پری میڈیکل کے پوزیشن ہولڈرز سے خصوصی بات چیت

میڈیکل کے تمام شعبہ جات کو دنیا بھر میں انتہائی عزت و احترام کی نگاہ سے دیکھا جاتا ہے کیونکہ اس کا تعلق براہ راست انسانی زندگیوں سے ہوتا ہے- میڈیکل کی تعلیم حاصل کرنا انتہائی مشکل اور ایک محنت طلب کام ہے لیکن جو طالبعلم اسے اپنا مقصد اور اپنی منزل بنالیتے ہیں تو وہ پھر اپنی راہ میں کسی رکاوٹ کو حائل نہیں ہونے دیتے- چند ایسے ہی ہونہار طلبا گزشتہ روز اس وقت سامنے آئے جب کراچی کے اعلیٰ ثانوی بورڈ نے پری میڈیکل کے سالانہ امتحانات برائے 2014 کے نتائج کا اعلان کیا- ان طلبا نے پوزیشن حاصل کر کے نہ صرف اپنا بلکہ اپنے والدین اور اپنے اساتذہ کا نام بھی روشن کردیا- دلچسپ بات یہ ہے مذکورہ امتحانات میں فرسٹ پوزیشن دو٬ سیکنڈ پوزیشن ایک اور تھرڈ پوزیشن پھر دو طلبا کی آئی- آپ اس سے اندازہ لگا سکتے ہیں کہ مقابلہ کتنا سخت رہا ہوگا- ان پوزیشن ہولڈرز میں سے چند طلبا سے ہم نے خصوصی بات چیت کی جو کہ اب قارئین کے پیشِ خدمت ہے-

سب سے پہلے ہم بات کرتے ہیں فرسٹ پوزیشن( دو فرسٹ پوزیشن ہولڈرز ) حاصل کرنے والی پہلی طالبہ بھاونا بائی سے:

ہماری ویب: کالج کا نام؟
بھاونا بائی= گورنمنٹ کالج فور وومن شاہراہ لیاقت-
 

ہماری ویب: پوزیشن حاصل کرنے پر کیا احساسات ہیں؟
بھاونا بائی= بہت زیادہ خوشی ہورہی ہے- پورے سال جو محنت کی تھی اس کا صلہ مل گیا- گھر والے بھی بہت خوش ہیں-

ہماری ویب: پری میڈیکل میں داخلہ لینے کی کوئی خاص وجہ؟
بھاونا بائی= گھر والوں کی اور میری اپنی بھی خواہش تھی کہ میں ڈاکٹر بنوں ٬ اسی وجہ سے پری میڈیکل میں داخلہ لیا-

ہماری ویب: پری میڈیکل ایک محنت طلب فیلڈ ہے؟ اس کو جوائن کرتے ہوئے کسی خوف کا احساس ہوا؟ یا پھر کبھی ایسا لگا کہ اس کو جوائن کر کے غلطی کی
بھاونا بائی= ایک یا دو بار ایسا ہوا تھا جب امتحانات کا وقت آیا تھا لیکن پھر سوچا کہ جب ڈاکٹر بننا ہے تو محنت کرنے پڑے گی-

ہماری ویب: کیا کوچنگ بھی جوائن کیا ہے؟
بھاونا بائی= صرف دو مضامین کے لیے مستقل کوچنگ جوائن کی اور باقی مضامین کے لیے ٹیچر سے رہنمائی حاصل کرلیتی تھی-

ہماری ویب: آپ کی نظر میں اس وقت پاکستان کا سب سے بڑا مسئلہ کیا ہے؟
بھاونا بائی= ہمیں اس وقت تعلیم کی ترقی کے بارے میں سوچنا چاہیے- اگر بچے تعلیم یافتہ ہوں گے تو ملک بھی ترقی کرے گا-

ہماری ویب: کیا نصابی کتابوں کے علاوہ بھی اور کتابوں کا مطالعہ بھی کرتی ہیں؟
بھاونا بائی= نہیں صرف اپنے کورس کی کتابوں کا مطالعہ کرتی تھی-