پاکستان کی شاندار فتح اور احمد شہزاد کا اعزاز

بنگلہ ديش کے شہر مير پُور کے شير بنگلہ نيشنل اسٹيڈيم ميں اتوار تيس مارچ کو کھيلے جانے والے ’ورلڈ ٹی ٹوئنٹی‘ کپ ميں گروپ ٹو کے ايک ميچ ميں پاکستان نے ميزبان ملک بنگلہ ديش کی ٹيم کو پچاس رنز سے شکست دے دی۔

بنگلہ دیش کے خلاف ٹی ٹوئنٹی مقابلوں کے ایک اہم میچ میں پاکستان کی طرف سے احمد شہزاد نے شاندار سنچری سکور کی جس کی وجہ سے پاکستان نے میزبان ٹیم کے لیے 191 رنز کا بڑا ہدف کھڑا کیا۔

دوسری جانب احمد شہزاد اپنی شاندار سنچری کی بدولت ٹی ٹوئنٹی کرکٹ میں سنچری بنانے والے پہلے پاکستانی بیٹسمین بن گئے ہیں۔
 

اس ٹورنامنٹ میں اس سے قبل گیلز سنچری سکور کر چکے ہیں۔

اِس ميچ ميں پاکستان نے ٹاس جيت کر پہلے بيٹنگ کرنے کا فيصلہ کيا اور اوپنر احمد شہزاد کی شاندار اننگز کی بدولت مقررہ بيس اووروں ميں پانچ وکٹوں کے نقصان پر 190 رنز اسکور کيے۔ لاہور سے تعلق رکھنے والے شہزاد نے باسٹھ گيندوں پر 111 رنز ناٹ آؤٹ کی دھوئيں دار اننگز کھيلی، جس ميں اُنہوں نے چھ چھکے اور دس چوکے لگائے۔ يہ بين الاقوامی ٹی ٹوئنٹی ميں اُن کی پہلی سنچری ہے۔ احمد شہزاد اور شعيب ملک کے درميان چوتھی وکٹ کی شراکت ميں پاکستان نے 83 رنز بنائے۔ اننگز کا اختتام بھی کافی دلچسپ رہا اور آخری دو اوورز ميں پاکستان نے چواليس رنز اسکور کيے۔

ميزبان ٹيم کی جانب سے عبدالرزاق سب سے کامياب باؤلر رہے، جنہوں نے چار اوورز ميں بيس رنز دے کر دو کھلاڑيوں کو پويلين کا رخ دکھايا۔ محمود اللہ، شکيب الحسن اور الامين حسين نے بھی ايک ايک وکٹ لی۔

جواب ميں بنگلہ ديش کی ٹيم مقررہ بيس اوورز ميں سات وکٹوں کے نقصان پر صرف 140رنز بنانے ميں کامياب رہی۔ ميزبان ٹيم کی پہلی وکٹ تيس کے مجموعی اسکور پر گری، جس کے بعد يکے بعد ديگرے وکٹيں گرتی رہيں اور ايک موقع پر 47 رنز پر بنگلہ ديش کے چار کھلاڑی آؤٹ ہو چکے تھے۔

پاکستان کے ليے سب سے کامياب بالر عمر گُل رہے، جنہوں نے چار اوورز ميں تيس رنز دے کر تين وکٹيں حاصل کيں۔ ان کے علاوہ سعيد اجمل نے دو جبکہ شاہد آفريدی اور ذوالفقار بابر نے ايک ايک وکٹ لی۔