لیچی، نفیس، مزیدار اور فائدے مند پھل

کھٹی میٹھی لیچی، گرمیوں کا خاص پھل ہے۔ ماہرین کے مطابق اس موسم میں لیچی کا استعمال نہایت ہی مفید ہے۔ لیچی کا نباتاتی نام لیچی چائنین سیس (Litchi Chinese) ہے۔ لیچی میں باہر کی طرف ایک پتلا اور سخت سرخ گلابی چھلکا ہوتا ہے جو پر تیز نوکدار اُبھار ہوتے ہیں۔ اس کے اندرونی جانب ایک جھلی ہوتی ہے جس میں لیچی کا سفید گودا بڑے سے بیج کے ساتھ لپٹا ہوتا ہے۔ گودے کا ذائقہ نہایت شیریں اور خوش مزہ ہوتا ہے۔ یہ پھل نہایت حساس ہے اور پیڑ سے اتر کر بہت جلد خراب ہو جا تا ہے-

اطباء کے مطابق لیچی کا مزاج سرد و تر درجہ دوم ہے۔ لیچی کا اصل وطن چین ہے لیکن یہ بھارت میں بہار کے ضلع مظفرپور، اُترپردیش میں ہمالیہ کے دامن، ڈھیرہ دون کی وادی نیز آسام و مغربی بنگال کے علاوہ پاکستان میں سندھ کے بعض علاقوں میں بھی کاشت کی جاتی ہے۔ لیچی کے درخت کی ایک اور خوبی یہ ہے کہ اس میں پھول لگتے ہی شہد کی مکھیاں پالی جاتی ہیں اور اس سے تیار ہونے والا شہد انتہائی عمدہ ہوتا ہے۔
 

لیچی ایک عمدہ اور نفیس صحت بخش پھل ہے۔ لیچی میں کیلشیم، میگنیشیم، پوٹاشیم، سوڈیم، وٹامن اے، بی، سی، تھائیمین، زنک، کاپر اور ریبوفلووین پایا جاتا ہے۔ لیچی دماغ کو طاقت دیتی ہے۔ مفرح و مقوی قلب ہے دل کی کمزوری اور خفقان (دل کی دھڑکن یک دم تیز ہوجانے) میں بہت زیادہ مفید ہے۔

لیچی پیاس بجھاتی اور جگر کے بیشتر امراض خصوصاً جگر بڑھنے میں نہایت فائدہ مند ہے۔ ہاتھ پاؤں کی جلن و یرقان میں مفید ہے۔ لیچی کم مقدار میں زیادہ دورانیہ بعد کھانا زیادہ مفید ثابت ہوتی ہے۔ ۲ سے ۳ دانے، چھ چھ گھنٹے کے بعد کھانے سے خون صالح پیدا کرتی ہے۔

تازہ ترین تحقیقات کے مطابق لیچی کا استعمال ہر قسم کے کینسر سے بچاتا ہے۔ خصوصاً اینٹی بریسٹ کینسر ہے۔ خواتین کی ہڈیوں کے بھربھرے پن میں مؤثر ہے۔