دنیا کے امیر ترین کھلاڑی

آپ اب تک دنیا کی امیر ترین شخصیات یا پھر پاکستان کی امیر ترین شخصیات کے بارے میں تو پڑھتے آئے ہیں- لیکن آج ہم آپ کو دنیا کے امیر ترین کھلاڑیوں کے بارے میں بتائیں جو کہ نہ صرف اپنے کھیل سے سالانہ کروڑوں ڈالر حاصل کرتے ہیں بلکہ دیگر اقسام کے متعدد معاہدے بھی ان کی آمدن میں اضافے کا باعث بنتے ہیں- دنیا کے امیر ترین کھلاڑیوں کی یہ فہرست حال ہی فوربس نے جاری کی ہے-

دنیا کا سب سے امیر ترین کھلاڑی مے ویدر کو قرار دیا گیا جنہوں نے رواں سال دو مئی کو 600 ملین ڈالر مالیت کی دنیا کی سب سے مہنگی فائٹ میں حصہ لیا تھا اور فتح حاصل کی تھی۔ امریکہ سے تعلق رکھنے والے اس باکسر کی آمدن رواں سال 30 کروڑ ڈالر رہی-

امیر ترین کھلاڑیوں کی فہرست میں دوسرے نمبر پر فلپائن کے مینی پکوئیو ہیں جو دنیا کی سب سے مہنگی فائٹ میں مے ویدر کے مدمقابل تھے لیکن شکست سے دوچار ہوئے- اس فلپائنی باکسر کی آمدن 16 کروڑ ڈالر رہی-

دنیا کے تیسرے امیر ترین کھلاڑی پرتگال سے تعلق رکھنے والے دنیا کے مشہور فٹبالر کرسٹیانو رونالڈو ہیں جن کی رواں سال آمدن 7 کروڑ 96 لاکھ ڈالر رہی-

چوتھی پوزیشن بھی ایک فٹبالر کے نام ہی ہے اور وہ ہیں ارجنٹائن کے لیونل میسی- مختلف معاہدوں اور اپنے کھیل سے حاصل ہونے والی ان کی کُل آمدن 7 کروڑ 38 لاکھ ڈالر تھی-

ٹینس کے نامور کھلاڑی روجر فیڈرر اس فہرست میں پانچویں نمبر پر ہیں اور ان کی رواں سال ہونے والی آمدن کا اندازہ چھ کروڑ ستر لاکھ ڈالر لگایا گیا ہے- روجر کا تعلق سوئٹزرلینڈ سے ہے-

6ویں امیر ترین کھلاڑی لوبورن جیمز ہیں جو امریکہ سے تعلق رکھتے ہیں اور باسکٹ بال کے پلئیر ہیں- لوبورن کی رواں سال کی آمدن 6 کروڑ 48 لاکھ ڈالر رہی ہے-

امیر ترین کھلاڑیوں میں ساتواں نمبر بھی ایک باسکٹ بال کے کھلاڑی کے پاس ہی ہے اور وہ ہیں کیون ڈیورنٹ جو امریکہ سے تعلق رکھتے ہیں- رواں سال ان کی آمدن 5 کروڑ 41 لاکھ ڈالر رہی-

امیر ترین کھلاڑیوں کی فہرست میں 8ویں نمبر پر امریکہ سے تعلق رکھنے والے گالف کے کھلاڑی فل مکلسن ہیں جن کی کُل آمدن رواں سال 5 کروڑ 8 لاکھ ڈالر رہی ہے-

گالف ہی کے ایک اور کھلاڑی ٹائیگر ووڈ اس فہرست میں نویں پوزیشن پر براجمان ہیں- یہ بھی امریکہ سے ہی تعلق رکھتے ہیں اور رواں ان کو ہونے والی آمدن 5 کروڑ 6 لاکھ ڈالر بنتی ہے-