برطانوی یونیورسٹیوں کے مفت آن لائن ڈگری کورسز

برطانیہ کی ٹاپ یونیورسٹیاں رواں ہفتے سے ایک انقلابی یو ٹیوب طرز کے تعلیمی مرکز کے ذریعے دنیا بھر کے لاکھوں لوگوں کو مفت ڈگری سطح کے کورسز کی پیشکش کر رہی ہیں۔

روزنامہ ’ٹائمز‘ کی خبر کے مطابق، رسل گروپ میں شامل تقریباً نصف ریسرچ یونیورسٹیوں نے مختصر دورانیے کے کورسسز ڈیزائن کر کے ڈیجیٹل پلیٹ فارم پر اپ لوڈ کئے ہیں، جہاں سائن اپ کرنے والا ہر شخص اِن کورسز تک رسائی حاصل کر سکے گا۔
 

برطانوی آن لائن پراجیکٹ اوپن یونیورسٹی اور صف اول کی برطانوی یونیورسٹیوں کی شراکت داری سے قائم کیا گیا ہے جسے'فیوچر لرن' کا نام دیا گیا ہے۔ اوپن یونیورسٹی کی اسکیم میں 24 یونیورسٹیاں حصہ لے رہی ہیں، جِن میں برمنگھم، باتھ، برسٹل، سینٹ اینڈریو، واروک، لیڈز، نوٹنگھم، کنگز کالج لندن اور ایکسٹر یونیورسٹی شامل ہیں جنھوں نے مفت ڈگری کورسز ڈیجیٹل پلیٹ فارم کے لیے تیار کئے ہیں۔

بعض مبصرین کا خیال ہے کہ یہ رجحان روایتی یونیورسٹی کیمپس کو نقصان پہنچا سکتا ہے جہاں ڈگری سطح کے کورسز کی سالانہ فیس 9 ہزار پاؤنڈ یا 13 ہزار امریکی ڈالر وصول کی جاتی ہے۔

اوپن یونیورسٹی کے دور دراز سے تعلق رکھنے والے طالب علم ٹیبلیٹ، اسمارٹ فونز اور کمپیوٹر کے ذریعے کسی بھی کورس کے مٹیریل اور ہائی پروفائل ویڈیو لیکچر تک رسائی حاصل کر سکیں گے۔ اسی طرح، انٹرنیٹ ڈسکشن گروپ کو استعمال کرتے ہوئے طلبہ دانشمندانہ مباحثوں میں بھی حصہ لے سکیں گے، جبکہ، برٹش میوزیم اور برٹش لائبریری کے نادر نمونوں کو بھی براؤز کیا جاسکے گا۔

طالب علموں کے لیے کسی بھی ای کورس کے لیے باقاعدہ اندراج کرنے کی ضرورت نہیں ہے۔ تاہم، انفرادی طور پر یونیورسٹی طالب علم کی تعلیمی قابلیت کو جانچنے کے بعد فیصلہ کرنے کا حق رکھتی ہے۔ شارٹ کورسز کا دورانیہ 5 سے 6 ہفتے اور 10 سے 12ہفتے کے اکیڈمک سیمسٹر تک ہوگا۔ کورس مکمل کرنے والے طالب علموں کو سرٹیفکیٹ دیا جائے گا۔