غلاف کعبہ کی تبدیلی و تیاری تاریخ کے آئینے میں

مکہ مکرمہ میں آج غلافِ کعبہ تبدیل کرنے کی تقریب کا انعقاد کیا گیا۔ ہر سال 9 ذی الحج کو وقوفِ عرفات کے روز غلافِ کعبہ تبدیل کیا جاتا ہے- تبدیل کیا جانے والا غلاف 20 ملین ریال کی لاگت سے تیار کیا گیا ہے جو کہ قرآنی آیات سے مزین ہے۔

غلاف کعبہ کی تبدیلی کے عمل کی شروعات بعد نماز فجر ہوتی ہے۔ اس سال غلافِ کعبہ کی تیاری میں خالص سلک اور 165 کلو گرام سونے اور چاندی کا استعمال کیا گیا ہے جبکہ اس کا سائز 658 مربع میٹر ہے اور یہ 47 حصوں پر مشتمل ہے اور ہر حصے کی لمبائی 14 میٹر ہے اور چوڑائی 95 سینٹی میٹر ہے۔
 

غلاف کعبہ 4 دیواروں کے علاوہ دروازے پر بھی آویزاں کیا جاتا ہے اور یہ دوازہ زمین سے 3 میٹر کی بلندی پر نصب ہوتا ہے جس کی لمبائی 6 میٹر اور چوڑائی 3 میٹر ہے۔

مکہ میں غلاف خانہ کعبہ کی تیاری کے لیےخصوصی کارخانہ قائم کیا گیا ہے۔

بیت اللہ کے تقدس کی طرح اس کے غلاف کی تاریخی اہمیت بھی مسلمہ ہے اور ظہور اسلام سے قبل دور جاہلیت میں ‌بھی غلاف کعبہ 'کسوہ' نہایت توجہ اور انہماک کے ساتھ تیار کیا جاتا رہا ہے۔

العربیہ ڈاٹ نیٹ نے غلاف کعبہ کی تیاری کے مختلف ادوار اور اس کے مختلف مراحل پر ایک خصوصی رپورٹ میں روشنی ڈالی ہے۔ رپورٹ کے مطابق غلاف کعبہ کی تیاری کا آغاز کب ہوا اس کی درست تاریخ کا تو علم نہیں ہو سکا تاہم معلوم تاریخ اور مصادر سے معلوم ہوتا ہے کہ پہلا غلاف یمن کے"تبع الحمیری" نامی ایک بادشاہ نے تیار کیا تھا۔ چونکہ تبع یمنی بادشاہوں کا لقب تھا اور اس دور میں یریمنی بادشاہ اپنے نام کے ساتھ یہ لقب شامل کرتا تھا۔

تبع الحمیری نے نے مکہ مکرمہ کے دورے کے بعد واپسی پر ایک موٹے کپڑے کی مدد سے غلاف کعبہ تیار کیا۔ بعد ازاں اسی بادشاہ نے "المعافیریہ" کپڑے سے غلاف تیار کیا۔ معافیریہ یمن کا ایک قصبہ تھا جہاں سوت سے کپڑے تیار کیے جاتے تھے اور اسی نام سے اس کپڑے کو 'المعافیر' یا 'المعافیریہ' کہا جاتا تھا۔ اس کے بعد ایک نرم اور رقیق دھاگے سے غلاف کعبہ تیار کیا گیا۔ دور جاہلیت ہی میں سرنگ رنگ کا یمانی ڈیزائن کے مطابق غلاف تیار کیا گیا۔ تبع بادشاہوں کے بعد دور جاہلیت کے دوسرے فرمانرواؤں نے بھی غلاف کعبہ میں دلچسپی کا مظاہرہ کیا۔ بعد میں آنے والوں نے چمڑے کا غلاف بھی تیار کیا۔ تاریخی مصادر سے معلوم ہوتا ہے کہ غلاف کعبہ کی تیاری میں ہر آنے والا حکمراں پہلے سے بڑھ کر اس محنت کراتا۔ یوں اللہ کے گھر کے غلاف کے معاملے میں بادشاہوں میں بھی ایک مقابلے کی کیفیت تھی۔