دنیا کے سب سے بڑے طیارے کو پرواز سے روک دیا گیا

دنیا کے سب سے بڑے طیارے کی پرواز آخری لمحات میں ملتوی کردی گئی- گزشتہ روز دنیا کے سب سے بڑے ہوائی جہاز The Airlander 10 کو پہلی مرتبہ تجرباتی طور پر اڑایا جانا تھا تاہم آخری منٹ میں چند تکنیکی وجوہات کی بنا پر اسے اڑنے سے روک دیا گیا-

درحقیقت اس جہاز کو تجرباتی طور پر صرف دن کی روشنی میں اڑایا جانا تھا لیکن آخری لمحات میں ماہرین کو محسوس ہوا کہ شاید یہ جہاز دن کی روشنی میں اپنی پرواز مکمل نہ کرسکے اور اس سے قبل ہی اندھیرا پھیل جائے-

اس جہاز کی آزمائشی پرواز کا آغاز Bedfordshire کے علاقے Cardington Airfield سے ہونا تھا تاہم ماہرین نے انہی حفاظتی اقدامات کی بنیاد پر جہاز کو پرواز کرنے سے روک دیا- البتہ ابھی تک یہ نہیں بتایا گیا کہ اب یہ جہاز اپنی آزمائشی پرواز کب کرے گا؟

دنیا کے اس سب سے بڑے طیارے کی لمبائی 92 میٹر ہے جو کہ کسی بھی بڑے مسافر بردار طیارے کی لمبائی کے مقابلے میں 15 میٹر زائد ہے-