لاپتہ طیارہ٬ مسافروں کے موبائل فون آن اور سیٹلائٹ کی مدد

ملائیشین مسافر طیارہ سمندر میں گر گیا یا پھر اسے ہائی جیک کر لیا گیا، معمہ تاحال حل نہ ہوسکا، طیارے میں سوار مسافروں کے فون بج رہے ہیں لیکن کوئی کال ریسیو نہیں کر رہا۔

آج نیوز کے مطابق ملائیشین طیارہ ایم ایچ 370 نے ہفتے کی شب کوالالمپور سے بیجنگ کے لئے اڑان بھری تھی۔ پرواز کا بیجنگ پہنچنے کا وقت صبح ساڑھے چھ بجے تھا جبکہ طیارے کا رابطہ ڈیڑھ بجے سے رڈار سے منقطع ہو گیا تھا۔
 

طیارے کے حوالے سے متضاد اطلاعات ہیں پہلے کہا جا رہا تھا کہ طیارہ سمندر میں ڈوب گیا ہے جبکہ یہ خدشہ بھی ظاہر کیا جا رہا ہے کہ طیارے کو ہائی جیک کر لیا گیا ہے۔

طیارے میں سوار مسافروں کے لواحقین نے جب اپنے پیاروں کے موبائل فونز پر کال کی تو فون کی گھنٹی مسلسل بجنے کے باوجود کوئی کال ریسیو نہیں کر رہا۔ لواحقین نے مطالبہ کیا ہے کہ پولیس ان کے عزیزوں کے نمبر سے ان کی صحیح لوکیشن کا پتہ لگا سکتی ہے۔

لواحقین کا کہنا ہے کہ اگر طیارہ سمندر میں ڈوبا ہوتا تو مسافروں کے فون پر کالز کیسے جا سکتی تھیں۔ آج بھی ویتنام کے قریب لاپتا ہونے والے طیارے کی کثیرالملکی سرچ اینڈ ریسکیو کوششیں جاری ہیں۔ جس میں سات ملکوں کے سینتیس ہوائی جہاز اور چالیس سے زائد بحری جہاز حصہ لے رہے ہیں۔

تاہم ابھی تک طیارے کے حوالے سے کوئی مستند بات سامنے نہیں آسکی۔ طیارے میں دو سو انتالیس افراد سوار تھے۔