صحت اﷲ کی امانت ہے

صحت اﷲ کی امانت ہے۔ لہٰذا اس امانت کی حفاظت کرنا ہر مسلمان کیلئے اس کے ذاتی فائدہ کے علاوہ اس کا دینی فریضہ بھی بنتا ہے۔ اور صحت کے بارے میں لا پرواہی ایک لحاظ سے امانت میں خیانت کے مترادف ہوگی۔ صحت کی حفاظت کے بارے میں ہزاروں حکماء، ڈاکٹروں اور فلاسفروں کے اقوال موجود ہیں۔ مگر ہمارے لئے اصول ہمارے نبی پاک حضرت محمد ﷺ نے چھوڑے ہیں۔ جن پر عمل کر کے ہم اچھی صحت برقرار رکھ سکتے ہیں۔ اور بہت سی بیماریوں سے بچ سکتے ہیں۔ صفائی کی اہمیت نبیﷺ کے اس فرمان سے واضح ہوتی ہے۔کہ " صفائی نصف ایمان ہے"۔ یعنی صفائی کے بغیر مومن کا ایمان مکمل نہیں ہوتا۔ صحت کی حفاظت کے چیدہ چیدہ اصولوں میں جسمانی صفائی، ذہنی پا کیزگی، ماحولیاتی صفائی، صحت مند عادات، صحت بخش خوراک اور بر وقت علاج شامل ہیں۔

جسمانی صفائی:۔
ہماری فضا میں خصوصاً شہری علاقوں میں ہر وقت مختلف قسم کے کیمیکل، جراثیم اور وائرس موجود ہوتے ہیں۔ با قاعدگی سے غسل نہ کرنے کی صورت میں یہ ہمارے بدن پر جمع ہو کر خارش اور دیگر جلدی امراض اور الرجی پیدا کرتے ہیں۔ بعض اوقات یہ جراثیم جسم کے نازک حصوں مثلاً بغل میں زخم بھی پیدا کرتے ہیں۔ جسم سے پسینہ کی صورت میں خارج شدہ فاسد مادے تھکاوٹ اور بیماری پیدا کرتے ہیں۔ باقاعدہ غسل کے ذریعہ ان نقصان دہ مادوں اور عوامل کو دور کر کے نہ صرف بیماریوں سے بچا جا سکتا ہے۔ بلکہ اس سے جسم کو ایک قسم کی مالش بھی مل جاتی ہے اور سکون و تازگی کا احساس بھی ہوتا ہے۔ ہمارے نبی ﷺ پانی کی کمی کے باوجود ہفتہ میں ایک بار ضرور غسل فرماتے تھے۔ جسمانی صفائی سے متعلقہ مندرجہ ذیل باتوں کا خیال رکھنا صحت کے لئے بہت اہم ہے۔
 

دانتوں کی صفائی:۔
دانت انسانی صحت میں اہم کردار ادا کرتے ہیں۔ خوراک کی ہر چیز دانتوں سے چبائے جانے کے بعد مُنہ سے گزر کر معدہ میں پہنچتی ہے۔ لہٰذا بدن کی صحت کا گہرا تعلق دانتوں کی صحت سے ہے۔ اس لئے ان کی صفائی و صحت بہت ضروری ہے۔ نبی پاک ﷺ صبح بیدار ہونے کے بعد مسواک فرماتے تھے اور مسواک کو ہمیشہ ڈھانپ کر رکھتے تھے تاکہ گرد و غبار اور کیڑے مکوڑوں سے یہ آلودہ نہ ہو جائے۔ آجکل ڈاکٹر بھی ہمیں ٹوتھ برش بند کر کے رکھنے کی نصیحت کرتے ہیں۔ لیکن یہ پیغام ہمیں ہمارے نبی ﷺ نے چودہ سو سال پہلے ہی دے دیا تھا۔

بیت الخلاء کا طریقہ:۔
نبیﷺ بیت الخلاء سے فارغ ہو کر ہاتھوں کو صاف مٹی سے اچھی طرح مل کر دھوتے تھے۔ اُس وقت صابن نہ ہونے کی وجہ سے یہی بہترین طریقہ تھا۔ صابن دستیاب ہونے کی سہولت میں ہمیں بیت الخلاء سے فارغ ہونے کے بعد لازمً صابن سے ہاتھ دھونے چاہئیں تاکہ معدہ کے ذریعہ پھیلنے والی بیماریوں سے بچا جا سکے۔

کھانے سے پہلے ہاتھ دھونا:۔
ہمارے نبی ﷺ ہمیشہ کھانا کھانے سے پہلے ہاتھ دھوتے تھے۔ اور انہیں کپڑے سے خشک نہیں کرتے تھے۔ اس میں حکمت یہ تھی کہ ہاتھ دھونے سے یہ جراثیم دور ہو جاتے ہیں لیکن تولیہ یا کپڑے سے خشک کرتے وقت اس پر موجود جراثیم دوبارہ ہاتھوں پر منتقل ہو جاتے ہیں۔ آج کل ڈاکٹر صاحبان بھی یہی تلقین کرتے ہیں کہ کھانا کھانے سے پہلے ہاتھ دھو کر تولیہ سے خشک نہیں کرنا چاہیے۔

ناخن تراشنا:۔
بغیر تراشے یا بڑھائے ہوئے ناخنوں کے اندر جراثیم وغیرہ سے بھری غلاظتیں جمع ہو جاتی ہیں۔ جو کھانا کھاتے وقت خوراک کے ساتھ معدہ میں منتقل ہو جاتی ہیں اور مختلف بیماریوں مثلاً اسہال، ہیضہ، پیچش وغیرہ کا سبب بنتی ہیں۔ لہٰذا ناخنوں کو تراش کر ان بیماریوں سے بچا جا سکتا ہے ۔رسول ﷲﷺ نے اسی لئے ناخنوں کا بڑھانا منع فرمایا اور ان کو تراشنے کا حکم دیا۔

مونچھوں کا تراشنا:۔
مونچھوں کے بالوں پر سانس کے ذریعے خارج ہونے والے فاسد مادے اور جراثیم اور فضا میں موجود ہر قسم کے ضرر رساں مادے جمع ہو جاتے ہیں۔ اگر یہ مونچھیں بڑھی ہوں تو یہ مادے ہمارے کھانا کھانے یا پانی و مشروبات پینے کے دوران ہمارے جسم میں داخل ہو کر بیماری پیدا کر سکتے ہیں۔ لہٰذا بڑھی ہوئی مونچھیں صحت کیلئے نقصان کا باعث ہیں۔

ذہنی پاکیزگی:۔
ہر قسم کے فاسد خیالات یعنی غم و غصہ، حسد، بغض و کینہ حِرص، شہوانیت وغیرہ متعدد بیماریوں کا باعث بنتے ہیں۔ جن میں بلڈ پریشر، دل کی بیماریاں۔ معدہ کی تکالیف اور اعصابی بیماریاں شامل ہیں۔ ان بیماریوں سے بچنے کیلئے مثبت اور پا یزہ سوچ کو اپنانا ضروری ہے۔ اور یہ اُسی صورت میں ممکن ہے اگر ہم اﷲ اور رسولﷺ کے احکامات پر عمل کریں۔ اور قرآن میں جگہ جگہ بیان کئے ہوئے اس بیان پر کامل یقین اور ایمان قائم کریں کہ اﷲ ہمارے دلوں کا حال جانتا ہے۔

ماحولیاتی صفائی:۔
اس سے مراد ہمارے ارد گرد موجود ہر اس چیز کی صفائی ہے جس سے ہماری زندگی کا کوئی تعلق ہے مثلاً ہوا، پانی و خوراک کا صاف ہونا، گھر کے اندر و باہر کی صفائی وغیرہ۔ گھروں سے باہر کوڑے اور گندگی کے ڈھیر اور نشیبی علاقوں میں کھڑا گندہ پانی مچھروں، مکھیوں اور دیگر بیماری پیدا کرنے والے کیڑے مکوڑوں کی افزائش کا ذریعہ بنتا ہے۔ اور ہر سال لاکھوں لوگ ان کی وجہ سے بیمار پڑتے ہیں اور ہزاروں موت کے مُنہ میں چلے جاتے ہیں۔ لہٰذا ان غلاظتوں کو جلدی دور کرنا چاہیے۔ کم از کم یہ ضرور کیا جائے کہ کھڑے پانی پر مٹی کا تیل چھڑک دیا جائے اور کوڑے کے ڈھیروں پر کافی مقدار میں چونا ڈال دیا جائے۔ آلودہ پانی بیماریاں پھیلانے کا سب سے بڑا ذریعہ ہے۔ پاکستان میں 80 فیصد بیماریاں آلودہ پانی سے پیدا ہو رہی ہیں ان میں ہیضہ، اسہال، پیچش، یرقان، ٹا ئفائیڈ و پیراٹائفائیڈ وغیرہ شامل ہیں۔ لہٰذا ان بیماریوں سے بچاؤ کیلئے صاف پانی کا استعمال لازمی ہے۔ آلودہ پانی کو جراثیم سے پاک کرنے کے مختلف طریقے ہیں۔ آجکل مارکیٹ میں کئی فلٹر دستیاب ہیں لیکن وہ غریب آدمی کی رسائی میں نہیں ہیں۔سب سے کم خرچ طریقہ یہ ہے کہ پانی کو شفاف شیشہ یا پلاسٹک کی بوتلوں میں بھر کر دھوپ میں ایک دو گھنٹے تک پڑا رہنے دیں۔سورج کی شعائیں جراثیم کشی کا کام کرتی ہیں۔ دوسرا کم خرچ طریقہ بلیچنگ پاؤڈر کا استعمال ہے اس کیلئے 80 لٹر پانی میں ایک گرام بلیچنگ پاؤڈر ڈال کر اچھی طرح مکس کریں اور پھر آدھ سے ایک گھنٹہ تک چھوڑ دیں اس کے بعد پانی کو اچھی طرح پھینٹ لیں اور پھر استعمال کریں۔ تیسرا سب سے عام طریقہ پانی کو 5سے7منٹ تک اُبال کر صاف کر نے کا ہے مگر اس میں ایندھن کا خرچہ کافی آتا ہے۔