فزیو تھراپی کے ذریعے مختلف بیماریوں کا علاج٬ ڈاکٹر فرحان اسحاق خان

فزیو تھراپی کو عرف عام میں فزیکل تھراپی بھی کہا جاتے ہے اور یہ ایک ایسا طریقہ علاج ہوتا ہے جس میں جسم کی مختلف بیماریوں مثلاً جوڑوں کا درد، نسوں کا کھنچاؤ اور پٹھوں کی تکلیف کو کو دور کیا جاتا ہے- اس کے علاوہ کسی حادثے کی صورت میں ہونے والے فریکچر کی سرجری کے بعد بھی فزیو تھراپی کی ضرورت ہوتی ہے- فزیو تھراپی کے ذریعے کیے جانے والے مختلف بیماریوں کےعلاج کے حوالے سے ہماری ویب کی ٹیم نے معروف فزیو تھراپسٹ ڈاکٹر فرحان اسحاق خان سے اہم معلومات حاصل کیں تاکہ ہماری ویب کے قارئین کو اس بارے میں شعور اور آگہی فراہم کی جاسکے- ڈاکٹر فرحان سے حاصل کردہ مفید معلومات یہاں قارئین کی خدمت میں پیش کی جارہی ہیں تاکہ آپ اس سے استفادہ حاصل کرسکیں-

ڈاکٹر فرحان کے مطابق “ فزیو تھراپی ایک ایسا ذریعہ علاج ہے جس میں بغیر دواؤں کے مریض کا علاج کیا جاتا ہے- اس میں ورزشوں کے ذریعے اور متعدد اقسام کی مشینوں کے ذریعے علاج کیا جاتا ہے جبکہ آج کل چند ایسی تکنیک بھی آچکی ہیں جن کے بعد فزیو تھراپی مزید بہتر اور جدید ہوچکی ہے“-
 

ڈاکٹر فرحان کا کہنا ہے کہ “ بہت سی بیماریاں ایسی ہوتی ہیں جن کا علاج ہومیو پیتھی یا پھر ہربل دواؤں سے ممکن نہیں ہوتا لیکن فزیو تھراپی میں ان بیماریوں کا بہت اچھا اور مناسب علاج کروایا جاسکتا ہے“-

“ مثال کے طور پر ہمارے ہاں ہر گھر میں ایک ایسا مریض ضرور موجود ہوتا ہے جسے کمر درد کی شکایت ہوتی ہے یا گردن کی تکلیف ہوتی ہے یا پھر جوڑوں میں درد رہتا ہے جس میں گھٹنوں کی تکلیف بہت عام ہے“-

“ گھٹنوں کی اس تکلیف کو Osteoporosis کہا جاتا ہے اور یہ ایک مخصوص عمر کی خواتین میں زیادہ پائی جاتی ہے“-

“ دواؤں سے ان بیماریوں کا علاج وقتی طور پر تو ہوتا ہے لیکن اس کے اثرات دیرپا نہیں ہوتے لیکن فزیو تھراپی میں مختلف ورزشوں کے ذریعے مریض کو بہت اچھا آرام اور سکون حاصل ہوسکتا ہے- اور یہ ورزشیں مریض آسانی سے اپنے گھر پر بھی کر سکتا ہے“-

ڈاکٹر فرحان کا کہنا تھا کہ “ اگر آپ دیکھیں تو ایسے افراد جو دفاتر وغیرہ میں نوکری کر رہے ہوں یا پھر ایسے افراد جو ٹیلر ماسٹر ہوں یا اس جیسے کسی پیشے سے تعلق رکھتے ہوں جن میں مسلسل جھک کر کام کیا جاتا ہے تو یہ افراد اپنی اس دیر تک رہنے والی پوزیشن سے پیدا ہونے والی پیچیدگیوں سے بے خبر ہوتے ہیں“-