گھانا: جعلی امریکی سفارت خانہ پکڑا گیا٬ اصلی کہاں؟

حال ہی میں گھانا کے دارالحکومت اکرا میں ایک ایسا جعلی امریکی سفارت خانہ پکڑا گیا ہے جو گزشتہ 10 سالوں سے لوگوں کو ویزے جاری کر رہا تھا- دلچسپ بات یہ کہ جعلی امریکی سفارت خانے کے ویزے تو اصلی تھے لیکن غیر قانون طور پر حاصل کیے جارہے تھے-

یہ جعلی امریکی سفارتخانہ جرائم پیشہ افراد کا ایک منظم گروہ گھانا اور ترکی میں بیٹھ کر چلا رہا تھا- اس جعلی امریکی سفارت خانے میں کوئی بھی امریکی شہری ملازمت نہیں کرتا تھا بلکہ یہاں گھانا اور ترکی کے ایسے شہری ملازمت کرتے تھے جو انگریزی زبان پر عبور رکھتے تھے-

یہ عملہ لوگوں کو قائل کر کے ہزاروں ڈالر کے عوض جعلی دستاویزات پر ویزے فراہم کرتا تھا- ممکن ہے کہ لوگوں کا بھروسہ حاصل کرنے کے لیے جعلی سفارت خانے میں امریکہ کے سابق صدر باراک اوبامہ کی کوئی تصویر بھی آویزاں ہو-

یہ جعلی سفارت خانہ ایک گلابی رنگ کی دو منزلہ عمارت قائم تھا اور تعجب کی بات یہ ہے کہ اصلی امریکی سفارت خانہ بھی اسی شہر میں موجود ہے اور وہ ایک بہت بڑی عمارت میں قائم ہے- اصلی امریکی سفارت خانے کی عمارت کے گرد ہر وقت سیکورٹی گارڈ موجود رہتے ہیں-

جعلی امریکی سفارت خانہ ایک امریکی ویزے کی فیس 6 ہزار ڈالر وصول کرتا تھا- اور گھانا کے دیگر شہروں سے ویزے کے حصول کے لیے آنے والے خواہشمند افراد کو جعلی سفارت خانے کے قریبی ہوٹلوں میں ٹھہرایا بھی جاتا تھا-