گلگت بلتستان کے علاقے استور کے نزدیک واقع راما میڈوز کا
شمار پاکستان کی خوبصورت ترین وادیوں میں ہوتا ہے- اس وادی کی خاصیت یہاں
کے لہلاتے سرسبز مرغزار٬ بلند و بالا پہاڑ٬ دلکش جھیل اور اونچے درخت ہیں-
غرض یہ کہ دلکش اور خوبصورت قدرتی مناظر کی تصاویر کے لیے یہ ایک بہترین
مقام ہے-
راما میڈوز سطح سمندر سے 3300 میٹر کی بلندی پر واقع ہے اور تقریباً سارا
سال ہی برف سے ڈھکا رہتا ہے- اس وادی کی حقیقی خوبصورتی کا نظارہ صرف موسمِ
گرما میں ہی ممکن ہے-
|
|
راما میڈوز سے مشرق کی طرف سفر کر کے آپ نانگا پربت پر بھی پہنچ سکتے ہیں
جسے دنیا کا آٹھواں بلند ترین پہاڑ ہونے کا اعزاز حاصل ہے اور اس سفر کی
اہمیت کا اندازہ صرف چوٹیاں سر کرنے والے افراد ہی لگا سکتے ہیں-
اس وادی میں بےپناہ سفیدے٬ دیودر اور صنوبر کے درخت پائے جاتے ہیں لیکن بڑے
پیمانے پر ہونے والی جنگلات کی کٹائی نے اس مقام پر موجود جنگل کو بھی کافی
نقصان پہنچایا ہے-
|
|
صنوبر کے درختوں کا اس علاقے میں غلبہ ہے جبکہ راما میڈوز میں بڑی تعداد
میں سدا بہار سرسبز پودے بھی پائے جاتے ہیں جو کہ اس وادی کے حسن کو چار
چاند لگاتے ہیں-اور اسی ہریالی کے باعث موسمِ گرما میں یہ وادی ایک بہترین
تفریحی مقام کے طور پر اپنی خدمات سرانجام دیتی ہے-
راما میڈوز میں پائی جانے والی ایک خوبصورت جھیل جسے راما جھیل کے نام سے
جانا جاتا ہے٬ وادی استور سے 9 کلومیٹر کے فاصلے پر واقع ہے- یہ خوبصورت
جھیل اور یہاں کی تازہ ہوا کسی بھی شخص کو ہوش سے بیگانہ کرسکتی ہے-
|
|
Choungrah گاؤں سے راما جھیل تک پہنچنے کا راستہ بھی انتہائی دلکش ہے اور
یہاں کے خوبصورت نظارے بھی سیاحوں کو اپنے سحر میں جکڑ لیتے ہیں-
راما میڈوز میں دو قیام گاہیں موجود ہیں جن میں سے ایک پی ٹی ڈی سی نے حال
ہی میں تعمیر کی ہے جبکاہ دوسری فاریسٹ ڈپارٹمنٹ کی قائم کردہ ہے- اور اس
وادی میں تاروں بھرے آسمان کے ساتھ رات گزارنا اور کہکشاں کا حسین نظارہ
کرنا ہر سیاح کے لیے ہمیشہ کے لیے یادگار بن جاتا ہے-
|
|
اس کے علاوہ نانگا پربت پر غروبِ آفتاب کا شاندار نظارہ بھی یقیناً ہر سیاح
کی اولین ترجیح ہوتی ہے-
تفریح کے طور پر پیدل چلنے والوں اور پہاڑی چوٹیاں سَر کرنے کے شوقین افراد
کے لیے یہاں متعدد راستے موجود ہیں جو کہ نانگا پربت تک ان افراد کی رسائی
ممکن بناتے ہیں- غرض یہ کہ راما میڈوز ایڈونچر کے شوقین افراد کے لیے بھی
کسی جنت سے کم نہیں-
|
|
راما میڈوز ایک ایسا خوبصورت اور حسین مقام ہے جو آپ کو یہاں بار بار آنے
پر مجبور کرتا ہے- اس جگہ پر آپ اپنے خاندان کے ساتھ ایک بہترین وقت گزار
سکتے ہیں اور اس وقت کو ہمیشہ کے لیے ایک خوشگوار یاد میں تبدیل کرسکتے ہیں-
|
|