ٹیکنالوجی اور ہماری نئی نسل٬ حیران کن حقائق

“ یہ تم کیا ہر وقت فیس بک پر لگے رہتے ہو کبھی پڑھ بھی لیا کرو “! آپ نے اکثر والدین کو ایسی باتیں اپنے بچوں سے کہتے سنا ہوگا- یہی نہیں آج کل کے بچے انٹرنیٹ پر آن لائن گیمز اور سوشل میڈیا ویب سائٹس سے محظوظ ہوتے رہتے ہیں اور ماں باپ ان کی اس عادت سے سخت بیزار نظر آتے ہیں- یہ ٹیکنالوجی کا جادو ہے جو سر چڑھ کر بول رہا ہے اور ہماری نوجوان نسل کو اپنی گرفت میں لے چکا ہے- ناشتہ کرتے ہوئے بھی فیس بک پر اسٹیٹس اپ ڈیٹ کرنا ضروری ہوچکا ہے- غرض یہ کہ آج کل کے بچوں کا اوڑھنا بچھونا ٹیکنالوجی مصنوعات کے اردگرد گھومتا ہے-
 

ایک زمانہ تھا جب بچے ہوم ورک سے فارغ ہو کر برف پانی٬ چھپن چھپائی اور چور سپاہی جیسے کھیلوں سے لطف اندوز ہوتے تھے مگر آج کل ان سب کی جگہ کینڈی کرش نے لے لی ہے- کچھ دن قبل ایک واقعہ جو نظر سے گزرا تو اس نے بہت کچھ سوچنے پر مجبور کردیا- واقعہ کچھ یوں ہے کہ “ ایک 3 سالہ بچہ جسے بہلانے کے لیے ٹی وی پر کارٹون لگا کردیے گئے مگر اس بچے نے کارٹون میں کسی قسم کی دلچسپی کا مظاہرہ نہیں کیا کیونکہ اس کی دلچسپی کا محور موبائل فون تھا- بچے نے بستر پر پڑا موبائل فون اٹھایا٬ کی پیڈ کھولا اور اپنا مطلوبہ گیم کھیلنے میں مصروف ہوگیا“- کیا کوئی سوچ سکتا ہے کہ صرف 3 سالہ بچہ ایسے آرام سے موبائل فون استعمال کر سکتا ہے؟ ٹیکنالوجی نے سب کچھ ممکن بنا دیا ہے-

بچوں کی پرورش میں ٹیکنالوجی کا کردار:
اس دور میں ٹیبلٹس٬ اسمارٹ فون اور لیپ ٹاپ ہماری زندگی کا اہم جز بن چکے ہیں اور ہمارے بچوں کی پرورش میں اہم کردار ادا کر رہے ہیں- تحقیق کے مطابق بچے دن کے تقریباً 8 گھنٹے ٹیکنالوجی پر صرف کردیتے ہیں- پریشانی کی بات یہ ہے کہ زیادہ تر ماں بات “ آن لائن گیمنگ “ کو بچوں کی سب سے پختہ عادت سمجھتے ہیں- افسوس بیشتر ماں باپ اپنے بچوں پر انٹرنیٹ استعمال کرتے ہوئے نظر نہیں رکھتے-