کیا دانت کا درد ہارٹ اٹیک کی جانب اشارہ ہوسکتا ہے؟ 6 غیر متوقع علامات اور دل کے امراض

پورے جسم میں دل کو ایک خاص اہمیت حاصل ہوتی ہے کیونکہ جب تک یہ دھڑک رہا ہے آپ اس جہان ہیں ورنہ اس جہان ہیں- اس لیے دل کی صحت کی حفاظت انتہائی ضروری ہے اور اس میں تھوڑی سی کوتاہی آپ کو کئی مسائل کا شکار بنا سکتی ہے- اسی مناسبت سے ہم یہاں 6 ایسی غیر متوقع علامات کا ذکر کر رہے ہیں جو حقیقی طور پر دل کے امراض کی جانب اشارہ کرتی ہیں جبکہ ہم انہیں کوئی اور عام سا طبی مسئلہ سمجھ رہے ہوتے ہیں- ضروری یہ ہے کہ ان علامات کے ظاہر ہوتے ہی ڈاکٹر سے رجوع کرنا چاہیے تاکہ درست تشخیص کے بعد آپ کا بروقت علاج شروع کیا جاسکے-

دانت کا درد
ماہر امراضِ قلب Amar Singhal کے مطابق دانتوں کے درد میں ہر بار ڈینسٹ کے پاس جانے کی ضرورت نہیں ہوتی کیونکہ یہ کبھی کبھی ہارٹ اٹیک کی جانب بھی اشارہ ہوتا ہے- یہ درد ایسے محسوس ہوتا ہے جیسے دانتوں یا جبڑوں سے باہر آرہا ہو-

کھانسی کے ساتھ گلابی یا سفید بلغم
اگر آپ کو کھانسی کے ساتھ شفاف کے بجائے گلابی یا سفید رنگ کے بلغم کی شکایت ہو تو یہ دل کی کسی بیماری کی جانب اشارہ بھی ہوسکتا ہے- Nate Masterson کے مطابق طویل عرصے سے رہنے والی کھانسی کی وجہ سے پیدا ہونے والا عجیب رنگ کا بلغم دل کے کسی مسئلے کے سب ہوسکتا ہے-بلغم کا یہ رنگ پھیپھڑوں سے خون کے اخراج کے باعث ہوتا ہے-

اعضاﺀ کی سوجن
اعضاﺀ کی سوجن بھی قلبی نظام میں خرابی کی جانب اشارہ کرتی ہے- ہاتھ یا پاؤں کی طویل وقت تک سوجن کا مطلب یہ ہے کہ آپ کے جسم میں خون کی گردش صحیح طرح سے نہیں ہورہی- جب خون درست انداز میں پمپ نہیں ہوتا تو وہ قدرتی طور پر دل سے دور اعضا میں جمع ہوجاتا ہے-

ٹانگوں سے بالوں کا گرنا
اگر آپ کو محسوس ہوتا ہے کہ آپ کی ٹانگوں کے بال کم ہورہے ہیں تو یہ دل کی صحت کی خرابی کی طرف نشاندہی بھی ہوسکتی ہے- بالوں کی نشوونما کے لئے ضروری غذائی اجزاء خون کے ذریعے تقسیم ہوتے ہیں- لیکن جب کسی مسئلے کی وجہ سے غذا بالوں تک نہیں پہنچتی اور مطلوبہ آکسیجن بھی نہیں ملتی تو بال گرنا شروع ہوجاتے ہیں-

نیلے یا جامنی رنگ کے ناخن
اگر بغیر کسی چوٹ کے بھی آپ کے ناخن نیلے یا جامنی رنگ کے ہوجاتے ہیں تو اس کا مطلب ہے کہ انہیں صحیح انداز میں آکسیجن نہیں مل رہی- جس کی وجہ دل کی شریانوں میں پیدا ہونے والی خرابی ہے ہوسکتی ہے جو کہ خون کی گردش کو متاثر کر رہی ہے- اگر اس مسئلے کی جانب جلد از جلد توجہ نہ دی جائے تو پاؤں کو نقصان بھی پہنچ سکتا ہے-

سانس لینے میں دشواری
ماحول میں سب کچھ نارمل ہونے کے باوجود اگر آپ کو سانس لینے میں دشواری ہورہی ہے تو لازمی آپ کے دل کے ساتھ کوئی مسئلہ ہوسکتا ہے- اس کے علاوہ سیڑھیاں چڑھ کر جانے کی صورت میں بھی اگر آپ کو مشکلات کا سامنا کرنا پڑتا ہے تو یہ بھی دل کی صحت میں خرابی پیدا ہونے کی جانب اشارہ ہوسکتا ہے-