کیا کہتے ہیں میٹرک سائنس کے پوزیشن ہولڈر؟

اپنا مقصد حاصل کرنے کے لیے محنت کرنا کوئی خاص بات نہیں لیکن محنت کر کے اپنے مقصد کو حاصل کرلینا واقعی ایک بہت بڑی کامیابی ہوتی ہے- اپنے مقاصد حصول کے لیے ایسی ہی محنت کی تھی چند طالبعلموں نے جنہیں بالآخر کامیابی حاصل ہوئی- ہم بات کر رہے ہیں کراچی کے میٹرک کے سالانہ امتحانات برائے 2014 میں پوزیشن حاصل کرنے والے طلبہ کی- یہ کامیاب طلبہ ہمارے روشن مستقبل کی ایک کرن ہیں اور ان کی حوصلہ افزائی ہر پلیٹ فارم پر ضرور ہونی چاہیے- اسی حوالے سے ہماری ویب نے ٹاپ تھری پوزیشن ہولڈرز سے خصوصی بات چیت کی- اس بات چیت کا مقصد جہاں ایک جانب ان بچوں کی حوصلہ افزائی کرنا تھا وہیں دوسری طرف اپنے قارئین کی رہنمائی بھی ہے- دلچسپ بات یہ ہے مذکورہ امتحانات میں دوسری پوزیشن دو طالب علموں نے حاصل کی-

سب سے پہلے ہم بات کریں گے میٹرک کے سالانہ امتحانات میں فرسٹ پوزیشن حاصل کرنے والی خوش نصیب طالبہ ماروا تنویر سے-

ہماری ویب: اسکول کا نام؟
ماروا تنویر= عثمان پبلک اسکول - کیمپس 6
 

ہماری ویب: پوزیشن حاصل کرنے پر کیا احساسات ہیں؟
ماروا تنویر= بہت خوشی محسوس ہورہی ہے اور صرف میں ہی نہیں بلکہ میری فیملی بھی بہت خوش ہے-

ہماری ویب: آپ نے اس سے پہلے کبھی کوئی پوزیشن حاصل کی ہے؟
ماروا تنویر= میں نے نرسری سے ہمیشہ پہلی پوزیشن ہی حاصل کی ہے-

ہماری ویب: کیا آپ اسکول کے اساتذہ سے مطمئین ہیں؟
ماروا تنویر= ہمارے اسکول کے اساتذہ بہت کوآپریٹو ہیں اور اسکول کا نظام بھی بہت اچھا ہے-

ہماری ویب: ہمیشہ خود سے پڑھائی کی یا پھر کوچنگ بھی جوائن کیا ہے؟
ماروا تنویر= میں نے کبھی کوچنگ جوائن نہیں کیا٬ پرائمری میں والدہ پڑھاتی تھیں جبکہ سیکنڈری میں خود پڑھنا شروع کیا-

ہماری ویب: لوڈشیڈنگ یا امن و امان کی بدترین صورتحال نے پڑھائی کو متاثر کیا؟
ماروا تنویر= جی ہاں لوڈشیڈنگ نے بہت متاثر کیا جبکہ تمام تر تیاری کے بعد ہڑتال کے ہوجانے پر پڑھائی بھی متاثر ہوتی ہے-

ہماری ویب: تعلیم کے نظام کو کس طرح بہتر بنایا جاسکتا ہے؟
ماروا تنویر= نصاب کو اپ ڈیٹ کیا جائے٬ کتب میں موجود مضامین ایڈوانس نہیں ہیں اور دس گیارہ سالوں سے وہی مضامین چلے آرہے ہیں-

ہماری ویب: آپ کی نظر میں پاکستان کا سب سے بڑا مسئلہ کیا ہے؟
ماروا تنویر= پاکستان کا سب سے بڑا مسئلہ تعلیم کی کمی ہے-

ہماری ویب: آج کل کے دور میں ہر عمر کے فرد کے پاس موبائل موجود ہے٬ لیکن کیا اسکول کے طلبا کو اس کی اجازت ہونی چاہیے؟
ماروا تنویر= اسکول کے طلبا کو موبائل کی اجازت نہیں ہونی چاہیے کیونکہ انہیں اس کی کوئی ضرورت نہیں البتہ کالج میں اجازت ہونی چاہیے-