سعودی عرب: غیر شادی شدہ جوڑوں کو کمرہ شئیر کرنے کی اجازت

گزشتہ ماہ سعودی عرب کی جانب سے نئی سیاحتی ویزا پالیسی متعارف کروائی گئی تھی جس کے تحت پہلی بار ملک کے دروازے وسیع سیاحت کے لیے کھولے گئے تھے-
 

لیکن اب سعودی عرب نے بین الاقوامی سیاحت کے فروغ کے لیے ایک قدم مزید آگے بڑھاتے ہوئے سیاحت کے غرض سے سعودی عرب آنے والے غیر شادی شدہ جوڑوں کو کمرہ شئیر کرنے کی اجازت دے دی ہے-

اس نئے اقدام پر مشتمل سعودی عرب کی جانب سے یہ نئے قواعد و ضوابط حال ہی میں منظور کیے گئے ہیں-

اب تک سعودی عرب میں ہوٹل کے ایک ہی کمرے میں رہائش اختیار کرنے کی اجازت صرف شادی شدہ جوڑوں کو تھی اور ان جوڑوں کو بھی باقاعدہ شادی کی دستاویزات ثبوت کے طور پر فراہم کرنا ہوتی تھیں- لیکن اب بین الاقوامی سیاحوں پر سے یہ پابندی اٹھا لی گئی ہے-

نئی ویزا پالیسی کے مطابق اب خواتین نہ صرف اکیلے سعودی عرب کا سفر کرسکیں گی بلکہ ہوٹل میں کمرہ بھی بک کروا سکیں گی- اس کے علاوہ اپنی مرضی کا لباس بھی زیب تن کر سکیں گی-
 

اس سے قبل حج کی ادائیگی کے لیے آنے والی 45 سال سے کم عمر خواتین کے لیے کسی محرم مرد کا ساتھ ہونا لازمی تھا-

سعودی عرب کی جانب سے امید ظاہر کی گئی ہے کہ سال 2030 تک ملک بھر میں آنے والے قومی و بین الاقوامی سیاحوں کی تعداد 100 ملین تک جاپہنچے گی-

سعودی عرب میں اس وقت نئے ریزورٹس اور تھیم پارکس کی تعمیرات کے شعبے میں بھاری سرمایہ کاری کی جارہی ہے-

نئے قوانین کے تحت مسلمان سیاح سال میں کبھی بھی سیاحتی ویزا پر عمرہ ادا کرسکتے ہیں- تاہم حج کی ادائیگی کے لیے انہیں اب بھی مخصوص ویزے کی ضرورت ہوگی-