رنگ بدلتا گرگٹ کئی منفرد خصوصیات اور حقائق کا مالک

انتہائی عجیب و غریب ظاہری شکل کے مالک گرگٹ کو جانوروں کی دنیا کی ایک دلچسپ مخلوق قرار دیا جاتا ہے- عام طور پر لوگ اس جانور کو رنگ بدلنے کی خصوصیت کے حوالے سے جانتے ہیں لیکن گرگٹ اس کے علاوہ بھی کئی منفرد صلاحیتیں رکھتا ہے اور چند حیرت انگیز حقائق کا مالک بھی ہے- آئیے آج آپ کو گرگٹ سے وابستہ چند ایسی ہی انوکھی باتیں بتاتے ہیں جن سے آپ واقف نہیں-

گرگٹ کا مسکن آبی جنگلات٬ پہاڑ اور صحرا ہوتے ہیں لیکن تمام گرگٹ صرف گرم علاقوں میں ہی پائے جاتے ہیں-

گرگٹ دنیا کے مختلف حصوں میں پائے جاتے ہیں جن میں جنوبی یورپ٬ جنوب مشرقی ایشیا٬ ہوائی٬ کیلیفورنیا اور فلوریڈا شامل ہیں- لیکن پوری دنیا میں موجود گرگٹ کی 200 اقسام میں سے تقریباً نصف اقسام صرف مڈغاسکر میں پائی جاتی ہیں-

گرگٹ کو انگریزی زبان میں “chameleon” کہا جاتا ہے اور یہ ایک لاطینی لفظ ہے جس کے معنی زمین کا شیر کے ہیں-

یہ جانور 70 سینٹی میٹر تک بڑا ہوسکتا ہے- Parson کے گرگٹ کا شمار دنیا کی سب سے بڑی گرگث کی اقسام میں ہوتا ہے-

دنیا کا سب سے چھوٹا گرگٹ leaf chameleon ہوتا ہے جو کہ صرف 1.6 سینٹی میٹر تک بڑا ہوتا ہے- اور یہ اب تک دریافت کیا گیا ریڑھ کی ہڈی والا سب سے چھوٹا جانور بھی ہے-

گرگٹ کی آنکھیں منفرد ہوتی ہیں کیونکہ یہ بڑی ہونے کے علاوہ ایک ہی وقت میں دو سمتوں میں دیکھ سکتی ہیں-

آنکھوں کی طرح گرگٹ کی زبان بھی انوکھی ہوتی ہے- اس کی زبان اس کے جسم سے دو گنا زائد لمبی ہوتی ہے اور یہ اپنا شکار اپنی زبان کی مدد سے ہی تیزی کے ساتھ قابو کرتے ہیں-

عام طور پر گرگٹ کیڑے کھاتے ہیں لیکن بڑی جسامت کے حامل گرگٹ چھپکلیاں یہاں تک کہ پرندے بھی کھا جاتے ہیں-

سانپوں کی مانند گرگٹ کے بھی بیرونی یا درمیانی کان نہیں ہوتے اور نہ ہی ان کے کان کھلے ہوتے ہیں اور نہ کوئی کانوں کا پردہ ہوتا ہے- تاہم یہ بہرے بھی نہیں ہوتے اور ایک مخصوص حد تک کی آواز سن سکتے ہیں-

عام خیال کے برعکس جب گرگٹ اپنی جلد کا رنگ تبدیل کرتا ہے تو وہ ماحول میں خود کو چھپانے کی کوشش نہیں کرتا بلکہ اکثر اس طرح وہ اپنے جسم کے درجہ حرارت پر قابو پاتا ہے٬ دوسرے گرگٹ سے رابطہ کرتا ہے یا پھر اپنے جذبات کا اظہار کرتا ہے-