مصری صحرا جہاں لوگ زندہ دفن ہوتے ہیں

مصر میں جولائی سے لے کر ستمبر گرم موسم اپنے عروج پر ہوتا ہے اور ان گرم ترین مہینوں میں لوگوں کی ایک بڑی تعداد مغربی مصر میں واقع ایک صحرا کا رخ صرف وہاں زندہ دفن ہونے کے لیے کرتی ہے- یہ لوگ اتنا تکلیف دہ عمل کیوں کرتے ہیں؟ وجہ جان کر آپ بھی حیران رہ جائیں گے-

جی ہاں Siwa نامی اس صحرا میں لوگوں کو 15 منٹ کے لیے گرم ترین ریت کے نیچے دبا دیا جاتا ہے اور اس عمل کو Hot Sand Bath کہا جاتا ہے-

درحقیت یہ ایک طریقہ علاج ہے جو کہ تین سے پانچ دن پر مشتمل ہوتا ہے اور یہ علاج شدید گرمی کے دوران کیا جاتا ہے-

مقامی ڈاکٹروں کا دعویٰ ہے تین سے پانچ دن تک باقاعدگی کے ساتھ ریت کے نیچے دفن ہونے سے مریض گٹھیا٬ جوڑوں کے درد٬ بانجھ پن اور دیگر مردانہ امراض سے نجات حاصل کرنے میں کامیاب ہوجاتا ہے-

یہ حیرت انگیز طریقہِ علاج Dakrror نامی پہاڑ کے قریب واقع ایک بستی کے مقامی افراد کا تخلیق کردہ ہے- یہ پہاڑ لیبیا کی سرحد کے مشرق میں 50 کلومیٹر کے فاصلے پر واقع ہے-

صحرا میں آنے والے مریضوں گرم ریت کے نیچے دفنانے کا عمل اس وقت شروع کیا جاتا ہے جب سورج آسمان پر اپنی پوری آب و تاب کے ساتھ موجود ہوتا ہے اور ہوا بھی انتہائی گرم ہوتی ہے- اس وقت مریض کا صرف چہرہ اور سر ریت سے باہر ہوتے ہیں جبکہ باقی تمام جسم ریت کے اندر ہوتا ہے-

مریض کو ریت میں دفن کرنے اور واپس باہر نکالنے کے لیے صحرا میں باقاعدہ تجربہ کار افراد موجود ہوتے ہیں-

یہ ماہر افراد مریض کو 15 منٹ کے لیے دفن کرنے کے بعد واپس باہر نکالتے ہیں اور تیزی کے ساتھ قریبی خیمے میں پہنچا دیتے ہیں جو انہی مریضوں کے لیے تیار کیے جاتے ہیں-

تین سے 5 روز پر مشتمل اس علاج کے دوران مریضوں کو نہانے اور ٹھنڈی ہوا میں بیٹھنے کی اجازت نہیں ہوتی- وہ صرف گرم مشروب اور گرم غذائیں کھا سکتے ہیں- علاج کے آخری دن مریض کو آرام پہنچانے کے لیے اس کا تیل اور سرکہ سے مساج کیا جاتا ہے-

اس طریقہ علاج پر آنے والی ایک دن کی لاگت 38 سے 51 ڈالر ہوتی ہے جس میں رہائش اور کھانا پینا بھی شامل ہے- سال 2011 سے قبل علاج کے لیے بین الاقوامی سیاح بھی اس صحرا کا رخ کرتے تھے لیکن سیاسی اتار چڑھاؤ اور حالات کی خرابی کے باعث بیشتر سیاحوں نے مصر آنا چھوڑ دیا ہے-

علاج کے لیے مختص کارکن مریض کو ریت میں دفنانے کے بعد اس کے کندھوں کو اپنے پاؤں کے ذریعے دباتے ہیں اور یہ ایک طرح کا مساج ہوتا ہے-

یہ کارکن مریض کے مکمل جسم کو ریت سے ڈھک دیتے ہیں اور ریت سے نکالنے کے بعد مریض کے جسم کو ایک کمبل میں ڈھانپ کر قریبی خیمے میں منتقل کرتے ہیں جہاں مریض کچھ وقت آرام کرتا ہے-

ان خیموں میں مریضوں کو جڑی بوٹیوں سے تیار کی جانے والی چائے پیش کی جاتی ہے- جس کے بعد مریض اپنی کار میں جا بیٹھتا ہے لیکن اس وقت بھی مریض کا جسم کمبل سے ڈھکا رہتا ہے-