موسمِ سرما، چند گھریلو نسخے ڈاکٹروں سے محفوظ رکھنے میں مددگار

سردی کے موسم میں یہ ٹوٹکے آزمائیں اور بیماریوں سے بچ کر اس کا صحیح لطف اٹھائیں

سردی کا موسم عام طور پر لوگوں کا پسندیدہ موسم ہوتا ہے مگر یہ لطف اس وقت پریشانی میں تبدیل ہو جاتا ہے جب اس موسم کے سبب انسان مختلف بیماریوں میں مبتلا ہو جاتا ہے- اسی سبب بڑوں کی کہاوت ہے کہ اس موسم میں اپنے سر اور پیر گرم رکھنے کا اہتمام کریں تو یہ موسم آپ کو کبھی نقصان نہیں پہنچائے گا-

مگر اس کے باوجود بھی اگر اس موسم میں کسی بیماری کا شکار ہو جائیں تو اس کے لیے ان ٹوٹکوں کو استعمال ڈاکٹروں سے محفوظ رکھنے میں مددگار ثابت ہو سکتا ہے-
 

زکام کا علاج
عام طور پر سردی کا موسم آتے ہی لوگ زکام میں مبتلا ہو جاتے ہیں تو اس کے علاج کے لیے دہکتے ہوئے کوئلوں پر تھوڑی چینی ڈال کر سونگھنے سے زکام میں افاقہ ہو جائے گا-

بچوں کی کھانسی کا علاج
بچوں کی بیماری انسان کو اس کی اپنی بیماری سے زیادہ پریشان کر ڈالتی ہے۔ سردی کے موسم میں ہونے والی کھانسی کے لیے ایک چمچ میں شہد لے لیں اور اس کے اوپر تھوڑا سا نمک ڈال کر آنچ پر اس وقت تک رکھیں جب تک شہد پھٹ جائے اس کے بعد اس کو کپڑے میں چھان کر چھنا ہوا پانی بچوں کو دینے سے ان کو کھانسی سے آرام ہو جائے گا اور وہ سکون سے سو سکیں گے-

بڑوں کی خطرناک کھانسی کا علاج
بعض اوقات کھانسی پرانی اور شدید ہو جاتی ہے ایسی کھانسی کے لیے انار کے چھلکے کو سیدھے توے پر اس وقت تک رکھیں جب تک وہ اچھی طرح جل جائے اس کے بعد اس کا سفوف بنا لیں اور ایک چمچ شہد پر ایک چٹکی یہ سفوف ڈال کر کھانے سے پرانی سے پرانی کھانسی کا خاتمہ ہو جاتا ہے-
 

سر درد کا علاج
سردیوں میں ٹھنڈ لگنے کے اثر سے ہونے والے سر درد کے لیے پیاز کا پانی نکال کر پیشانی پر لگائیں اس سے سر درد میں نہ صرف آرام ملے گا بلکہ سردی کے اثر کا بھی خاتمہ ہوگا-

جسم کے درد کا علاج
سردی کے سبب ہونے والے جسم کے درد کے لیے ایک کپ دودھ میں تھوڑی سی ہلدی ڈال کر پینے سے جسم کے درد میں آرام ملتا ہے-
 

سانس کی تکلیف
عام طور پر سانس کے مریضوں کے لیۓ سرد موسم شدید زحمت کا سبب بن جاتا ہے ایسے مریضوں کو چاہیے کہ وہ اپنی غذا میں مولی کا استعمال زیادہ سے زیادہ کریں تاہم اس بات کا خیال رکھیں کہ رات کے وقت مولی کھانے سے گریز کریں-