لاک ڈاؤن کے دنوں میں کراچی میں ہونے والی انوکھی شادی جس میں ایک دو نہیں بلکہ لاکھوں لوگوں نے شرکت کی

کرونا وائرس کے پھیلاؤ اور اس کے سبب ہونے والے لاک ڈاؤن نے اس دنیا کو اور دنیا میں رہنے والے لوگوں کے طرز زندگی کو یکسر بدل کر رکھ دیا ہے لوگ سوشل ڈسٹنسنگ کے اصول پر عمل کرتے ہوئے کافی حد تک محدود ہو گئے ہیں- اچانک ہونے والے فیصلوں کے سبب جہاں بہت ساری چیزوں میں تبدیلی آئی وہاں وہ لوگ بھی پریشان ہو گئے جن کی شادی کی تاریخیں طے ہو چکی تھیں اور شادی کے لیے ہال بک تھے اور مہمانوں کو کارڈ تقسیم کیے جا چکے تھے- مگر تقریبات پر پابندی کے سبب بہت سارے جوڑے ایسے بھی تھے جنہوں نے اپنی شادی ملتوی کر دی مگر کچھ جوڑے ایسے بھی تھے جنہوں نے حالات کے ساتھ سمجھوتہ کرتے ہوئے نیا راستہ نکال دیا-

کراچی کے اس جوڑے کی شادی کی تاریخ 29 مارچ طے تھی مگر اچانک ہونے والے لاک ڈاؤن نے سب کچھ بدل کر رکھ دیا- ایک جانب تو شادی کا جوڑا جس بوتیک میں تھا وہ بند پڑا تھا کیٹرنگ کا آرڈر پارلر کا آرڈر یہاں تک کہ کیمرہ مین کے ساتھ بکنگ تک کی جا چکی تھی مگر سب کچھ ناممکن نظر آرہا تھا اس موقع پر اس جوڑے نے اپنی خوشیوں کو ایک نیا رنگ دینے کا فیصلہ کیا-
 

دلہن نے اپنے جہیز کے ایک سرخ جوڑے کو عروسی لباس کے طور پر منتخب کیا اور کسی پارلر میں جانے کے بجائے خود ہی اپنا میک اپ کر لیا کھانا گھر والوں نے خود ہی بارات کے قلیل سے مہمانوں کے لیف خود ہی بنا لیا اور گھر میں موجود کیمروں سے گھر والے خود ہی فوٹو گرافر بھی بن بیٹھے-

مگر اس شادی کی سب سے خاص بات اس میں شریک ہونے والے مہمانوں کی کثیر تعداد تھی جو لاک ڈاؤن کے باوجود شادی میں زوم کے ذریعے آن لائن شریک ہوئے اور انہوں نے لائیو اس شادی کی تمام تقریبات میں دنیا بھر سے شرکت کی-

دودھ پلائی ، کھیر چٹائی سمیت تمام رسموں کو آن لائن تمام عزیزوں کے سامنے کیا گیا اور کرونا وائرس کے ساتھ زندگی کو ایک نئے انداز اور نئی روایت سے جینے کا انداز دیکھنے والوں کو بتایا گیا-
 

رخصتی کے بعد اگلا دن ولیمے کا تھا جس میں دولہے کی سالیوں نے اس کی جوتا چھپائی کی رسم بھی کی- اس شادی کی ویڈیو جب سامنے آئی تو وائرل ہو گئی اور اس طرح اس شادی میں شرکت کرنے والوں کی تعداد لاکھوں تک جا پہنچی ۔ یہ شادی ان تمام لوگوں کے لیے سبق ہے جو لاک ڈاؤن کھلنے اور دنیا کے دوبارہ پہلے جیسے ہونے کا انتظار کر رہے ہیں-