جیوے جیوے پاکستان

وطن عزیز میں باصلاحیت افراد کی کمی نہیں ہے۔ ہر شعبہ زندگی خواہ وہ سائنس ہو، تعلیم ہو، ٹیکنالوجی ہو خدمت خلق ہو یا کھیلوں کا میدان۔ ہر شعبے میں باصلاحیت افراد نے نامساعد حالات اور ناکافی وسائل کے باوجود دنیا بھر میں وطن عزیز کا نام روشن کیا ہے، چاہے عبدالستار ایدھی ہوں، ارفع کریم مرحومہ ہوں یا کم عمر ترین مائیکرو سافٹ ماہر حمزہ شہزاد۔ اس فہرست میں اب ایک نیا اضافہ کراچی کے پرس بیچنے والے عبدالمالک بھی ہیں۔
 

کراچی سے تعلق رکھنے والی عبدالمالک کے باڈی بلڈنگ کے شوق نے دنیا بھر میں پاکستان کا نام روشن کردیا ہے۔ میامی میں ہونے والی مسل مینیا ورلڈ چیمپئن شپ Mussel Mania World Champion Shipاپنے نام کرلی۔ عبدالمالک نے پچھتر کلو کرام کیٹگری میں یہ کارنامہ سر انجام دیا ہے۔ اس طرح انہوں نے اپنی محنت اور لگن سے عالمی سطح پر ملک کا نام روشن اور سبز ہلالی پرچم لہرا دیا ہے۔

اس سے قبل عبدالمالک ایشین باڈی بلڈنگ چیمپئن شپ میں بھی گولڈ میڈل جیت چکے ہیں۔ یہ بات اہم ہے کہ انہیں سرکاری سرپرستی حاصل نہیں تھی اور وہ چندہ کر کے اس مقابلے میں شریک ہوئے۔ عبدالمالک نے 14سال کی عمر میں باڈی بلڈنگ شروع کی اورعالمی و ایشیائی اعزاز کے علاوہ وہ ملکی سطح پر بھی کئی اعزازت اپنے نام کرچکے ہیں۔