ایسے طالبعلم جو دوسروں کے لیے مثال ہیں

ذہانت کسی کی میراث نہیں ہوتی٬ یہ قدرت کا حسین تحفہ ہے- دنیا میں بہت سے ذہین افراد موجود ہیں جو اپنی ذہانت سے نہ صرف کامیابیاں حاصل کرتے ہیں بلکہ دنیا میں ایک منفرد مقام بھی حاصل کرنے میں کامیاب ہوجاتے ہیں- ایسے چند ذہین طالبعلموں سے آج ہم آپ کو ملوائیں گے جنہوں نے تعلیم کے میدان میں نمایاں کامیابی حاصل کر کے اپنے والدین اور اساتذہ کا سر فخر سے اونچا کردیا- گزشتہ روز کراچی میٹرک بورڈ نے سائنس و جنرل گروپ کے سالانہ امتحانات 2015 کے نتائج کا اعلان کیا- ہماری ویب نے ان نتائج میں کامیابی حاصل کرنے والے چند سائنس گروپ کے طلبہ سے خصوصی بات چیت کی- کیا کہتے ہیں یہ پوزیشن ہولڈرز آئیے جانتے نہیں-

سب سے پہلے ہم بات کریں فرسٹ پوزیشن حاصل کرنے والی خوش نصیب طالبہ انوشہ اصغر سے- انوشہ نے 850 میں سے 789 نمبر لیے اور یوں اے ون گریڈ حاصل کیا-

ہماری ویب: اسکول کا نام؟
انوشہ اصغر= آکسفورڈ اسلامک سائینٹیفک اسکول٬ گولڈن ٹاؤن

ہماری ویب: پوزیشن حاصل کرنے پر کیا احساسات ہیں؟
انوشہ اصغر= بہت زیادہ خوشی ہے اور اﷲ تعالیٰ کا بہت شکر ادا کرتی ہوں کہ مجھے پوزیشن ملی-

ہماری ویب: آپ نے اس سے پہلے کبھی کوئی پوزیشن حاصل کی ہے؟
انوشہ اصغر= نویں کلاس میں اسکول میں میری سیکنڈ پوزیشن تھی-
 

ہماری ویب: ہمیشہ خود سے پڑھائی کی یا پھر کوچنگ بھی جوائن کیا؟
انوشہ اصغر= خود ہی پڑھتی ہوں اور یہ میری ٹیچرز کی محنت ہی ہے-

ہماری ویب: اکثر طالبعلم میٹرک سائنس سے کرنے کے بعد مستقبل میں کسی دوسرے مضمون کا انتخاب کرلیتے ہیں کہ وہ آسان ہے- آپ کی کیا رائے ہے اس بارے میں؟
انوشہ اصغر= میں سمجھتی ہوں کہ آئندہ بھی سائنس ہی کا انتخاب کرنا چاہیے تاکہ اپنے ملک کے لیے کچھ کیا جاسکے- اگر ہم خود ہی اپنے ملک کے لیے کچھ نہیں کریں گے تو دوسرے بھی نہیں کریں گے-

ہماری ویب: تعلیم میں کامیابی کے لیے والدین کے کردار کو کس طرح دیکھتی ہیں؟
انوشہ اصغر= والدین کی سپورٹ کے بغیر تو یہ ممکن ہی نہیں ہے- یہ انہی کی دعاؤں کا نتیجہ ہے کہ میں آج اس مقام پر ہوں-

ہماری ویب: آئندہ کس مضمون کے انتخاب کا ارادہ رکھتی ہیں؟
انوشہ اصغر= میڈیکل جوائن کروں گی-

ہماری ویب: انٹرنیٹ کے استعمال کو طالبعلموں کے لیے کیسا سمجھتی ہیں؟
انوشہ اصغر= اگر مفید مقصد کے لیے استعمال کیا جائے تو اچھا ہے لیکن اگر طالبعلم غلط کاموں کے لیے استعمال کریں گے تو ظاہر ہے کہ اثرات بھی غلط ہی ہوں گے-

ہماری ویب: آپ دوسرے طالبعلموں کو تعلیم میں نمایاں کامیابی حاصل کرنے کے لیے کیا پیغام دیں گیں؟
انوشہ اصغر= جتنی زیادہ سے زیادہ سخت محنت کرسکیں کریں- مشکلات کا سامنا کر کے ہی آگے بڑھا جاسکتا ہے-

اب ہم بات کریں گے سیکنڈ پوزیشن حاصل کرنے والی خوش قسمت طالبہ منیبہ طالب سے- منیبہ نے 850 میں 787 نمبر حاصل کر کے اے ون گریڈ اپنے نام کیا-

ہماری ویب: اسکول کا نام؟
منیبہ طالب= آکسفورڈ اسلامک سائینٹیفک اسکول٬ گولڈن ٹاؤن

ہماری ویب: پوزیشن حاصل کرنے پر کیا احساسات ہیں؟
منیبہ طالب= بہت زیادہ خوشی محسوس ہورہی ہے- اﷲ تعالیٰ کا بہت شکر ہے-