بلی نماز پڑھ رہی ہے
(Muhammad Atif Imran, Chowk Azam, Layyah)
| ضرورت اس امر کی ہے کہ اندھی تقلید کرنے کی بجائے کسی بھی چیز پر یقین اور شیئر کرنے سے پہلے اس بات کو یقینی بنا لیاجائے کہ آیا یہ سچ ہے یا اس کی کوئی حثیت ہے بھی کہ نہیں۔ |
|
آیئے جناب،
سوشل میڈیا کی دنیا میں آپ کو خوش آمدید
سوشل میڈیا کی اس وسیع دنیا ،جہاں آپ کو کچھ کام کی باتیں ملے گی وہیں آپ
کو انواع اقسام کی خرافات کا بھی سامنا کرنا پڑے گا۔ یہاں آپ کو کبھی کوئی
بلی کسی ویڈیو میں نماز پڑھتی نظر آئے گی، کبھی کوئی پرندہ سجدہ کرتا
دکھائی دے گا۔
کبھی خانہ کعبہ کے اوپر ایک فرشتہ نمودار ہوگاجو خود بیت اللہ میں کسی کو
دکھائی نہیں دے گامگر ہم فیس بکی مسلمانوں کو نظر آئے گا۔
کبھی مائیکل جیکسن زین بھائی کی آواز میں مشہور انگریزی حمد (Say thanks to
ALLAH) گا رہاہوگا اور سب اندھا دھند سبحان اللہ سبحان اللہ کہہ رہے ہوں
گے۔
یہیں کہیں کسی پوسٹ پوسٹ میں آپ کو حضرت عائشہ رضی اللہ عنہاکی سلائی مشین
بھی دکھائی دے گی،
کیا کہا نہیں نظر آئی؟؟
ارے بھائی سبحان اللہ اور ماشااللہ کے کمنٹس ہٹا کر دیکھیں یہیں کہیں پائی
جائے گی۔
فیس بکی دنیا میں ہی کبھی کسی دیوار یا صفحے کی کھدائی کریں تو یہ بات بھی
آپ کے علم میں آئے گی کہ مشہور خلا باز نیل آرم اسٹرانگ جب چاند پر گئے تو
انہیں وہاں صرف ایک آواز سنائی دی جو کہ اذان کی آواز تھی اور انہوں نے
چاندسے واپسی پر فی الفور اسلام قبول کرلیا۔
اب اس تفصیل میں کون جائے کہ چاند پر فضا (Atmosphere) زمین جیسا نہیں اور
وہاں آواز سنائی نہیں دیتی ، نہ ہی کوئی اس تحقیق میں پڑے گا کہ اس امریکی
خلا باز کے چاندپر جانے اور نہ جانے کے بارے میں بھی دو رائے ساتھ ساتھ
ہیں۔
کبھی بدھوں کے عظیم رہنما دلائی لاما ہمارے حضور پاک صلی اللہ علیہ وسلم کی
عظمت کا اعتراف کرتے ہیں اور کہتے ہیں کہ اسلام امن کا دین ہے تو ہم اپنا
ذہنی توازن کھو بیٹھتے ہیں اور کہتے ہیں کہ اس ویڈیو کو اتنا شیئر کرو کہ
تمام مسلمانوں کو اس بات کا یقین ہوجائے۔
کوئی مجھے یہ بتائے کہ ہمارے عقیدے اس قدر کمزور کیوں ہیں کہ ہمیں محمد صلی
اللہ علیہ وسلم کی ذات اقدس کی عظمت کی گواہی ان غیر مسلموں سے لینی پڑے
گی؟
یہیں آپ کو سچے اور پکے مسلم بھائیوں کی طرف سے پیش کی گئی وہ پوسٹ بھی نظر
آئے گی کہ اگر آپ نے اگے شئیر نہ کی تو آپ دائرہ اسلام سے خارج ہوجائیں
گےاور اگر ماشااللہ اور سبحان اللہ نہ کہا گیا تو آپ دنیا کے سب بڑے کنجوس
کہلائے جائیں گے یا پھر لعنتی قرار دیئے جائیں گے۔
اللہ کے بندوکچھ تو زور اپنے ذہن پر بھی ڈالا کرو کہ اسےزنگ نہ لگ جائے،اس
بات سے کسے انکار ہے کہ اللہ کی یہ مخلوق چرند پرند سب اس کی حمد میں مصروف
ہیں مگر ان کا طریقہ ہم سے مختلف ہے، نماز ہم پر فرض ہے نہ کہ ان بلیوں پر
جنہیں مسلمان بنانے کی تگ ودو میں آپ لگے ہوئے ہیں۔
کسی چیز کو شیئر کرنے یا نہ کرنے سے لوگ کافر ہونے لگیں تو ہوگیا کام ، ہم
تو دائرہ اسلام سے خارج قرار پائیں گے پھر۔ |
|