بااثر ترین جانور٬ دلچسپ اور حیرت انگیز رپورٹ

انسانوں اور جانوروں کا ساتھ تو زمانہ قدیم سے رہا ہے اور ان میں سے کچھ ایسے جانور بھی ہیں جنہیں اپنے ساتھیوں کے مقابلے میں دنیا کا بااثر ترین جانور قرار دیا جاسکتا ہے- جیسے دنیا کو فتح کرنے والے گھوڑے سے لے کر وائٹ ہاؤس تک پہنچانے میں مدد کرنے والے کتے تک- ایسے ہی چند بااثر ترین جانوروں کی فہرست مرتب کی ہے امریکی جریدے ٹائم نے جو کافی دلچسپ اور حیرت انگیز ہے- دی نیوز ٹرائب سے حاصل کی گئی یہ فہرست ہماری ویب کے قارئین کے لیے بھی پیشِ خدمت ہے-

لین وانگ
پہلے نمبر پر ایشیائی ہاتھی لین وانگ کو رکھا گیا ہے جسے گرینڈ پالین بھی کہا جاتا ہے- دوسری جنگ عظیم کے دوران برما میں جاپانی فوج کو سپلائی پہنچانے کا کام تب تک کیا جب تک کہ پکڑا نہیں گیا- اس بعد یہ ہاتھی چین اور تائیوان کے لیے فوجی خدمات سرانجام دیتا رہا- 1954 میں ریٹائرمنٹ کے بعد 2003 یعنی اپنی موت تک تائپے چڑیا گھر میں رہا- اس ہاتھی کو گنیز بک آف ورلڈ ریکارڈ میں سب سے زیادہ عرصے تک زندہ رہنے والے ہاتھی کا اعزاز بھی حاصل ہے-

بیوسی فالس
دوسرے نمبر پر سکندر اعظم کے گھوڑے بیولسی فالس کا نام ہے جسے دنیا کے مقبول ترین جانوروں میں سے ایک مانا جاتا ہے- سکندر کی فتوحات میں اس کے کردار کے بارے میں کافی جھوٹی سچی کہانیاں مشہور ہیں اور یہی تو وہ گھوڑا ہے جس کے نام پر بیوسی فالس نام کا شہر تعمیر کیا جسے اب جہلم کے نام سے بھی جانا جاتا ہے-

سورس یا سیرئین
تیسرے نمبر پر معروف فوجی جرنیل ہنی بال کا ہاتھی سورس یا سیرئین ہے جس کے بارے میں مانا جاتا ہے کہ یہ واحد ہاتھی تھا جو ہنی بال کے تاریخی جنگی مہم کے لیے اسپین سے کوہ پائرینیس اور کوہ الپس سے ہوتا ہوا اطالیہ یا جدید اٹلی میں کامیاب ہوا- کہا جاتا ہے کہ اس ہاتھی کا تعلق بھارت سے تھا اور اس نے بھوک٬ بیماری٬ شدید ٹھنڈ اور جنگ ہر جگہ ہنی بال کی کامیابی میں اہم کردار نبھایا ہے-

ڈیجیٹ
چوتھے نمبر پر ایک گوریلے ڈیجیٹ کو رکھا گیا ہے- یہ گوریلا 1977 میں ایک جنگل میں پایا گیا تھا- اس گوریلے کی موت کی خبر امریکا میں بدامنی کا سبب بنی گئی تھی- اسی بد امنی کے نتیجے میں وہاں گوریلوں کے شکار پر پابندی عائد کر دی گئی تھی-

بالٹو
پانچواں نمبر سائبرین نژاد کتے بالٹو کا ہے- اس کتے کا کارنامہ یہ ہے کہ اس نے 1925 میں ہیضے کی وبا سے نمٹنے کے لیے دوا کو الاسکا سے 674 میل تک کا برفانی سفر طے کر کے متاثرہ مقامات تک پہنچایا تھا- اس کے بعد اس کتے کو ایک ہیرو کا درجہ بھی ملا اور اس پر کارٹون فلمیں بھی بنائی گئیں-

چیکرز
چیکرز وہ خوش نصیب کتا ہے جس نے رچرڈ نکسن کو امریکی صدارت کے عہدے پر پہنچا دیا- اور یہی چیز اسے مذکورہ فہرست میں چھٹے نمبر پر لے آئی- 1952 میں جب رچرڈ نکسن نائب صدارت کے عہدے کے لیے ڈیوائد ایسن ہاور سے مقابلہ کر رہے تھے اور ایک مباحثے میں اپنے اوپر الزامات کی تردید کرتے ہوئے یہ تسلیم کیا کہ انہوں نے چیکرز کو بطور تحفہ لیا- اور اس تقریر نے عوامی حمایت ان کے حق میں کردی اور وہ آگے بڑھتے ہی چلے گئے-

کیکو
7ویں نمبر پر وہیل مچھلی کیکو موجود ہے- کیکو جاپانی زبان کا لفظ ہے جس کا مطلب خوش قسمت ہے- اس وہیل کو 1979 میں آئس لینڈ سے پکڑا گیا اور 1993 کی ہٹ فلم فری ولی میں کام کر کے شہرت حاصل کی- اس مچھلی کے لیے اوریگن میں 70 لاکھ ڈالرز کی لاگت سے خصوصی ایکوریم بھی تعمیر کیا گیا-

ایلسا
8ویں نمبر پر ہے شیرنی ایلسا جو کہ 1960 کے بیسٹ سیلر ناول بورن فری کا مرکز کردار تھی اور اسی ناول پر آسکر ایوارڈ یافتہ فلم بھی بنائی گئی- کہا جاتا ہے کہ ایلسا کی کہانی سے ہی امریکی عوام کا یہ تاثر دور ہوا کہ جنگلی جانور بلاوجہ کسی کو قتل نہیں کرتے اور انہیں قید میں رکھنے کی ضرورت نہیں-