اِک ذرا سکردو تک۔۔۔ ( سفرنامہ)

ایک عرصے تک گلگت اور بلتستان کے عوام کے درمیان سماجی دوریاں پائی جاتی تھیں لیکن اب یہ نہایت خوشی کی بات ہے کہ وقت کے ساتھ ساتھ ان دوریوں کا خاتمہ ہورہا ہے۔اب جہاں دونوں طرف فاصلے کم ہو رہے ہیں وہاں گلگت اوربلتستان کے اہلِ قلم کے مابین قربتیں بھی بڑھ رہی ہیں ۔گلگت اور بلتستان کے اہلِ قلم کے درمیان محبت و بھائی چارگی کی فضا قائم کرنے میں حلقہ ارباب ذوق اور بزمِ و علم و فَن سکردو کا نہایت اہم کردار ہے خصوصاََ بزمِ علم و فَن سکردو کے صدر اسلم حسین سحرؔ کی کاوشیں نہایت قابلِ ستائش ہیں کہ جس میں وہ محافل کا انعقاد کرکے گلگت اور بلتستان کے اہلِ قلم کو مِل بیٹھنے کا موقع فراہم کرتے ہیں ۔حال ہی میں حلقہ ارباب ِذوق گلگت کے شعرا ء نے بزمِ علم و فَن سکردو کے صدر اسلم حسین سحرؔ کی دعوت پر بلتستان کا دورہ کیا۔جس کی روداد پیشِ خدمت ہے ۔

۱۹ مارچ ۲۰۱۴ ء کا جمعرات نہایت خوشگوار تھا۔بس سٹینڈجٹیال گلگت لکھنو کے کسی چوراہے کا منظرپیش کر رہا تھا کیونکہ چار سُو حلقہ اربابِ ذوق اور انجمن فکر و سخن نگر کے شعراء نظر آرہے تھے ۔اور رختِ سفر باندھے تیار تھے۔حلقہ اربابِ ذوق کے سینئر نائب صدر عبد الخالق تاج ؔکے ہمراہ نوجوان شاعر آصف علی آصفؔ اور راقم جب بس سٹینڈ پہنچے تو حلقہ اربابِ ذوق کے نائب صدر خوشی محمد طارقؔ‘جنرل سیکریٹری جمشید خان دکھیؔ‘غلام، عباس نسیم‘ؔاسماعیل ناشاد‘ شاہ جہان مضطرؔ‘فاروق قیصر اور امجد علی ساغر ؔکو منتظر پایا۔لیکن حیرت کی بات تو یہ تھی کہ تاحال کسی گاڑی کا انتظام نہیں کیاگیا ۔تاجؔ‘دکھیؔاور نسیم ؔصاحب گاڑی کا بندو بست کرنے کے لیے نیٹکو بکنگ آفس چلے گئے ۔آدھے گھنٹے کا وقت گزر گیا جبکہ نوجوان شعراء بے چینی سے سینئر شعراء کا انتظار کر رہے تھے ۔کوئی اخبار پڑھنے میں مگن توکوئی موبائیل فون پر محوِگفتگو تھااور کچھ شعراء سگر یٹ سلگا کر اپنی بے چینی کو کم کرنے کی کوشش کر رہے تھے اتنے میں سینئر شعراء نے آکر خطیبانہ انداز میں گاڑی کے انتظام ہونے کا مژدہ سنا دیا۔

تھوڑی دیر بعدحلقہ ارباب ِذوق کا قافلہ سینئر نائب صدر کی سربراہی میں سکردو روانہ ہوا۔تاجؔ صاحب ہاتھ میں ستار لیے فرنٹ سِیٹ پر جلوہ افروز تھے۔تاجؔ صاحب کے ساتھ سفر کرنے کا تجربہ پہلے بھی تھا اور ان کے ساتھ سفر نہایت خوشگوار گزرتا ہے کیونکہ تاجؔ صاحب کو گلگت بلتستان خصوصاََ حلقہ اربابِ ذوق کے زیرِاہتمام ہونے والی محافل کی رونق تصور کیا جاتا ہے اور موصوف محافل میں طنزومزاح کی ایک ایسی روح پھونک دیتے ہیں کہ محفل میں شرکت کرنے والا سنجیدہ سے سنجیدہ شخص بھی کھلکھلا کر ہنسنے پر مجبور ہو جاتا ہے۔
بقول تاج
ہم نہ ہونگے تو پھر ہمارے بعد
محفلیں خوشگوار کون کرے
 

سفر پر روانگی کے آدھے گھنٹے کے گزرنے تک ہر شاعر نے چپ کا روزہ رکھا ہوا تھا اور گاڑی میں شہرِ خموشاں سی خاموشی چھائی تھی۔آکرکار جب عالم برج پر پہنچے تو دکھیؔ نے چپ کا روزہ توڑتے ہوئے گلگت بلتستان کی صوبائی حکومت کی کارکردگی پر تبصرے کا آغاز کیا اور اس موضوع پر خوشی محمد طارق ‘غلام عباس نسیم اور نوجوان شعراء کے مابین بحث ومباحثہ ہوتا رہا۔کچھ دیر بعد گاڑی میں پھر سے خاموشی طاری ہو گئی اور شعراء باہر کے مناظر سے محظوظ ہو نے لگے۔گاڑی جب حراموش کے مقام پر پہنچی تو غلام عباس نسیم ؔ نے ماضی میں اپنے پیشہ ورانہ امور کی انجام دہی کے دوران حراموش میں گزارے دنوں کی یادوں پر جمی گرد کو جھاڑتے ہوئے طنزومزاح سے بھرپور قصے سنائے۔جس کے بعد گاڑی میں طنزومزاح کاایک خوبصورت ماحول پیداہوا جبکہ قافلے کے روح ِرواں تاجؔ صاحب ہاتھ میں سِتار لیے سرگوشیوں میں کوئی دُھن گنگنارہے تھے جیسے کسی ویرانے میں ندی بہہ رہی ہو۔

ہماری گاڑی سکردو روڑ کی پُر خطر گھاٹیوں سے گزرتی ہوئی اپنی منزل کی جانب رواں دواں تھی جبکہ شعراء خاموشی سے سے باہر کے مناظر سے محظوظ ہو رہے تھے۔دریائے سندھ اپنی سمت خاموشی سے گزر رہا تھا جیسے انسانی رگوں میں خون گردش کر رہا ہو۔آسمان کو چھوتے ہوئے بلند وبالاپہاڑ برف کی چادر اوڑھے قدرتی مناظر میں مزید دلکشی پیدا کر رہے تھے جبکہ آبشار اپنے اپنے گیت گا رہے تھے اور شگوفے جھوم رہے تھے ۔اس طلسمی منظر کو دیکھ کر نگاہ پہاڑوں کے پیچ وخم میں مقید ہوکر رہ جاتی تھی ۔

تین گھنٹے کی صبر آزما سفر کے بعد ہمارا قافلہ استک نالہ پہنچا جہاں دکھی ؔ‘طارقؔاور نسیم ؔ نے گاڑی سے اترکر ہی نماز پڑھنے کے لیے پانی کی تلاش شروع کر دی جبکہ صلوٰۃ گریز شعراء جن کے سرپرست اعلٰی بھی تاجؔ صاجب ہی تھے ہوٹل کے باغیچے میں ٹہلنے لگے ۔استک نالہ ہوٹل میں کھانے کے برتن جتنے چھوٹے تھے اُن میں دال کے دانوں کی تعداد بھی اتنی ہی کم تھی اور با آسانی گنے جا سکتے تھے بہر حال شعراء نے پیٹ پوجا کی خاطر خوب شکم سیر ہوکر کھایا اور دوبارہ سفر پر روانہ ہوئے ۔ڈیڑھ گھنٹے کے اعصاب شکن سفر کے بعدجب فاریسٹ فارم ہاوس ڈموداس پہنچے تو ادارے کی طرف سے قافلہ عشق کے لیے چائے پانی کا انتظام کیا تھا ۔خیر ادارہ جنگلات کے عہدیداران نے خوب خاطر وتواضح کیا ۔کچھ سفر طے کرنے کے بعد جب ہمارا قافلہ ایوب پُل سے گزرا جو خوبصورت انداز میں دریائے سکردو کے آر پار جھولے کی طرح جھول رہا تھاتو تاجؔ صاحب کے موبائیل فون پر ایک کال موصول ہوئی اور تاجؔ کا چہرہ مسکراہٹ سے کھلکھلااٹھا۔فون سکردو کے نامور شاعر احسان علی دانش ؔ کا تھا جو ہمارے جائے سفر دریافت کر رہے تھے جس پر تاجؔ اور دانش کے مابین طنزومزاح سے بھرپور مکالموں کا تبادلہ ہوا لیکن وہ کلمات بیان کرنے کے قابل نہیں ہیں۔

ہمارا قافلہ سکردو شہر کے حدود میں داخل ہو چکا تھا اور باہر کے مناظر اپنے اندر ایک طلسمی کشش رکھتے تھے۔دور دور تک وسیع و عریض مگر ویران میدان پھیلے ہوئے تھے جو کسی نخلستان کے ٹکڑے کا منظر پیش کر رہے تھے جبکہ روڑ کے دونوں جانب بلند و بالا درخت ایستادہ تھے اور درخت کی سر سبز ٹہنیاں زمین کی جانب ایسے جُھکی ہوئی تھیں جیسے آنے والوں کو خوش آمدید کہہ رہی ہوں اور کچھ درخت جواں سالہ بیوہ کاوجود دکھ رہے تھے۔

کیڈٹ کالج سکردو پہنچ کر ایک دفعہ پھر رُکے چونکہ تاج ؔ صاحب کے پوتے اَمر تاج اورگلگت کے طلباء جو کیڈٹ کالج میں زیرِ تعلیم تھے سے ملاقات کرکے جانا تھا۔طلباء سے ملاقات کے بعد ہم اپنی منزل یعنی بلترو ریسٹ ہاوس کی جانب روانہ ہوئے۔تھوڑی دیر بعدجب بلترو ریسٹ ہاوس پہنچے تواحسان علی دانش پریشان چوک پرؔیشان کھڑے تھے جبکہ فرمان علی خیال ؔبھی ان کے ہمراہ تھے۔ریسٹ ہاوس میں ہمارے کمروں کا پہلے ہی انتظام ہو چکا تھا لٰہذا شعراء اپنے اپنے کمروں میں چلے گئے۔بلترو ریسٹ ہاوس میں رات کھانے کے بعدایوانِ اقبال میں محفلِ مشاعرے میں شرکت کے لیے جانا تھا ۔اتنی طویل صبر آزما اور کھٹن سفرکے بعد بغیر آرام کے محفلِ مشاعری میں شرکت کرنا نہایت مشکل لگ رہا تھا لیکن ایوانِ اقبال پہنچے توجشنِ نوروز و محفلِ مشاعرے کے حوالے سے سخن شناس اہلیانِ سکردو کا جوش و جذبہ اور محفل کی دلکشی دیکھ کرتھکاوٹ کافور ہوگئی۔اس محفل میں مہمانوں کی یومِ نوروز کی مناسبت سے تیار کردہ انڈے جن پرمختلف رنگوں سے خوبصورت انداز میں مختلف نقوش نقش کیے گیے تھے پیش کیے گئے اور بلتستان کے دیگر روایتی کھانوں سے خاطر تواضح کیا گیا۔محفل نہایت شاندار تھی اور گلگت و بلتستان بھر سے آئے ہوئے شعراء نے بلتی اور اردو میں اپنا کلام پیش کرکے سامعین سے خوب داد حاصل کیا۔اس محفل کے مہمان خصوصی وزیر اعلٰی سید مہدی شاہ تھے اور محفلِ مشاعرے کے اختتام پر بلتی سٹیج ڈرامہ پیش کیا گیامحفل کے اختتام پر ہمارا قافلہ دوبارہ بلترو ریسٹ ہاوس پہنچا اور شعرا ء آرام کی غرض سے اپنے اپنے کمروں میں چلے گئے۔

صبح دس بجے کے قریب نوجوان شاعر فاروق قیصرؔکے کمرے کے دروازے پر دستک کی آواز پرراقم کی آنکھ کھلی۔اور ناشتے کے لیے چلے گئے۔ناشتے کی میز پرہمارے ساتھ سکردو کے نامور شعراء بھی موجود تھے جو ہمارے ساتھ ملاقات کے لیے آئے تھے جن میں اسلم حسیں سحرؔ‘ عاشق حسین عاشق ؔ‘رضا بیگ گھا ئل ؔ‘عباس جراء ت اور دیگر شامل تھے اور یہ سکردو کے شعراء کے ساتھ ایک اچھی نشست رہی۔
ناشتے کے بعد تاجؔ صاحب اپنے پوتے سے ملنے کیڈٹ کالج چلے گئے ۔چونکہ جمعے کا دن تھا دکھی ؔ ؔ‘طارق ؔاورنسیم ؔصاحب نماز کی تیاری کرنے لگے جبکہ نمازوں کے ڈیفالٹر شعراء نے احسان علی دانش ؔ کے ہمراہ شوقِ آوارگی سے مجبور شہر کے بازار میں گھومنے پھرنے کے لیے جانے کا ارادہ کیاجن میں آصف علی آصفؔ‘فاروق قیصر اور راقم شامل تھے۔تاہم دانش ؔنے سفرِآوارگی کی شروعات میں ہی صرف اوقات ِنماز کے شروع ہونے تک ہی ہم سفر رہنے کا برملا اظہار کیا۔سکردوشہر کے بازار کی تھوڑی سی خاک چھاننے کے بعددانش ؔمعذرت کے رسمی کلمات کے ساتھ نمازِ جمعہ پڑھنے کے لیے چلے گئے جبکہ ہمارے حلقہ آوارگان نے بلترو ریسٹ ہاوس واپس جانے کو ہی عافیت جانا۔ریسٹ ہاوس پہنچ کرکچھ دیر گزرنے کے بعدبانمازی شعراء کی آمد کا سلسلہ شروع ہوا۔نسیم ؔ صاحب سب سے پہلے پہنچے اُن کے بعد دکھی ؔاور طارق ؔ جبکہ آخر میں دانش ؔپہنچے جبکہ ہم ایک ایک کر کے اُن کو ایسے خوش آمدید کہہ رہے تھے جیسے کچھ ججاج کرام جج کافریضہ ادا کر کے آئے ہوں۔اتنے میں تاج ؔ صاحب بھی پہنچے قارئین کے ذہن کے کسے گوشے میں یہ خوش فہمی پیدا ہو کہ شاید تاج ؔبھی نماز پڑھ کر واپس آئے ہوں لیکن مجھے نہایت افسوس کے ساتھ کہنا پڑ تا ہے کہ آپ کی خوش فہمی سراسر غلط فہمی پر مبنی ہے۔
دوپہر کے کھانے کی میز پر شعراء اپنے اپنے لائمہ عمل کااظہار کر رہے تھے نسیم ؔ‘دکھی ؔاور طارق صاحب کا آرام کرنے کا ارادہ تھا۔اس سفر میں طارق ؔصاحب کی ذات کے حوالے سے ہمارے اوپر یہ حقائق آشکار ہوئی کہ موصوف کرکٹ کھیل کے جنونی مدّاح ہیں جبکہ جدید ٹیکنالوجی خصوصاََ موبائیل فون اور انٹرنیٹ کی دنیا کے حوالے سے اُن کی معلومات کا ذخیرہ دیکھ کر راقم دنگ رہ گیا۔چونکہ اس دن پاکستان بمقابلہ انڈیا میچ تھا تو طارق صاحب تھوڑی سی آرام کے بعد میچ دیکھنے کا ارادہ رکھتے تھے۔کھانے کے بعد سارے شعراء اپنے اپنے کمروں میں چلے گئے۔

شام کا سمے تھا۔اندھیرا اپنے پرَ کھول رہا تھا راقم نے اپنی قوتِ سماعت پرتھوڑا سا زور دیا توبلترو ریسٹ ہاوس کی فضاؤں میں ایک سحر انگیزدُھن گونج رہی تھی۔جیسے کسی پرستان کا طلسمی منظرہو۔راقم نے جب اس دُھن کا تعاقب کیا تو میرے قدم تاج ؔ صاحب کے کمرے کے دروازے پر جاکر رک گئے۔کسی سفر میں تاج ؔصاحب کا ساتھ ہو اور قبیلہ عشق کی محفلیں نہ جمیں یہ بھلا کیسے ہوسکتا ہے۔راقم جب تاج ؔکے کمرے میں داخل ہواتوموصوف بغل میں سِتار لیے ایسے بیٹھے تھے جیسے مرغی اپنے بچوں کو اپنے پَروں میں چھپا لیتی ہیں اور جب تاج کی انگلیوں کی پوریں سِتار کے تاروں کو چھوتی تھیں تو فضاؤں میں ایک سحرانگیزلَے تیرتی تھی۔محفل میں تازگی و سرور کی لہر رواں دواں تھی اور نوجوان شعراء امجد علی ساغر اورفاروق قیصر اِن سحر انگیز دُھنوں پر جھوم رہے تھے جیسے کسی پیر کے مریداپنی دُھن میں محوِرقصاں ہوں اس محفل کا اختتام مغرب کی اذان پر ہوا۔