کرکٹ کی دنیا اور قاتل گیندیں

بیٹ اور بال کے دلچسپ اور خطرناک کھیل کا نام کرکٹ ہے جہاں بھی بیٹ بال کو پیٹتا ہے تو کبھی بال بیٹ ہی نہیں بیٹسمین کو بھی پیٹتی ہے۔ چنانچہ ان گنت کھلاڑی زخمی ہوئے کچھ واقعات ایسے بھی ہیں جن میں کھلاڑی زخمی ہو کر جانبر نہ ہوسکے ۔تازہ مثال آسٹریلین کھلاڑی فلپ ہیوز کی ہے۔ ہیوز سائوتھ آسٹریلیا کی جانب سے فرسٹ کلاس شیفلڈ شیلڈ میچ کے دوران بائونسر لگنے سے ایسا چکرا کر گرے کہ دو دن تک زندگی و موت کی کشمکش میں مبتلا رہنے کے بعد 27نومبر2014کو ان کا انتقال ہو گیا۔ دنیا میگزین کے مطابق وکٹ کی تاریخ میں سب سے پہلے گیند سے ہلاک ہونے والے پرنس آف ویلز 58سالہ شہزادہ فریڈرک لوئیس ہیں جنہیں 31مارچ1751ء میں ایک بولر کی گیند اتنے زور سے لگی کہ زندگی کی بازی ہار گئے۔

تاہم لارڈز کرکٹ کے میدان میں سب سے پہلے انتقال کر جانے والے کھلاڑی 25سالہ انگلش بیٹسمین جارج سمورس ہیں جو جان پلاٹس کا ایک خطرناک بائونسر لگنے سے اس قدر شدید زخمی ہو گئے کہ 4روز بعد اسی تکلیف کی وجہ سے 19جون 1870ء کو جان بحق ہو گئے-
 

اسی نوعیت کا واقعہ پاکستان میں بھی اس وقت پیش آیا جب 16جنوری 1958ء کو قائد اعظم ٹرافی کا فائنل میچ کراچی اور کمبائینڈ سروسزکی ٹیموں کے درمیان کھیلا جا رہا تھا تو ٹیسٹ کرکٹر وکٹ کیپر عبدالقادر کے بڑے بھائی فرسٹ کلاس کرکٹر 18سالہ وکٹ کیپر عبدالعزیز اسپنر دلدار اعوان کی گیند دل پر لگنے سے زمین پر گر گئے انہیں ہسپتال لے جایا گیا مگر وہ جانبر نہ رہ سکے اور انتقال کر گئے- کرکٹ کی تاریخ کے یہ واحد کھلاڑی ہیں جن کے ساتھ کم عمری میں یہ افسوسناک واقعہ پیش آیا ہے۔ سکور بک میں ان کے نام کے آگے پہلی اننگز میں ریٹائر ہرٹ اور دوسری اننگز میں ریٹائر ڈیتھ درج ہے- واضح رہے کہ یہ وہی میچ تھا جس میں لٹل ماسٹر حنیف محمد نے 499رنز کی یادگار اننگ کھیلی تھی۔

70ء کی دہائی میں آسٹریلیا کے جیف تھامسن بیٹسمینوں کے لیے تباہی کا باعث بنے ہوئے تھے۔ کئی بڑے بڑے بیٹسمین ان کی بولنگ کاسامنا کرنے سے کتراتے تھے۔ تھامسن جن کی رفتار مونو سونک کیمروں سے 99.68میل فی گھنٹہ نوٹ کی گئی نے 1976-77میں شیفیلڈ شیلڈ کے ایک میچ میں 30سالہ مارٹن بیڈ کو ایک گیند کی جو انہیں سینے میں لگی جس سے وہ دھڑام سے نیچے زمین پر گرے اور وہ اس دنیا سے رخصت ہو گئے۔

کرکٹ کے کھیل میں ایسا ہی واقعہ سری لنکا کے کھلاڑی گیسی رتنائیکے کے ساتھ بھی پیش آیا ہے جب1981-82ء میں نوجوانی کے عالم میں اس کا وہ شکار ہوئے اسی طرح لنکا شائر کے آل رائونڈر اور فرسٹ کلاس کرکٹ ایان فولے 30اگست 1993ء کو ایک گیند چہرے پر لگنے سے اس قدر شاید زخمی ہوئے کہ انہیں ہسپتال داخل کرایا گیا جہاں ان کا علاج جاری تھا کہ ان کی وفات ہو گئی۔