راجستھان: خواتین کو فٹ رہنے کے لیے انوکھے مشوروں پر تنازع

 

کہتے ہیں کہ صحت ہزار نعمت ہے لیکن انڈیا کی مغربی ریاست راجستھان میں صحت سے متعلق چند مشورے تنازعے کا باعث ہیں۔
 


راجستھان حکومت میں شعبۂ تعلیم سے شائع ہونے والے ہندی زبان کے ماہنامہ 'شِویرا' میں تندرست اور چست رہنے کے چند پرانے نسخے بتائے گئے ہیں جن میں خواتین کو جھاڑو دینے، پوچھا لگانے اور پانی بھرنے کی ہدایت دی گئی ہے۔

صحت کے لیے لوگ نہ جانے کیا کیا جتن کرتے ہیں لیکن ان نسخوں کی اشاعت سے تنازع پیدا ہو گیا ہے۔

کوئی اسے خواتین مخالف کہہ رہا ہے تو کوئی اسے جنسی تفریق پر مبنی اور کوئی اسے خواتین کو 18ویں صدی میں واپس لے جانے کی سازش۔

یہ ماہنامہ آن لائن ڈاؤن لوڈ کیا جا سکتا ہے جس کے صفحہ نمبر 32 پر 'تندرست رہنے کے آسان طریقے' کے عنوان کے تحت 14 نکات پیش کیے گئے ہیں۔
 


ان میں تیسرے نمبر پر یہ درج ہے: 'ٹہلنے کے علاوہ، دوڑنا، سائیکل چلانا، گھڑسواری، تیرنا، یا کوئی بھی کھیل کود اور ورزش اچھے طریقے ہیں۔

'خواتین چکی پیسنے، پونچھا لگانے، رسی کودنا، پانی بھرنا سمیت گھر کے دیگر کاموں میں اچھی ورزش کر سکتی ہیں۔ روزانہ تھوڑی دیر بچوں کے ساتھ کھیلنا، دس پندرہ منٹ تک کھل کر ہنسنا بھی ورزش کے اچھے طریقے ہیں۔'

انڈین میڈیا میں شائع خبروں کے مطابق راجستھان میں اساتذہ کی انجمن نے اس کی مخالفت کی ہے اور کہا ہے کہ اس کے خراب اثرات مرتب ہوں گے۔
 


ان کے مطابق یہ ماہنامہ ریاست میں وسیع پیمانے پر ہر سکول میں پہنچتا ہے اور اسے فوراً واپس لینا چاہیے۔

ٹائمز آف انڈیا کے مطابق ریاست بھر میں اس کی تقریباً 30 ہزار کاپیاں تقسیم ہوتی ہیں اور اساتذہ اور سکول کے پرنسپلز میں اس کی خاصی اہمیت ہے کہ وہ اسے سرکاری نقطہ نظر کا حامل تصور کرتے ہیں۔

اخبار کے مطابق وزیر تعلیم واسودیو دیونانی نے کہا کہ وہ 'اس معاملے پر کچھ کہنے سے پہلے اس کی جانچ کرنا چاہیں گے۔'
 


مانگے رام 0154 نامی ٹوئٹر ہینڈل سے لکھا گیا ہے کہ 'کیا راجستھان کی وزیر اعلیٰ فٹ رہنے کے گھریلو کام کاج کے ان نکات پر عمل کرتی ہیں؟'

خیال رہے کہ راجستھان میں بی جے پی کی حکومت ہے اور وہاں ایک خاتون وجے راجے سندھیا دوسری بار وزیر اعلیٰ ہیں۔

راجن مہاجن نامی ٹوئٹر ہینڈل سے لکھا گیا: 'راجستھان کی خواتین کے لیے کیسے نسخے بتائے جا رہے ہیں اور وہ اس وقت جب فلم 'پدماوتی' پر خواتین کے وقار کو پامال کیے جانے پر تنازع جاری ہے۔ حیرت ہے کہ وہی نسخے مردوں کےلیے کیوں نہیں؟ کیا راجستھان میں ہم مرد غیر تندرست اور توند کے ساتھ ہی اچھے ہیں؟'
 


پترلیکھا چیٹرجی نے راجستھان اور اس کے باہر بی جے پی کی حمایت کرنے والوں کو فٹ رہنے کے لیے چکی پیسنے اور پانی بھرنے کا مشورہ دے ڈالا۔

بوسکو ان چینجڈ نامی ہینڈل سے مزاحیہ انداز میں لکھا گیا کہ 'تمام جم میں فٹنس کے لیے چکی پیسنا اور جھاڑو لگانا شامل کرنا چاہیے۔'

ان 14 نکات میں جہاں اچھی غذائیت کے لیے پھل اور تازہ سبزیاں کھانے کی بات کی گئی ہے وہیں شراب اور تمباکو نوشی ترک کرنے اور سافٹ ڈرنک سے پرہیز بھی بتایا گيا ہے لیکن اس ضمن میں خاص طور پر کوکا کولا اور پیپسی کا نام لیا گیا ہے۔
 


ہندوستان ٹائمز کے مطابق شہری حقوق کے لیے پیپلز یونین کی نیشنل سیکریٹری کویتا شریواستو نے کہا: 'یہ بہت ہی شرمناک ہے کہ شعبۂ تعلیم انھی فرسودہ روایات کو از سر نا‌فذ کر رہی ہے جن سے تعلیم ہمیں آزادی دیتی ہے۔'

خیال رہے کہ راجستھان گزشتہ دنوں تاریخ کو از سر نو لکھنے کے معاملے میں سرخیوں میں رہا تھا جس میں اب یہ پڑھایا جا سکتا ہے کہ ہلدی گھاٹی کی جنگ میں 'رانا پڑتاپ کے بجائے اکبر کو شکست ہوئی تھی۔'

'گائے کو قومی جانور' بنائے جانے کا مطالبہ بھی وہاں سے ہوا تھا اور مور کے بارے میں راجستھان ہائی کورٹ کے ایک جج نے ہی کہا تھا کہ وہ سیکس نہیں کرتا۔


Partner Content: BBC URDU

Disclaimer: All information is provided here only for general health education. Please consult your health physician regarding any treatment of health issues.
Email
Rate it:
Share Comments Post Comments
13 Nov, 2017 Total Views: 1446 Print Article Print
NEXT 
Reviews & Comments
Post your Comments Language:    
Type your Comments / Review in the space below.
JAIPUR: Sweeping floors, using hand grinding mills and filling water pitchers are some of the ways by which women can maintain good health, advises the Rajasthan education department.
MORE ON ARTICLES
MORE ON HAMARIWEB