فیس بک کمنٹ 'لائیک' کرنا جرم بن گیا٬ عدالت کا تاریخی فیصلہ

کیا آپ سوچ سکتے ہیں سماجی روابط کی سب سے مقبول ترین ویب سائٹ فیس بک پر درج صرف کسی کمنٹ کو لائیک کرنا جرم بھی بن سکتا ہے؟ جی ہاں سوئٹزرلینڈ کی ایک عدالت نے حال ہی میں اپنے ایک شہری پر ایک نفرت انگیز فیس بک کمنٹ 'لائیک' کرنے پر جرمانہ عائد کیا ہے-

اس 45 سالہ شخص نے ایک ایسے ہتک آمیز کمنٹ کو لائیک کیا تھا جو جانوروں کے حقوق کے لیے سرگرم کارکن کے بارے میں فیس بک پر درج کیے گئے تھے۔

مذکورہ شخص کے خلاف یہ انوکھا فیصلہ زیورخ کی ایک َضلعی عدالت کی جانب سے کیا گیا ہے- عدالت کی جانب سے کمنٹ کو لائیک کرنے والے شخص پر 4000 سوئس فرانک کا جرمانہ عائد کیا گیا ہے-

سزا سننے والے شخص نے جن کمنٹ کو لائیک کیا ہے وہ 2015 میں فیس بک گروپ پر جاری ایک گرما گرم مباحثے کے دوران کیے گئے تھے۔ اس مباحثے میں جانوروں کے حقوق کے لیے کام کرنے والی ایک تنظیم کے سربراہ ارون کیسل کو نسل پرست قرار دیا گیا تھا-

مذکورہ شخص کے وکیل عمر عبدالعزیز کے مطابق ارون کیسل درجنوں ایسے افراد کو عدالت کے کٹہرے تک لائے جنہوں نے ان کے خلاف نفرت انگیز تبصرے کیے تھے- تاہم یہ پہلا موقع تھا کوئی ایسا شخص بھی عدالت میں موجود تھا جس نے صرف اس تبصرے کو لائیک کیا تھا-

دوسری جانب عدالت کا اپنے بیان میں کہنا تھا کسی کمنٹ کو لائیک کرنے کا مطلب بھی کمنٹ کرنے والے کے خیالات کی تائید کرنا ہوتا ہے-

< Previous ناقابلِ یقین کیڑے اور حیرت انگیز خصوصیات NEXT > کتوں کا کتا پن اور بادشاہ کا دسترخوان