ٹی 20 ورلڈ کپ: دلچسپ حقائق اور ورلڈ ریکارڈ

ٹی20 کرکٹ محدود مدت کا دلچسپ کھیل ہے- 240 بالز کے سنسنی خیز کھیل نے دنیا کو اپنا دیوانہ بنایا ہوا ہے- چوکوں اور چھکوں کی برسات ٹی 20 کرکٹ کا خاصا ہے جس کو دیکھنے شائقین دور دور سے اسٹیڈیم آتے ہیں- مگر جب بات کی جائے میگا ایونٹ ورلڈ ٹی 20 کی تو شائقین کا جوش و خروش قابلِ دید ہوتا ہے-

آئی سی سی ورلڈ کپ ٹی 20 کا انعقاد ہر 2 سال بعد ہوتا ہے- آئی سی سی کرکٹ ورلڈ کے بعد ورلڈ ٹی 20 دوسرا بڑا ایونٹ تصور کیا جاتا ہے- 2014 میں منعقد ہونے والے ورلڈ کپ کا فائنل ڈھاکہ میں کھیلا گیا تھا جس کی فاتح سری لنکا رہی تھی-

اس بار ورلڈ ٹی 20 بھارت میں ہورہا ہے- اس میگا ایونٹ کے لیے 8 اسٹیڈیم کا انتخاب کیا گیا ہے جہاں پر لیگ اور knock out میچز کھیلے جائیں گے- 3 مارچ 2016 سے شروع ہونے والا یہ میگا ایونٹ پورے جوش و خروش سے جاری ہے- ورلڈ ٹی 20 کی تاریخ چند دلچسپ حقائق کی بھی مالک ہے- وہ کیا ہیں آئیے ہم آپ کو بتاتے ہیں؟
 

سب سے زیادہ رنز:
ویرات کوہلی وہ کھلاڑی ہیں جنہوں نے ورلڈ ٹی 20 کے ایک پورے ٹورنامنٹ میں سب سے زیادہ رنز اسکور کرنے کا اعزاز اپنے نام کیا- انہوں نے ایک پورے ٹورنامنٹ کے دوران 319 رنز بنا کر یہ اعزاز حاصل کیا- یہ کارنامہ انہوں نے سال 2014 کے ورلڈ کپ میں سرانجام دیا-

سب سے بڑی اوپننگ پارٹنرشپ:
ویسٹ انڈیز کے اوپنر کرس گیل اور ڈیوائن سمتھ کو ٹی 20 ورلڈ کپ کی پہلی وکٹ کی سب سے بڑی اوپننگ پارٹنر شپ قائم کرنے کا اعزاز حاصل ہے- 145 رنز پر مشتمل یہ پارٹنر شپ ساؤتھ افریقہ کے مقابلے میں قائم کی گئی تھی-

سب سے زیادہ زیرو اسکور پر آؤٹ ہونے والا کھلاڑی:
پاکستان کے ٹی 20 کے کپتان شاہد آفریدی کی ناقص کارکردگی کے باعث انہیں یہ افسوسناک اعزاز حاصل ہے کہ وہ ورلڈ ٹی 20 کے دوران سب سے زیادہ بار بغیر کوئی رن بنائے آؤٹ ہوچکے ہیں- ورلڈ ٹی 20 کے مقابلوں کے دوران شاہد آفریدی 5 مرتبہ زیرو رن پر آؤٹ ہوچکے ہیں-

سینچری اسکور کرنے والے بیٹسمین:
صرف 6 بلے باز ورلڈ کپ مقابلوں میں سینچری اسکور کرنے میں کامیاب رہے ہیں- ان کھلاڑیوں میں کرس گیل(117)٬ احمد شہزاد (111*)٬ میک کلم (123)٬ سریش رائنا (101)٬ مہیلا جے وردھنے (100) اور ایلکس ہیلز (116*) شامل ہیں-

سب سے بڑا ٹیم ٹوٹل:
2007 کے آئی سی سی ٹی 20 ورلڈ کپ کے افتتاحی ٹورنامنٹ میں سری لنکا نے کینیا کے خلاف میچ میں 260 رنز اسکور کیے تھے جو اب تک کا کسی بھی ٹیم کی جانب سے بنایا جانے والا سب سے بڑا ٹیم ٹوٹل ہے-

سب سے زیادہ چھکے مارنے والا کھلاڑی:
ویسٹ انڈیز کے مایہ ناز بلے باز کرس گیل کے پاس سب سے زیادہ چھکے مارنے کا ورلڈ ریکارڈ موجود ہے- گیل ورلڈ ٹی 20 کے پانچ ٹورنامنٹس میں 43 چھکوں کے ساتھ سرفہرست ہیں-

سنگھ از کنگ (2007):
2007 میں منعقد ہونے والے ٹی 20 ورلڈ کپ میں بھارتی بلے باز یووراج سنگھ نے اسٹیورٹ بروڈ کی 6 بالز پر 6 چھکے مار کر ورلڈ ریکارڈ بنایا تھا جو آج بھی قائم ہے-