نوٹ
یہ مضمون کرشن چندر کی موت پر لکھا گیا تھا اور لاہور کے ہفت روزہ ممتاز میں شائع
ہوا تھا۔ پرانے کاغوں میں سے ملا ہے۔ اس سے جہاں میرا اس عہد کا اسلوب تکلم سامنے
آتا ہے وہاں اس سے قلبی وابستگی بھی واضح ہوتی ہے۔
کرشن چندر مر گیا۔۔۔۔۔۔۔؟!
نہیں۔۔۔۔۔۔نہیں' یہ کبھی نہیں ہو سکتا۔۔۔۔۔ وہ زندہ ہے اور تاابد زندہ رہے گا۔ وہ
فن کار تھا۔۔۔۔۔۔۔ اور فن کار کبھی نہیں مر سکتا۔۔۔۔۔۔ اگر فن کار مر جائے تو شبنمی
ہوائیں ۔۔۔۔۔۔ آگ برسانے پر تل جآئیں۔ ۔۔۔۔۔ دریاؤں کی سبک خرامی۔۔۔۔۔۔۔۔ طوفان بلا
کا روپ دھار لے۔۔۔۔۔۔ فن کے افق کی لازوال سرخیاں۔۔۔۔۔مٹ جائیں۔۔۔۔۔درد کے
آنسو۔۔۔۔۔۔۔ فن کی دل فریب وادیاں......بہا لے جائیں۔۔۔۔۔۔ چندا کی اجلی اجلی نکھری
نکھری دودھیا کرنیں۔۔۔۔۔۔ لہو آمیز ہو جائیں۔۔۔۔۔۔ درد کے سیاہ بادل ۔۔۔۔۔۔ سوچ کے
آکاش پر پھیل جائیں۔۔۔۔۔۔۔ وہ کچھ ہو۔۔۔۔۔ جس کے تصور سے بھی روح لرزہ بر اندام ہے۔
میں اسی کرشن چندر کی بات کر رہا ہوں جو افسانہ نگار ہونے کے ساتھ ساتھ۔۔۔۔۔۔۔
ملنسار' ہم درد' بردبار اور مستقل مزاج انسان بھی تھا۔ اس کی زندگی درد سے چلاتے
انسانوں کو بھرپور تسلی وتشفی دیتے گزری۔۔۔۔۔۔ اس نے ادب کے گلشن میں۔۔۔۔۔ سچائی کا
وہ بیج بویا ۔۔۔۔۔۔ جو آج تناور درخت کی صورت اختیار کر گیا ہے۔ وہ حساس تھا۔
احساسیت کا مادہ اس میں بدرجہ اتم موجود تھا۔ شاید یہ ہی وجہ ہے کہ اس کے فن میں
درد کی آمیزش نمایاں ہے۔ بلا شبہ وہ فن کا دیوتا تھا۔ مجھے تسلیم ہے مرحوم نے ہندو
کلچر کو نمایاں رکھا۔۔۔۔۔۔۔ اس حقیقت کے باوجود وہ معلم تھا اور ہر قوم کے لیے اس
کا فن ۔۔۔۔۔۔ خضر راہ سے کم نہیں۔۔۔۔۔ وہ دوستوں کا دوست ۔۔۔۔۔۔ اس کے حلقہء احباب
میں کافی مسلمان بھی شامل تھے۔ ہر دوست سے اس کا رویہ مثبت قدروں کا حامل تھا۔
اس کے لکھے ہوئے افسانوں کے خدوخال اتنے قوی اور توانا ہیں کہ اس کے الفاظ رنگوں کی
طرح ابدی اور قوس قزح کی طرح غیرفانی ہو گیے ہیں۔ اس کا قلم گزری ہوئی کل اور گزرتی
ہوئی آج کا سنگم ہی نہیں ہوا۔۔۔۔۔ بلکہ آنے والی کل ۔۔۔۔۔۔۔۔ کا بھی ترجمان ہے۔ اس
نے درد بھری اور سسکتی تنہائی کی ترجمانی کی ۔۔۔۔۔۔ ایسی تنہائی ۔۔۔۔۔۔۔ جس کے
قدموں کی چاپ برسوں۔۔۔۔۔۔۔ روشن شہر کی پختہ سڑکوں پر راہی کا پیچھا بھی کرتی ہے۔
دیہات کے بچے جھونپڑوں کی گرد آلود تنہائی پر بھی اس کی بھرپور نظر تھی۔ اس تنہائی
کا وہی ترجمان ہو سکتا ہے ۔۔۔۔۔۔۔ جس نے خود اس زہر کو چکھ کر دیکھا ہو اور جس کی
روح شنکر کے جسم کی طرح نیلی پڑ چکی ہو۔۔۔۔۔۔۔ بہرکیف کرشن چندر کی روح اس سم الفار
سے بخوبی واقف تھی۔ اس شناسائی نے ہی اسے جدا طرز فکر بخشا۔
کرشن۔۔۔۔۔ فن کے افق پر۔۔۔۔۔۔ ایسا سورج طلوع کر گیا جو تاابد۔۔۔۔۔۔ دکھ کی کرنیں
بکھیرتا رہے گا۔۔۔۔۔۔ اور اہل فکر و نظر ۔۔۔۔۔۔ گہری سوچ کے ساحل پر ۔۔۔۔۔۔ کھڑے
جائزہ کرتے رہیں گے۔۔۔۔۔۔وہ اہل قلم کو نئی۔۔۔۔۔۔ نکھری نکھری ۔۔۔۔۔ اجلی
اجلی۔۔۔۔۔۔صبح کا پیغام دے گیا۔ اس کے فنی چہرے سے۔۔۔۔۔۔ کئی قندیلیں روشن
ہوئیں۔۔۔۔۔ یہ قندیلیں درد آمیز تنہائی کا۔۔۔۔۔۔ایک روز قلع قمع کر دیں گی اور اسے
قرطاس فن کی سفید چادر پر نقش دوام کر دیں گی۔
یقین نہیں آتا کرشن مر گیا۔۔۔۔۔
آہ کیا کریں۔۔۔۔۔۔ حقیقت بہرطور حقیقت ہے' جسے تسلیم کیے بغیر چارہءکار نہیں۔حقائق
سے کیوں کر منہ موڑیں۔۔۔۔۔ کاش وہ نہ مرتا۔۔۔۔۔ کچھ دیر تو اور ٹھہر جاتا۔۔۔۔۔ فن
کو اس کی ضرورت تھی۔۔۔۔۔۔ مگر وہ تو سفر کی خوشی میں اپنے احباب اور اہل خانہ کو
فراموش کر چکا تھا۔۔۔۔۔۔ میں ان سطور
کے ذریعے ادارہ ممتاز' قارئین و قلم کاران ہفت روزہ ممتاز ۔۔۔۔۔۔ اور اپنی طرف سے
پسماندگان سے بھرپور اظہار افسوس کرتا ہوں۔۔۔۔۔۔ خدا ان سب کو صبر جمیل عطا کرے اور
مرحوم کی روح کو سکون بخشے۔۔۔۔۔آمین
مضون کا آخری جملہ
بلاشبہ کرشن اردو ادب کا انمول سرمایا تھے۔ فن کے ساتھ فن نواز ان فن کو سلام کہتے
ہیں۔ |