رمضان٬ ہمارے وہ ارادے جن پر ہم قائم نہیں رہتے

ماہِ رمضان کا آغاز ہوچکا ہے اور مسلمان روزے رکھنے اور عبادات کی ادائیگی میں مصروف ہیں- ہم میں سے ہر شخص اس ماہِ مقدس کے حوالے سے خود سے کئی وعدے یا ارادے کرتا ہے- تاہم آغاز میں تو ہم ان وعدوں یا ارادوں پر قائم رہتے ہیں لیکن جلد ہی انہیں بھولنا شروع ہوجاتے ہیں- اگر آپ بھی اس ماہ وعدوں کی کشتی میں سوار ہیں تو پھر مندرجہ ذیل باتیں آپ سے بھی تعلق رکھتی ہیں- لیکن رمضان مندرجہ ذیل چیزوں پر عمل کرنے اور انہیں اپنی عادت بنانے کا ایک بہترین موقع ہے- یاد رکھیے یہ سنہری موقع سال میں صرف ایک بار آتا ہے- اب بھی کچھ نہیں بگڑا٬ آپ کا پختہ ارادہ آپ کی زندگی سنوار سکتا ہے-

Be Punctual
رمضان خود کو وقت کا پابند بنانے کے حوالے سے ایک بہترین موقع ہوتا ہے- ہم رمضان میں خود سے وعدہ کرتے ہیں کہ اپنے وقت کو بہترین انداز میں ترتیب دیں گے- لیکن ہمارا یہ وعدہ صرف شروع کے 3 سے4 روزوں تک ہی قائم رہتا ہے اور ہم دوبارہ اپنی پرانی زندگی کی بےترتیبی کی جانب سے لوٹنا شروع ہوجاتے ہیں- کوشش کیجیے کہ اس موقع کا فائدہ اٹھا لیں-

Eat Healthy
اکثر لوگوں کا خیال ہوتا ہے کہ روزہ رکھنا صحت کے لیے فائدہ مند ہوتا ہے اور اس بات میں یقیناً کوئی شک بھی نہیں ہے- لیکن وہ یہ سب افطاری کے وقت بھول جاتے ہیں اور دسترخوان پر موجود تمام اشیاﺀ کے ساتھ انصاف کرنا ضروری سمجھتے ہیں- لیکن ان کی یہ عادت صحت پر منفی اثرات مرتب کرنے لگتی ہے-

Pray properly
رمضان میں نمازوں کی ادائیگی اور قرآنِ پاک کی تلاوت کا اہتمام انتہائی خشوع و خضوع کے ساتھ کیا جاتا ہے اور اکثر افراد اس ماہ میں اپنی عبادات کو باقاعدگی پیدا کرنے کا ارادہ بھی کرتے ہیں- لیکن یہ افطاری ایسے بھرپور انداز میں کرتے ہیں کہ اس کے بعد ان پر سستی چھا جاتی ہے- اور اس کے نتیجے میں ان کا ارادہ تکمیل کو نہیں پہنچ پاتا-

Be a better person
رمضان ایک دوسرے کو سمجھنے اور برداشت کرنے کا نام بھی ہے- ہم اس ماہ میں خود کو تحمل مزاج اور درگزر کرنے والا بنانا تو چاہتے ہیں لیکن تھوڑا سا ٹریفک جام دیکھ کر ہماری قوتِ برداشت ختم ہونے لگتی ہے اور ہمارا رویہ گزشتہ زندگی والا ہونے لگتا ہے- جبکہ یہی موقع ہمیں صبر و استقامت سکھاتا ہے-

Be more charitable
رمضان ہمیں بانٹنے٬ تقسیم کرنے اور دوسروں کی مدد کرنے کا درس دیتا ہے- ہم زیادہ سے زیادہ دوسروں کی مدد کرنے کا ارادہ تو کرتے ہیں لیکن جب وقت آتا ہے تو ہاتھ کھینچنا شروع کردیتے ہیں- یہاں تک کہ رمضان میں دوسروں کی مدد کر کے ڈھیروں ثواب کمانے کا یہ قیمتی اور سنہرا موقع ہمارے ہاتھ سے چلا جاتا ہے- کوشش کیجیے کہ جہاں تک ممکن ہو دل کھول کر غریبوں اور مستحقین کی مدد کیجیے-

Share food with others
یوں تو پڑوسیوں اور مستحقین کو افطاری بھیجنا ہمارے ہاں کی روایت ہے لیکن اب یہ روایت بھی دم توڑتی جارہی ہے- اکثر خواتین اس کا ارادہ تو کرتی ہیں لیکن کچن کی گرمی سے گبھرا کر اس کام کو دوسرے دن کے لیے رکھ چھوڑتی ہیں- اور پھر اسی کشمکش میں مکمل ماہِ رمضان ہم سے رخصت ہوجاتا ہے-