افطار میں سرخ شربت کا استعمال صحت کے لیے ضروری اور بڑی بیماریوں سے محفوظ رکھنے کا ایک اہم ذریعہ

گرمی کے موسم میں جسم کو پانی کی زیادہ ضرورت ہوتی ہے اور پانی کے استعمال سے لو لگنے سے بچا جا سکتا ہے مگر زيادہ گرمی میں صرف پانی اس نمکیات اور گلوکوز کی کمی کو پورا نہیں کر سکتا ہے جو کہ انسان کے جسم سے پسینے کی صورت میں خارج ہوتے ہیں- اس کمی کو پورا کرنے کے لیے ایسے مشروب کی ضرورت ہوتی ہے جو جسم میں سے پانی کی کمی پوری کرنے کے ساتھ ساتھ گلوکوز کی کمی بھی پوری کر سکے۔ آج کل رمضان گرمی کے موسم میں آتے ہیں اور روزے کا دورانیہ عام طور پر بارہ سے چودہ گھنٹے تک کا ہوتا ہے جس میں جسم میں پانی اور گلوکوز کی کمی ہو جانا قدرتی امر ہے اس لیے روزہ کھولنے کے لیے ایسے مشروبات کا استعمال کیا جاتا ہے جو کہ نہ صرف پیاس کا خاتمہ کر دے بلکہ اس کے ساتھ ساتھ جسم کی توانائي کی کمی بھی پوری کر دے اس وقت میں سب سے پہلا خیال لال شربت کا ہی آتا ہے جو کہ سالوں سے افطار کے وقت ہماری اولین پسند ہوتی ہے- آج ہم آپ کو اس حوالے سے بتائيں گے کہ لال شربت کس طرح انسانی جسم کے لیے روزے کے فوراً بعد افطار کے وقت بہترین ثابت ہو سکتا ہے-

لال شربت کے اجزاﺀ
لال شربت میں گلاب کے پھول کی پتیوں کو گاجر، اورنج، انناس، پالک اور پودینے کے اجزا کو شکر کے ساتھ ملا کر ایک خاص تناسب کے ساتھ بنایا جاتا ہے جس میں دھنیا بھی شامل ہوتا ہے- یہ تمام اجزا ایک خاص تناسب کے ساتھ ملا کر ایک گاڑھا محلول تیار کیا جاتا ہے جو کہ قدرے زیادہ مٹھاس کا حامل ہوتا ہے اور اس میں ٹھنڈہ پانی ، یا دودھ ملا کر اس کو استعمال کیا جا سکتا ہے- اس میں شامل تمام اجزا قدرتی ہوتے ہیں اس وجہ سے یہ کسی بھی قسم کے کیمیکل اثرات سے محفوظ ہوتا ہے-

لال شربت کے فوائد
لال شربت کے اجزاﺀ کو دیکھ کر یہ اندازہ لگایا جا سکتا ہے کہ یہ جسم کے لیے بہت مفید ثابت ہو سکتا ہے-
 

1: پیاس کو بجھاتا ہے
اس شربت میں کئی قسم کی معدنیات موجود ہوتی ہیں جیسے کہ سوڈیم ، میگنیشیم ،سلفر اور فاسفورس اس شربت میں موجود ہوتے ہیں- اس کو پینے سے جسم میں پانی کا توازن برقرار رہتا ہے اور پانی کی کمی کی وجہ سے جسم میں جمع ہونے والے زہریلے مادوں کے اخراج میں مددگار ثابت ہوتا ہے- اس وجہ سے افطار کے وقت اس شربت کا استعمال جسم میں پانی کی کمی کو دور کرتا ہے اور جسم کو اس کمی کے سبب ہونے والے اثرات سے بھی محفوظ رکھتا ہے-

2: کمزوری کا خاتمہ کرتا ہے
افطار سے قبل کے اوقات میں انسانی جسم جو کمزوری محسوس کر رہا ہوتا ہے اس کا سبب جسم میں نمکیات اور گلوکوز کی کمی ہوتی ہے افطار کے وقت پانی کی ضرورت سب سے زیادہ محسوس ہوتی ہے- مگر اس وقت صرف پانی کا استعمال انسان کی پیاس کو نہ صرف بڑھا دیتا ہے بلکہ جسم کی کمزوری میں بھی اضافے کا باعث بنتا ہے جب کہ اس وقت میں لال شربت کا استعمال نہ صرف پیاس کو بجھاتا ہے بلکہ اس میں موجود گلوکوز اور کاربوہائيڈریٹ جسم کو فوری طور پر توانائی فراہم کرتے ہیں-

3: نظام ہاضم کو بہتر بناتا ہے
سارے دن کی بھوک کے بعد اچانک کھانے کے سبب بدہضمی کے خطرات میں بہت زیادہ اضافہ ہو جاتا ہے کیوں کہ معدہ اتنے آرام کے بعد ایک دم اپنے اوپر پڑنے والے بوجھ کے سبب کام کرنے میں دشواری کا شکار ہو سکتا ہے- ایسی صورت میں اس شربت کے اجزاﺀ جس میں پودینہ، اور عرق گلاب شامل ہوتے ہیں معدے کو طاقت فراہم کرتے ہیں اور نظام ہاضم کو بہتر بنانے میں معاون ہو سکتے ہیں-
 

4: جسمانی درجہ حرارت کو برقرار رکھتا ہے
پانی کی کمی اور گرمی کے سبب انسانی جسم کا درجہ حرارت بھی بعض اوقات بڑھ سکتا ہے- اس صورتحال میں اس شربت کا استعمال جسم کو ٹھنڈک فراہم کرتے ہیں اور جسم کے درجہ حرارت کو نارمل حد تک رکھنے میں مددگار ثابت ہوتے ہیں-