اگر ایسا ہے تو کہیں آپ کے جسم میں بھی زہریلے مادے تو نہیں جمع ہو رہے ہیں؟ عام علامات اور مددگار نسخے جانیں

ہمارے ارد گرد ہر جگہ اور ہر چیز میں جراثيم اور زہریلے مادے موجود ہوتے ہیں جو کہ ہم اپنی عام آنکھ سے نہیں دیکھ سکتے ہیں اور اکثر غیر ارادی طور پر سانس لینے والی ہوا کے ذریعے پینے والے پانی کے ذریعے یا کھانے کے ذریعے ہمارے جسم کا حصہ بن جاتے ہیں- ویسے تو جسم کے اندر قدرتی طور پر ایسا نظام موجود ہوتا ہے جو ان زہریلے مادوں کو خارج کرتا رہتا ہے مگر بعض اوقات اس نظام میں خرابی کے سبب یہ زہریلے مادے ہمارے جسم میں جمع ہونا شروع ہو جاتے ہیں اور اس کا اظہار مختلف علامات سے ہوتا ہے جن کے بارے میں ہم آپ کو آج بتائيں گے-

1: قبض
زندہ رہنے کے لیے کھانا ضروری ہوتا ہے جو اشیا ہم کھانے میں استعمال کرتے ہیں وہ مکمل طور پر ہمارے جسم کا حصہ نہیں بنتی ہیں بلکہ ہمارا جسم ان اشیا میں سے طاقت اور توانائی جزب کر کے فاضل مادوں کو جسم سے خارج کر دیتا ہے- مگر بعض اوقات انتوں میں اتنے زہریلے مادے جمع ہو جاتے ہیں کہ وہ قبض کا باعث بن جاتے ہیں-

2: دماغ کا ماؤف ہونا
بعض اوقات ایک اچھی رات کی نیند کے باوجود دماغ گنگ سا ہو جاتا ہے اور انسان کسی بھی معاملے میں دھیان نہیں لگا سکتا ہے اور اس کو یہ محسوس ہوتا ہے کہ جیسے اس کا دماغ سن سا ہو گیا ہے- ایسا جسم میں موجود زہریلے مادوں کے سبب ہوتا ہے جس کے باعث جسم میں موجود وٹامن اور معدنیات ضائع ہونے لگتے ہیں بعض اوقات ایسا فضا میں موجود آلودگی کے سبب بھی ہو سکتا ہے یا پھر گاڑی کے دھوئيں سے بھی ہو سکتا ہے-
 

3: پسینے کی بدبو
بعض افراد ایسے بھی ہوتے ہیں جو کہ باقاعدگی سے نہانے اور باڈی اسپرے لگانے کے باوجود بھی اپنے پسینے کی بدبو کے سبب شرمندگی سے دو چار ہوتے ہیں- ایسا عام طور پر اس سبب ہوتا ہے جب کہ آپ کے معدے میں زہریلی گیسیں بن رہی ہوں اور وہ جسم سے پسینے کے ساتھ خارج ہو کر بدبو کا باعث بن رہی ہوتی ہیں یہ بھی جسم کے اندر زہریلے مادوں کی موجودگی کی اہم علامت ہے-

4: جوڑوں اور پٹھوں میں درد
اگر آپ باقاعدگی سے ورزش کے عادی ہیں اور جوڑوں کے کسی اور مسئلے سے دوچار نہیں ہیں اس کے باوجود آپ کے جوڑوں اور پٹھوں میں درد رہتا ہو تو اس کا سبب جسم میں موجود وہ زہریلے مادے ہیں جو کہ ان میں سوجن کا باعث بن رہے ہیں-

5: جلد پر دھبے اور خارش
جلد ہمارے جسم کا وہ سب سے اہم حصہ ہے جو باہر کے اثرات کا براہ راست سامنا کرتا ہے اور جسم کے اندر موجود زہریلے مادوں کی موجودگی کی صورت میں خارش ، اور مختلف قسم کے داغ دھبوں کا اظہار کرتا ہے جو کہ مختلف کیمیکلز کی صورت میں ہمارے جسم میں داخل ہوتے ہیں-

6: بے خوابی
جسم میں زہریلے مادوں کی موجودگی کےسبب ایک جانب تو انسان تھکاوٹ کا شکار رہتا ہے مگر اس کے ساتھ ساتھ نیند کا آنا بھی ایک مشکل امر ہو جاتا ہے اور جسم میں موجود نیند لانے والے ہارمون کے بننے میں رکاوٹ ڈال دیتا ہے جس کی وجہ سے نیند کا آنا بہت مشکل ہو جاتا ہے-
 

7: وزن میں اضافہ
ہر قسم کی ورزش اور ڈائٹنگ کے باوجود بڑھتا ہوا وزن بھی درحقیقت جسم میں زہریلے مادوں کی موجودگی کی ایک اہم علامت ہے جس کے سبب جسم میں موجود ہارمون کا نظام بری طرح متاثر ہوتا ہے اور اس سے وزن میں تیزی سے اضافہ ہوتا ہے-

8: سانس کی بدبو
معدے میں موجود زہریلے مادوں کی زیادتی سانس کی بدبو کا اہم سبب ہے جس کو اچھے سے اچھے ماوتھ واش کے استعمال سے بھی دور نہیں کیا جا سکتا ہے-

9: ناخنوں کا بدہئیت ہونا
ہاتھوں اور پیر کے ناخنوں کی سطح کا کھردرا پن اور ان کا کٹا پھٹا ہونا بھی اس بات کی علامت ہے کہ جسم میں زہریلے مادے بہت بڑی مقدار میں موجود ہیں-

10: بالوں کا گرنا
سر کی جلد کے اندر مسام موجود ہوتے ہیں جن میں زہریلے مادوں کے جمع ہونے کے باعث بالوں کی جڑیں کمزور ہو جاتی ہیں اور بال تیزی سے گرنا شروع ہو جاتے ہیں-
 

جسم سے زہریلے مادوں کا اخراج کس طرح کیا جائے
اگر آپ ان سب علامات کا سامنا کر رہے ہیں یا ان میں سے کچھ کا شکار ہیں تو یہ اس بات کی علامت ہیں کہ آپ کے جسم میں زہریلے مادے بہت بڑھ چکے ہیں اور کسی بڑے خطرے سے دوچار ہونے سے قبل ان کا اخراج ضروری ہے اس کے لیے کچھ کاموں کو اپنی روز مرہ زندگی کا حصہ لازمی بنائيں-

1: بہت سارا پانی پینے کی عادت اپنائیں ، پانی جسم سےزہریلے مادوں کےاخراج کا اہم ذریعہ ہے
2: زہریلے مادے سب سے زیادہ جگر کو متاثر کرتے ہیں اس لیۓ جگر کو محفوظ رکھنے کے لیۓ قہوہ پینے کی عادت اپنائیں قہوے کے اندر ایسی تاثیر ہوتی ہے جو کہ جسم سے مادے خارج کر کے جگر کو طاقت فراہم کرتے ہیں
3: یوگا کو اپنائیں یہ اعصاب کو پر سکون کر کے جسم میں موجود ہارمون کے نظام کو بہتر بناتا ہے
4: رات کے وقت لازمی طور پر دانتوں کو صاف کرنے کی عادت اپنائيں اور اس کے ساتھ ساتھ زبان کی صفائی کو بھی یقینی بنائيں
5: ہمیشہ صاف اور نامیاتی غذا کا استعمال کریں فاسٹ فوڈ سے پرہیز کریں
6: پرو بائیوٹکس کا استعمال یقینی بنائیں
7: میک اپ کے لیے قدرتی اشیا کا استعمال کریں مضر صحت کیمیکل کے استعمال سے پرہیز کریں-