اصل کمپیوٹر کاغذ پر چھاپئے٬ دلچسپ ایجاد

ذرا تصور کیجئے کہ ایک پرنٹر کے ذریعے خاص کاغذ پر کام کرنے والا کمپیوٹر چھاپا جاسکتا ہے اور اس کا ایک ٹکڑا توڑ کر آپ دوسرے کے حوالے کرسکیں گے تاکہ وہ اپنا کام چلاسکے،’ یہ کہنا ہے سٹیو ہوجز کا جو کیمبرج برطانیہ میں مائیکروسوفٹ ریسرچ سے وابستہ ہے۔ یہ زبردست آئیڈیا آج نہیں تو کل حقیقت بن ہی جائے گا کیونکہ اسے ممکن بنانے والی ٹیکنالوجی تیار ہوچکی ہے۔

ہوجز اور یونیورسٹی آف ٹوکیو، جاپان کے سائنسدان اور ان کے ساتھیوں نے ایک طریقہ وضع کیا ہے جس کے تحت کاغذ پر بہت نفاست سے الیکٹرانک سرکٹس کو چھاپا جاسکتا ہے۔
 

اس سے بڑھ کر یہ کہ آپ یہ کام ایک عام انک جیٹ پرنٹر سے کرسکتے ہیں جس کی سیاہی میں سلور نینو پارٹیکلز ( چاندی کے نینو ذرات) بھرے ہوتے ہیں۔ گزشتہ ماہ کاواہارہ نے سوئزرلینڈ کے شہر زیورخ میں ایک کانفرنس میں کاغذ پر ایک ایسا سینسر چھاپا جو ہوا میں نمی کا سراغ لگاسکتا تھا۔

جو سرکٹ اور آلات بناتے ہیں وہ صرف ایک کاغذ پر اپنا سرکٹ چھاپ کر اسے ٹیسٹ کرسکتے ہیں اور اگر سرکٹ کام نہ کرے تو کاغذ کو کوڑے دان میں پھینک سکتے ہیں۔ اس طرح وقت اور وسائل دونوں کی بچت ہوگی۔

آج کل تھری ڈی پرنٹرز کا بہت چرچا ہے جن پر کام ہورہا ہے اور کامیابیاں بھی ملی ہیں۔ یہ تھری ڈی آلات اور اشیا پرنٹ کرتے ہیں لیکن اس کے اندر ٹو ڈی سرکٹس پرنٹ نہیں کرتے اور ہوجز اور کاواہارہ کی یہ ایجاد اسی ضرورت کو پورا کرتی ہے۔

‘ پرنٹنگ سرکٹ بورڈز کی ڈیزائننگ کوئی مشکل کام نہیں۔ بہت سے لوگ تھری ڈی پرنٹرز سے آئی فون چھاپنے کی بات کرتے ہیں، جس پر آپ ایک جگہ سب چیزیں چھاپ سکتے ہیں،’ میٹ جانسن نے کہا جو لندن کی ایک فرم بیئر کنڈکٹو کے سربراہ ہیں۔ ان کی کمپنی شوقیہ الیکٹرانکس والوں کیلئے ایسی روشنائی بناتی ہے جس سے بجلی گزر جاتی ہے اور اس سے سرکٹ کی لائنیں بنائی جاسکتی ہیں۔ ان کا کہنا ہے کہ ایسے سرکٹس بنانے کی ضرورت ہے جو کئی استعمال میں آسکے مثلاً پیکیجنگ وغیرہ۔

کاواہارہ نے چاندی کے محلول پر مبنی جو انک تیار کی ہے اسے ایک عام 80 ڈالر کے انک جیٹ پرنٹر سے چھاپا جاسکتا ہے اور انہوں نے دریافت کیا کہ اس سے فوٹو کوالٹی پیپر پر سرکٹ چھاپا جاسکتا ہے۔ ضروری نہیں کہ چاندی خارج کرنے کیلئے انک کو گرم کیا جائے اور اس انک کے ذرات کا سائز، ان کا گاڑھا پن اور سرفیس ٹینشن اتنا موزوں ہے کہ اس سے ہموار، سیدھے اور بہترین کنڈکٹرز ایک کاغذ پر بنائے جاسکتے ہیں۔