کمپیوٹر سے متعلق چند مفید ٹپس

بعض اوقات ہارڈ ڈسک کی خراب کارکردگی کے باعث کمپیوٹر کی رفتار خاصی سست ہو جاتی ہے۔ اس کی وجہ یہ ہے کہ جوں جوں ہارڈ ڈسک کی عمر بڑھے اور وہ زیر استعمال آئے تو اس کی رفتار گھٹ جاتی ہے۔ مطلب یہ کہ ہارڈ ڈسک پھر کوئی چیز کاپی کرنے یا پروگرام انسٹال کرنے میں خاصی دیر لگاتی ہے۔ یہ مسئلہ یوں حل کرنا ممکن ہے کہ ہارڈ ڈسک کی رفتار بڑھا لی جائے۔ ذیل میں اس ضمن میں ایک آسان ترکیب پیش ہے۔ اسے اپنائیے اور اپنی ڈسک کی رفتار بڑھا لیجیے۔

1۔ سٹارٹ مینو پر کلک کیجیے اور’ رن‘ کی کمانڈ پر پہنچ جائیے۔

2۔ ’رن‘ پر یہ الفاظ ٹائپ کیجیے Sysedit.exe: اور پھر انٹر کر دیجیے۔

3۔ آپ کے سامنے سسٹم کنفیگریشن ایڈیٹر کھل جائے گا۔

4۔ آپ کو ایڈیٹر میں کئی ونڈوز کھلی نظر آئیں گی۔ آپ نے اسی ونڈوز کا انتخاب کرنا ہے جس پر System.ini لکھا ہو۔

5۔اس ونڈو میں اوپر ہی آپ کو 386ENH7لکھا نظر آئے گا۔

6۔ آپ نے درج بالا لائن کے آگے یہ مواد ٹائپ کرنا ہے (Irq14=4096)

7۔ درج بالا الفاظ لکھنے کے بعد ونڈو محفوظ (Safe) کر کے بند کر دیجیے۔

8۔ اب کمپیوٹر کو ری بوٹ کیجیے۔ آپ کمپیوٹر کو پہلے سے زیادہ تیز رفتار پائیں گے۔
 

کی بورڈ کو ماؤس سے چلائیے
اکثر اوقات کی بورڈ کی کوئی کی(Key) خراب ہو جاتی ہے۔ تب کی بورڈ استعمال کرتے ہوئے خاصی دقت کا سامنا کرنا پڑتا ہے۔ کبھی کبھی چابیوں(Keys) کے اوپر درج لفظ مٹنے سے بھی دوران ٹائپنگ مصیبت پیش آتی ہے۔ اس مسئلے کا ایک آسان حل یہ ہے کہ آپ چھوٹا موٹا مواد ٹائپ کرنے کے لیے ڈیسک ٹاپ کی بورڈ سے کام لیجیے۔ یہ سہولت ونڈوز ایکس پی اور اس کے بعد آنے والے تمام ونڈوز میں موجود ہے۔

1 ۔ سب سے پہلے سٹارٹ مینو پر جائیے اور رن کمانڈ کھولیے۔

2 ۔ اِن کے خانے میں OSK لکھیے اور انٹر دبا دیجیے۔

3۔ اگر آپ کے پاس ونڈوز ایکس پی ہے تو ڈیسک ٹاپ ’کی بورڈ‘ کھل جائے گا۔ اگر ونڈوز 7 یا 8 ہے تو ایپلی کیشن سامنے آجائے گی۔ بس اسے کھولیے اور ماؤس کے ذریعے کیز پر کلک کر کے اپنا کام کیجیے۔

ونڈوز ایکس پی تیزی سے انسٹال کریں
گو ونڈوز 7 اور 8 بھی آچکی ہیں مگر پاکستان میں کئی لوگ اب بھی ونڈوز ایکس پی ہی استعمال کرتے ہیں۔ وجہ یہی ہے کہ یہ استعمال میں آسان ہے۔ اور اسے برتنے کے لیے مہنگا کمپیوٹر بھی درکار نہیں ہوتا۔

عام طور پر ایکس پی انسٹال ہونے میں 30 تا 40 منٹ لگاتی ہے۔ لیکن اسے سرعت سے انسٹال کرنے کا طریق کار بھی موجود ہے۔ اسے اپنانے سے عام رفتار والا کمپیوٹر بھی 15 تا 20 منٹ میں اسے انسٹال کر ڈالے گا۔ آج کے لوڈشیڈنگ والے زمانے میں بیس پچیس منٹ کی بچت معمولی بات نہیں۔ طریق کار درج ذیل ہے۔

سب سے پہلے بوٹ ایبل سی ڈی کے لیے ایکس پی کی فائلیں ڈرائیو سی میں انسٹال کریں۔ اس سے قبل ڈرائیو سی کو NTFS فارمیٹ پر کرلیں۔ جب فائلیں انسٹال ہو جائیں گی تو کمپیوٹر ری اسٹارٹ ہوگا۔ جب آپ کو ایکس پی لوگو دکھائی دے تو شفٹ + F10 کو دبائیے۔ آپ کے سامنے کمانڈ پرومپٹ کھل جائے گا۔