فرائیڈے 13 اور پورا چاند نحوست کی علامت

توہم پرستانہ عقیدے ہمارے معاشرے کچھ انداز سے سرایت کر چکے ہیں کہ آج کے ترقی یافتہ دور میں بھی ہم کالی بلی کے راستہ کاٹنے یا دودھ کے گرنے جیسے عوامل کو بدشگونی سے تعبیر کرتے ہیں۔ لیکن ان توہم پرستانہ عقائد کی جھلک مغربی معاشرے میں بھی دیکھنے کو ملتی جنہیں انتہائی ترقی یافتہ مانا جاتا ہے-

مغرب میں 13 کے ہندسے کو نحوست کی علامت قرار دیا جاتا ہے۔

آپ کو یہ جان کر شدید حیرت ہوگی کہ تیرہ کے ہندسے کو منحوس قرار دینے والوں کا عقیدہ اس قدر مستحکم ہے کہ ،مغربی ممالک میں عمارتوں اور ہوٹلوں میں تیرہ نمبر کا کمرہ یا تیرہویں منزل نہیں ہی ہوتی۔
 

معاملہ اس وقت زیادہ بگڑتا ہے جب 13 تاریخ اور فرائیڈے دونوں ایک ہی ساتھ آجائیں کیونکہ ایسے موقع کو ایک بڑی بدشگونی خیال کیا جاتا ہے۔

مغربی ممالک میں آج کے ترقی یافتہ دور میں بھی فرائیڈے 13 کو خوف اور بدقسمتی کی علامت سمجھا جاتا ہے۔ اور اس کو ماننے والے افراد اس روز سفر کرنے یا کوئی نیا کام شروع کرنے سے اجتناب کرتے ہیں۔

آپ اس خوف کی انتہا کا اندازہ اس بات سے باآسانی لگا سکتے ہیں کہ ایک ٹریول ایجنسی کے مطابق جون کے ماہ میں فرائیڈے 13 یعنی آج وہ واحد دن ہے جس دن اندرون ملک پروازوں کے لیے انتہائی سستے ٹکٹ دستیاب ہیں چونکہ فرائیڈے تیرہ کو لوگ سفر کرنا مناسب نہیں سمجھتے اس لیے فضائی کمپنیوں کی جانب سے سستے ٹکٹوں کی پشکش کی گئی ہے۔

اس دن امریکہ بھر میں فضائی سفر کرنے والوں کی تعداد میں نمایاں کمی واقع ہوتی ہے جس کی وجہ سے امریکی معیشت کو تقریبا آٹھ سو سے نو سو ملین ڈالر کا نقصان ہوتا ہے۔

آج فرائیڈے بھی ہے اور تاریخ بھی 13 ہے لیکن اس ماہ سے جڑی ایک اور دلچسپ بات بھی ہے کہ رواں ماہ دو توہم پرستانہ نظریات کا ملاپ ایک ہی ساتھ ہے کیونکہ اس بار ' جون کی 13 تاریخ ' ' فرائیڈے' اور' فل مون ' یعنی چودہویں کا چاند سب ایک ساتھ یکجا ہو رہے ہیں۔

اس لیے ممکن ہے کہ توہم پرستانہ عقائد رکھنے والوں کو شاید آج کا پورا دن گھر پر ہی گزارانا پڑے۔ ایسا موقع 13 اکتوبر ء 2000 میں بھی رونما ہو چکا ہے جب فرائیڈے 13 پر آسمان پر مکمل روشن چاند موجود تھا اور ماہرین کے مطابق مستقبل میں آج کے بعد پورا چاند اور فرائیڈے 13 کا ملاپ 2049 میں متوقع ہوسکتا ہے۔

یہ بھی ایک حقیقت ہے کہ فرائیڈے 13 کے منحوس ہونے یا نا ہونے کی وجہ آج تک واضح نہیں۔ لیکن کچھ لوگ اس کی توجیہ یوں پیش کرتے ہیں کہ 13 کا ہندسہ ایک نامکمل اور بےقاعدہ ہندسہ ہے- کیونکہ ایسے لوگوں کا ماننا ہے کہ 12 ایک مکمل ہندسہ ہے جو اختتام کو ظاہر کرتا ہے یعنی بارہ مہینے کا ایک سال یا پھر گھڑی کے بارہ گھنٹے اسی لیے ان کے نزدیک تیرہ ایک غیر ضروری ہندسہ ہے۔