بلی کے کاٹنے کا بدلہ بلی کے مالک کو کاٹ کر

کہتے ہیں کہ خبر یہ نہیں ہوتی کہ کتے نے انسان کو کاٹ لیا بلکہ خبر یہ ہوتی ہے کہ انسان نے کتے کو کاٹا لیا٬ تاہم جرمنی کے ایک شہر میں تو معاملہ اس سے بھی تجاوز کرگیا کہ بلی کے کاٹنے پر خاتون نے بلی کے مالک کو ہی کاٹ ڈالا-

جی ہاں ایسا ہی ایک دلچسپ واقعہ پیش آیا ہے جرمنی کے مغربی شہر ہاگن میں جہاں ایک نوجوان خاتون کو دوست کی بلی نے اس کے گھر پر اس زور سے کاٹا کہ خاتون نے طیش میں آکر نہ صرف اپنے دوست اور بلی کے مالک کو متعدد بار کاٹا بلکہ اس حد تک پٹائی بھی کی کہ وہ بےچارہ اسپتال جا پہنچا-
 

مقامی پولیس کے مطابق 26 سالہ خاتون اپنے دوست کی بلی کو تربیت دینے کوشش کررہی تھی لیکن بلی تربیت کا طریقہ کچھ خاص پسند نہیں آیا جس پر اس نے خاتون کو کاٹ لیا-

جس کے بعد خاتون نے بلی کو سبق سکھانے کی کوشش کی تو اس کا اپنے دوست سے ہی جھگڑا ہوگیا اور خاتون مزید مشتعل ہوگئیں- اور نوجوان خاتون نے بلی کے بجائے اپنے دوست کو سبق سکھانا شروع کردیا-

خاتون جن کا نام ظاہر نہیں کیا گیا نے اپنے دوست کی اس بری طرح پٹائی کی کہ اسے اپنا ہی گھر چھوڑ کر بھاگنا پڑا اور تب کہیں جا کر اس کی جان بچی-

خاتون کے دوست نے پٹائی کے دوران متعدد بار پولیس کو مطلع کرنے کی کوشش بھی کی لیکن خاتون ہر بار اس کے ہاتھ سے ریسیور چھیننے میں کامیاب رہی-