قیمتی فوائد کا حامل اونٹنی کا دودھ٬ سنت بھی شفا بھی

کراچی میں آج کل آپ جس طرف کا رخ کریں گے وہاں ایک نہ ایک دکان ایسی ضرور دکھائی دے گی جہاں بڑے بڑے حروف میں ’یہاں اونٹنی کا دودھ دستیاب‘ ہے۔ یہ حال صرف کراچی کا نہیں بلکہ پورے پاکستان سمیت دنیا بھر کے متعدد ممالک کا ہے جہاں اونٹنی کے دودھ کی ڈیمانڈ میں مسلسل اضافہ ہورہا ہے-

اگر بات صرف پاکستان کی جائے تو معاملہ کچھ ایسا دکھائی دیتا ہے کہ لوگ اونٹنی کے دودھ کو فائدے مند سمجھ کر استعمال تو کرتے ہیں لیکن وہ فوائد ہیں کیا؟ اس سے ناواقف ہوتے ہیں- اس میں کوئی شک نہیں کہ طبی اعتبار سے اونٹنی کا دودھ بےشمار فوائد کا حامل ہے- لیکن یہ بھی ضروری ہے کہ آپ کو ان فوائد کا علم بھی ہو اور ایسے ہی چند فوائد کا ذکر ہے اس آرٹیکل میں-
 

قرآن پاک میں متعدد مقامات پر اونٹ کی اہمیت اور اسکی تخلیق پر غور و فکر کرنے کو کہا گیا ہے جبکہ ہمارے پیغمبر حضرت محمد صلی اﷲ علیہ وآلہ وسلم بھی اونٹنی کا دودھ شوق سے استعمال کرتے تھے کیونکہ صحرا میں بسنے والے لوگوں کے لیے اونٹ ایک نعمت سے کم نہیں ہے -

اونٹ ایک ایسا جانور ہے جو کہ صحرا کے سخت ترین موسم میں بھی کئی دن بغیر کھائے پئے گزارنے کی صلاحیت رکھتا ہے قحط اور خشک سالی کے موسم میں بھی اس جانور کی دودھ کی پیداواری صلاحیت برقرار رہتی ہے- شدید خشک سالی کے دوران جب پانی کی کمی واقع ہوجاتی ہے تب اس کے دودھ میں ایسی حیرت انگیز کمیائی تبدیلیاں آتی ہیں جو وہاں بسنے والے افراد کی غذائی ضروریات کو پورا کرنے کے کام آتی ہیں۔

اونٹ صحرا کی شدید گرمی میں اپنے جسم میں پانی کا ذخیرہ کرنے کی صلاحیت رکھتا ہے اور یہ پانی عمل تبغیر کے ذریعے کم سے کم اس کے جسم سے خارج ہوتا ہے جب اونٹ کو پانی کی کمی کا سامنا ہو تو اس وقت بھی اس کے دودھ میں پانی کی خاصی مقدار خارج ہوتی ہے اس کے ساتھ ساتھ دوسرے نمکیات جیسا کہ سوڈیم کلورائیڈ کی مقدار دودھ میں 10 ملی ایکولنٹ فی لیٹرسے بڑھ کر 23 ملی ایکولنٹ فی لیٹر تک پہنچ جاتی ہے ۔