے ہیں اگرچہ تحقیق کے نتیجے میں ہنسنے کے فوائد اور نقصانات کی درجہ بندی پیش کی گئی ہے پھر بھی کچھ لوگ اس کے فوائد کو نظر انداز کرنے کی غلطی کر سکتے ہیں جبکہ دوسری جانب ہنسی کے نقصانات کو مسترد کیا جا سکتا ہے ۔ لیکن بہت سے لوگ تو کہتے ہیں کہ ذہنی پریشانی یا دباؤ ہو تو شیشے کے سامنے کھڑے ہو کر بھرپور طریقے سے مسکرائیں یہ فوری ریلیف کا بہترین نسخہ ہے۔ اس کے علاوہ ذہنی تناؤ کے شکار افراد کو باقاعدہ ورزش، چہل قدمی، تیراکی، سائیکلنگ اور دیگر جسمانی سرگرمیوں میں حصہ لینا چاہئے۔یہ کہاوت تو آپ نے اکثر سنی ہوگی کہ ہنسی علاج غم ہے۔ اب جدید سائنسی تحقیق سے بھی یہ ثابت کیا ہے کہ خوش رہنے اور زیادہ ہنسنے سے عمر میں اضافہ ہوجاتا ہے۔ ہنستا ہوا چہرہ نہ صرف دیکھنے والوں کو اچھا لگتا ہے بلکہ ہنسی آپ کو کئی بیماریوں سے بھی محفوظ رکھتی ہے۔امریکی ریاست ورجینیا کے شہر رچمنڈ میں ایک ایسا کلب موجود ہے جس میں داخل ہونے والا اپنی ہنسی قابو میں نہیں رکھ سکتا اور قہقے لگا کر ہنسنے لگتا ہے کیونکہ اس کلب میں ممبر شپ کی شرط ہنسنا اور قہقہے لگانا ہے۔اس کلب میں ہنسی کو سٹریس تھراپی کے طور پر استعمال کیا جاتا ہے۔ بہت سے افراد اس کلب کے ممبر ہیں جو وہاں پر دل کھول کر ہنستے ہیں اورہنسی کے ذریعے اپنے ذہنی اور دماغی تناؤ کو کم کرنے کی کوشش کرتے ہیں ۔ہنسی جہاں غم کا علاج سمجھی جا تی ہے وہیں یہ بہت سی بیماریوں کا علاج بھی ہے۔سائنسدانو ں کی نئی تحقیق کے مطا بق انسانی جسم میں کورٹی سول اور ایپین فرائن ہارمون ذہنی کھچاؤ کا باعث بنتے ہیں۔ ان کا لیول صرف ایک قہقے سے گر جاتا ہے اور انسان اپنے جسم میں ایک نئی طاقت محسوس کرتا ہے جو اسے پریشانیوں سے نکلنے اور اچھی اور بھر پور زندگی گزارنے میں مدد دیتی ہے۔ ہمارے گاؤں دیہاتوں میں بھانڈوں کی جگتیں ہوتی ہیں۔ جو دلہا دلہن اور ان کے بھائی بندوں سے لے کر کسی کو بھی نہیں چھوڑتے۔ بھانڈ ایک ایک کو چن چن کر جگت لگاتے رہے اور سب ہنستے رہتے ہیں۔اب بھی پنجاب کے کئی دیہات میں بھانڈوں اور میراثی ایک ادارہ کی طرح کام کرتے ہیں، ان کے ذمہ ایک کام ہے اور وہ وہی کرتے ہے۔ وہی ان کی روزی روٹی ہے۔ صوبہ سرحد میں اگر شادی بیاہ میں کوئی ہنسنے ہنسانے والا آ بھی جاتا ہے تو وہ ادھر ادھر کا مذاق تو کرتا ہے محفل میں بیٹھے خانوں پر کوئی جگت نہیں لگاتا۔کیا ہنسنا اتنی بری چیز ہے۔ کیا وہ خود پر ہنس بھی نہیں سکتے۔ اگر خود پر ہنسیں گے نہیں یا ہنسی برداشت نہیں کریں گے تو اپنی گھٹن کیسے کم ہو گی۔کہتے ہیں کہ قہقہہ دو انسانوں کے درمیان سب سے کم فاصلہ ہوتا ہے۔ اگر ایک دوسرے پر اور ان کے ساتھ، ہنسیں گے نہیں تو فاصلہ کیسے کم ہو گا۔ اور اگر فاصلہ نہیں کم ہو گا تو قربتیں کیسے بڑھیں گی۔کسی نے کیا خوب کہا ہے کہ اگر ہنسنے کے لیئے کچھ بھی نہیں ہے تو کریڈٹ پر ہنس لیں۔ اس کی بات مان لیں، یقین کیجیئے کچھ نقصان نہیں بلکہ الٹا افاقہ ہو گا۔ تنے رہنے سے دماغی مسائل ہی بڑھتے ہیں۔ میری بات پر یقین نہیں تو ان کی طرف دیکھیئے جو تنے رہتے ہیں۔کہا خوب کہا کسی نے کہ ’وہ میرے خواب پر ہنستی رہتی ہے اور میں اس کی ہنسی کے خواب دیکھتا رہتا ہوں‘سال انیس سو پچانوے میں انڈیا کے ایک ڈاکٹر مدن کتاریا نے ہنسی کا عالمی کلب قائم کیا تھا کیونکہ انہیں یقین تھا کہ ہنسنے سے انسانی صحت کا دفاعی نظام مضبوط ہوتا ہے۔ آج انڈیا بھر میں اس کے سینکڑوں ارکان ہیں۔ ویتنام کے لوگوں نے لافٹر یوگا کو معمول کا حصہ بنا لیا ہے۔ہنوئی میں شہری صبح سویرے پارک کا رخ کرتے ہیں جہاں وہ قہقے لگا کر یوگا کی مشق کرتے ہیں۔یوگا میں نوجوانوں کے ساتھ معمر افراد بھی بڑھ چڑھ کر حصہ لیتے ہیں۔
 

آج کی جدید سائنس اس نتیجے پر پہنچی ہے کہ انسانی ذہن ایک مقناطیس (Magnet )کیطرح سے کام کرتا ہے اور ہر وہ شئے اپنی طرف کھینچتا ہے جس کے بارے میں انسان سوچ رہا ہوتا ہے۔ جیسا کہ خوشی کے مواقع پر انسان کو ہر طرف خوشی نظر آتی ہے حتی کہ شور بھی موسیقی کی طرح معلوم ہوتا ہے ،محبت کے عالم میں زندگی کے معاملات انتہائی خوبصورت اور رنگین نظر آتے ہیں جبکہ غم و پریشانی کے عالم میں دنیا بھر میں کرب اور تکلیف دکھائی دے رہی ہوتی ہے۔ یہ سب کچھ در اصل اسی قانون کے مطابق ہے کہ انسانی ذہن جس سوچ و فکر میں مگن ہے وہ اپنے اردگرد اسی طرح کے حالات و واقعات اکٹھا کرتا جارہا ہے ۔انگریزی ادب کے مشہو ر ادیب سیموئل جانسن نے اپنی مشہور انگریزی ڈکشنری (1755)کا انتساب لارڈ چیسٹر فیلڈ کے نام کیا ،مگر Chesterfieldنے کوئی ایک لفظ بھی Samuel Johnson سے شکریہ کا نہیں کہا۔ اس پر شکایتاً جانسن نے کہا کہ ’’ وہ مسکرایا تک نہیں۔ جواباً چیسٹر فیلڈ کا کہنا تھا کہ ہنسنا جذبات کی گراوٹ ظاہر کرتا ہے۔وہ مسکراہٹ اور قہقہہ لگانے یا زور سے ہنسنے میں فرق کرتا ہے اور زور سے ہنسنا اس کے نزدیک تہذیب کے خلاف ہے، لیکن عصر حاضر میں نفسیات دانوں نے قہقہہ لگانے یا زور زور سے ہنسنے کو جذبات کے اظہار اور اندر کی گھٹن کے اخراج کے لئے ضروری قرار دیا ہے، اسی لئے موجود زمانے میں ایسے بہت سے کلب یاجماعتیں ہیں جہاں لوگ ایک جگہ جمع ہو کر زور زور سے ہنستے ہیں، جس سے ان کی طبیعت ہلکی ہو جاتی ہے۔ ہنسنے اور مسکرانے کے حوالے سے جو روایات ہیں ،وہ بڑی اہم ہیں کہ کسی شخص کی کمزوری پرنہیں ہنسنا چاہیے۔ بے ہودہ مذاق پر ہنسنا بھی اچھی روایت نہیں رہی۔ کسی کے انتقال پر یا عبادت گاہ میں بے جا ہنسنا معیوب سمجھا جاتا ہے۔ تمام تر پابندیوں کے باوجود ہنسنا مسکرانا انسان کی بنیادی ضرورت رہا ہے۔ اسلام میں تو مسکرانا اور مسکراہٹیں بانٹنا کا رِخیر ہے۔ مسکراہٹ کے بہترین نمونے ہمیں یونان کے مجسموں میں ملتے ہیں ،جن میں عورتیں اور مرد مسکراتے نظر آتے ہیں۔ ان کی مسکراہٹ کبھی غمگین ہے ،کبھی شرارتی۔مسکراہٹ کی وجہ سے ہی مونا لیزا کی تصویر مشہور ہو گئی۔

مسکراہٹ کی اہمیت کا اندازہ اس بات سے بھی کیا جاسکتا ہے کہ سترہویں صدی کے انگلستان میں عورتیں ایسامالک یا خاوند چنتی تھیں ،جس کے چہرے پر مسکراہٹ ہوتی تھی۔مسکراتا ہو چہرا بلاشبہ دلکش ہوتا ہے، اسی لئے کہتے ہیں کہ مسکراہٹ سے شخصیت میں نکھار پیدا ہو جاتا ہے۔ مسکراہٹ کی اہمیت کے پیش نظر ہی انگس ٹرومبل نے اس موضوع پر…… اے بریف ہسٹری آف سمائل کے عنوان سے لائق مطالعہ کتاب لکھ دی تھی۔ مصنف کا خیال ہے کہ جب بھی کوئی شخص مسکراتا ہے تو اس کے ذریعے نہ صرف اس کے جذبات کی عکاسی چہرے سے ہوتی ہے، بلکہ اسے اپنے جسم کو بھی کنٹرول کرنا ہوتا ہے۔ اس عادت اور طور طریق کو شائستگی سے منسوب کیا جاتا ہے۔ انگس ٹرومبل کا خیال ہے کہ مسکراہٹ چاہے اچانک ہو یا بناوٹی ، شستہ ہویا شہوت سے بھری ہوئی ؟ یہ دماغ میں کسی کیمیائی رد عمل کے طور پر پیدا ہوتی ہے۔ مسکراہٹ کے ذریعے ہم خاموشی سے کوئی نہ کوئی پیغام دوسروں کو دیتے ہیں……مسکراہٹ ایسی زبان ہے، جسے بچے بھی اچھی طرح سمجھتے ہیں، مسکراہٹ کا نہ کوئی جغرافیہ ہے، نہ مسلک، بلکہ یہ آفاقی لباس ہے، جسے زیب ِتن کر کے کوئی بھی اچھا کہلا سکتا ہے، لیکن اسے بد نصیبی کے سوا کیا کہیے کہ جیسے جیسے انسان ترقی کرتا گیا، سرمایہ دارانہ و صنعتی معاشرے کے قیام کے ساتھ ہی انسان بھی مشین اور روبوٹ بننے لگا۔ محنت محبت پر غالب آگئی، پیار کی جگہ بیوپار اور جذبات کی جگہ مہارت نے لے لی،چنانچہ انیسویں صدی میں ادب آداب پر یورپ میں جو کچھ لکھا گیا، اس میں ملازمین کے لئے خاص ہدایات تھیں کہ مالک اور ملازم اور باس اور نوکر کے درمیان فاصلہ ضروری ہے۔ تب یہ سوال بھی پیدا ہوا کہ کیا ملازموں کے ساتھ مسکرا کر بات کرنی چاہیے؟ اس بارے میں بیورو کر یٹک’نہیں ‘‘ بھی تھی، مگر کچھ کا خیال تھا کہ مسکراکر بات نہ بھی کریں تو آپ کا شکریہ ، مہربانی ضرور کہنا چاہیے۔

مزدوری اور ملازمت کی دلدل نے انسانوں سے مسکراہٹ چھین لی ہے۔ اسی پس منظر میں 1963ء میں مشہور کمرشل آر ٹسٹ ہاروے بال (Harvey Ball) نے ایک مسکراتا ہوا چہرہ بنا یا جو مقبول عام ہوا، اس نے بناوٹی زندگی گزارنے والوں کو یاد کروایا کہ انسان مسکرا بھی سکتا ہے ، یہ مسکراتی تصویر دنیا بھر میں گڈ چئیر اور گڈ ول کی علامت بن گئی۔ مسکراہٹ کی مقبولیت نے اس کی افادیت کا راز بھی افشا کرنا شروع کر دیا اور ہاروے بال نے ہی سوچا کہ ہمیں ہر سال کم از کم ایک دن مسکراہٹ اور مہر بانی کے لئے وقف کرنا چاہیے۔ آہستہ آہستہ کچھ لوگ اس کے حامی ہو گئے اور انہوں نے فیصلہ کیا کہ ہر سال اکتوبر کا پہلا جمعہ مسکراہٹوں کا دن ہو گا۔ اسی تصور کے ساتھ پہلا ’’ورلڈ سمائل ڈ ے‘‘ 1999ء میں منایا گیا۔ 2001 میں ہاروے بال انتقال کر گیا تو اس کے چاہنے والوں نے اس کے نام سے ایک فاونڈیشن بنائی ، اب اس فاونڈیشن کے زیرِ اہتمام ہر سال اکتوبر کے پہلے جمعہ کو مسکراہٹ کے عالمی دن کے طور پر منایا جاتا ہے۔آج کل ہم اتنے مشینی ہو گئے ہیں کہ مسکرانا بھول چکے ہیں۔