سوشل میڈیا پر چند رویے آپ کے تعلقات خراب کرسکتے ہیں

ہمارے ہاں مختلف سماجی روابط کی ویب سائٹس مثلاً فیس بک، ٹوئٹر، انسٹاگرام، اسنیپ چیٹ، لنکڈ وغیرہ کا استعمال بہت تیزی سے پھیل رہا ہے- اس پھیلاؤ کی وجہ سے آج ہم اپنی روزمرہ زندگی کا بیشتر حصہ آن لائن رہ کر گزار رہے ہیں- اگرچہ سوشل میڈیا ویب سائٹس کے فوائد بھی ہیں لیکن ہمارا سوشل میڈیا پر بے انتہا وقت صرف کرنے والا رویہ ہمارے لیے نقصانات کا سبب بن رہا ہے- ضرورت اس بات کی ہے کہ ہم اپنی سوشل میڈیا کے حوالے سے اختیار کی جانے والی عادات یا رویوں کا جائزہ لیں کیونکہ چند رویے ہمارے تعلقات کو برے اثرات مرتب کرسکتے ہیں-

سوشل میڈیا پر غصے کا اظہار
بعض اوقات لوگ کسی عزیز٬ رشتے دار یا دوست کے خلاف اپنے غصے کا اظہار کھلے عام سوشل میڈیا پر تبصروں اور پوسٹ کی صورت میں کرنے لگتے ہیں- لیکن یاد رکھیں اس عمل سے آپ کو کچھ حاصل نہیں ہوتا بلکہ اس طرح آپ خود ہی مذاق کا نشانہ بن سکتے ہیں جبکہ آپ کے تعلقات ان لوگوں سے مزید خراب ہوسکتے ہیں- اس لیے آپ اپنے غصے کو کھلے عام سوشل نیٹ ورکنگ ویب سائٹس پر شئیر کرنے سے گریز کیجیے-

سوشل میڈیا کا استعمال کیوں؟
اس سوال کا جواب آپ کے لیے جاننا انتہائی ضروری ہے کہ آپ آخر سوشل میڈیا کا استعمال کیوں کرتے ہیں؟ سوشل میڈیا پر اپنی سرگرمیوں کا جائزہ ضرور لیں کہ یہ آپ کو کوئی فائدہ پہنچا رہی ہیں یا پھر وقت کا ضیاع ہے؟ ان ویب سائٹس پر ایک محدود وقت صرف کریں اور لوگوں کی موجودگی میں سوشل میڈیا کے استعمال کے بجائے لوگوں سے بات چیت کرنے کو ترجیح دیں- کہیں ایسا نہ ہو سوشل میڈیا کا زیادہ استعمال بھی آپ کو کوئی فائدہ نہ پہنچائے اور آپ اپنے دوستوں سے بھی دور ہوجائیں-

بغیر اجازت تصاویر کی شئیرنگ
اکثر صارفین میں یہ عادت پائی جاتی ہے کہ وہ ہر خاص موقع کی تصویر ضرور سوشل میڈیا پر شئیر کرتے ہیں جس میں بعض اوقات نہ صرف وہ خود بلکہ ان کے دوست یا رشتہ دار بھی دکھائی دے رہے ہوتے ہیں- لیکن اگر آپ بھی ایسا کرتے ہیں تو آپ کو چاہیے کہ پہلے اپنے ان دوست احباب سے اجازت طلب کرلیں جو تصویر میں آپ کے ساتھ دکھائی دے رہے ہیں- کیونکہ ممکن ہے آپ تو اپنی تصویر شئیر کرنا پسند کرتے ہوں لیکن آپ کے دیگر دوست احباب سوشل میڈیا پر اپنی تصاویر شئیر کرنے کے حوالے سے محتاط رویہ اختیار ہوتے ہوں- بغیر اجازت ایسی تصاویر سوشل میڈیا پر شئیر کرنا آپ کے تعلقات کو متاثر کرسکتا ہے-

اپنی ذاتی معلومات شئیر نہ کریں
بعض سوشل میڈیا صارفین اپنے ہر لمحے کی معلومات کو سوشل میڈیا پر ضرور اپ ڈیٹ کرتے ہیں٬ مثلاً اس وقت وہ کہاں ہیں؟ کس دوست یا عزیز کے ساتھ ہیں؟ یا پھر کیا کر رہے ہیں؟ یاد رکھیں کہ اس طرح اپنی ذاتی معلومات کا کھلے عام اظہار آپ کو نقصان پہنچا سکتا ہے اور یہ نقصان صرف آپ کو ہی نہیں آپ کے دوست یا عزیز کو بھی پہنچ سکتا ہے جس کی وجہ آپ بن سکتے ہیں؟ اس لیے اپنے تعلقات کو ترجیح دیں نہ کہ سوشل میڈیا پر اپنی ذاتی معلومات اپ ڈیٹ کرنے کو-

اعتدال کی ضرورت ہے
سوشل میڈیا پر وقت ضرور صرف کریں لیکن ایک حد سے زیادہ نہیں- سوشل میڈیا پر بہت زیادہ وقت صرف کرنا نہ صرف وقت کا ضیاع ہے بلکہ لوگوں سے دوری کا سبب بھی بن سکتا ہے- تاہم ہم یہ بھی نہیں کہتے کہ اس کا استعمال مکمل طور پر ترک کردیں کیونکہ یہ بھی معلومات میں کمی واقع ہونے کا سبب بن سکتا ہے- آپ کو چاہیے کہ سوشل میڈیا پر وقت صرف کرنے حوالے سے اپنی زندگی میں اعتدال قائم کریں اور اس کے لیے دن کا صرف ایک مخصوص حصہ مختص کریں-