اسلام کے پانچویں رکن یعنی حج کی اہمیت و فضیلت
(Muhammad Najeeb Qasmi, )
بسم اﷲ الرحمن الرحیم
اَلْحَمْدُ لِلّٰہِ رَبِّ الْعَالَمِیْن، وَالصَّلاۃُ وَالسَّلامُ عَلَی
النَّبِیِّ الْکَرِیْم ِوَعَلیٰ آلِہِ وَاَصْحَابِہِ اَجْمَعِیْن۔
اشہر حج یعنی حج کے ایام شروع ہوچکے ہیں، دنیا کے کونے کونے سے ہزاروں
عازمین حج ‘ حج کا ترانہ یعنی لبیک پڑھتے ہوئے مکہ مکرمہ پہنچ رہے ہیں، کچھ
راستے میں ہیں اور کچھ جانے کے لئے تیار ہیں۔ جلدی ہی لاکھوں حجاج کرام
اسلام کے پانچویں اہم رکن کی ادائیگی کے لئے دنیاوی ظاہری زیب وزینت کو
چھوڑکر اﷲ جل شانہ کے ساتھ والہانہ محبت میں مشاعر مقدسہ (منی، عرفات اور
مزدلفہ) پہنچ جائیں گے اور وہاں حضور اکرم ﷺ کے بتائے ہوئے طریقہ پر حج کی
ادائیگی کرکے اپنا تعلق حضرت ابراہیم علیہ السلام اور حضرت اسماعیل علیہ
السلام کی عظیم قربانیوں کے ساتھ جوڑیں گے۔ حج کو اسی لئے عاشقانہ عبادت
کہتے ہیں کیونکہ حاجی کے ہر عمل سے وارفتگی اور دیوانگی ٹپکتی ہے۔ حج اس
لحاظ سے بڑی نمایاں عبادت ہے کہ یہ بیک وقت روحانی، مالی اور بدنی تینوں
پہلوؤں پر مشتمل ہے، یہ خصوصیت کسی دوسری عبادت کو حاصل نہیں ہے۔
حج کی فرضیت کے بعد ادائیگی میں تاخیر نہیں کرنی چاہئے:
اس اہم عبادت کی حضوصی تاکید احادیث نبویہ میں وارد ہوئی ہے اور اُن لوگوں
کے لئے جن پر حج فرض ہوگیا ہے لیکن دنیاوی اغراض یا سستی کی وجـہ سے
بلاشرعی مجبوری کے حج ادا نہیں کرتے، سخت وعیدیں وارد ہوئی ہیں ان میں سے
چند حسب ذیل ہیں:
٭ حضرت عبد اﷲ بن عباس رضی اﷲ عنہما روایت کرتے ہیں کہ رسول اﷲ ﷺ نے فرمایا:
فریضۂ حج ادا کرنے میں جلدی کرو کیونکہ کسی کو نہیں معلوم کہ اسے کیا عذر
پیش آجائے۔ (مسند احمد)
٭ حضرت عبد اﷲ بن عباس رضی اﷲ عنہما روایت کرتے ہیں کہ رسول اﷲ ﷺ نے فرمایا:
جو شخص حج کا ارادہ رکھتا ہے (یعنی جس پر حج فرض ہوگیا ہے) اس کو جلدی کرنی
چاہئے۔ (ابو داؤد)
٭ حضرت ابو امامہ رضی اﷲ عنہ فرماتے ہیں کہ رسول اﷲ ﷺ نے فرمایا: جس شخص کو
کسی ضروری حاجت یا ظالم بادشاہ یا شدید مرض نے حج سے نہیں روکا اور اس نے
حج نہیں کیا اور مرگیا تو وہ چاہے یہودی ہوکر مرے یا نصرانی ہوکر مرے۔ (الدارمی)
(یعنی یہ شخص یہود ونصاری کے مشابہ ہے)۔
٭ حضرت عمر فاروق رضی اﷲ عنہ کہتے ہیں کہ میں نے ارادہ کیا کہ کچھ آدمیوں
کو شہر بھیج کر تحقیق کراؤں کہ جن لوگوں کو حج کی طاقت ہے اور انھوں نے حج
نہیں کیا ،تاکہ ان پر جزیہ مقرر کردیا جائے۔ ایسے لوگ مسلمان نہیں ہیں،
ایسے لوگ مسلمان نہیں ہیں۔ اسی طرح حضرت علی رضی اﷲ عنہ سے روایت ہے کہ
انھوں نے فرمایا کہ جس نے قدرت کے باوجود حج نہیں کیا، اس کے لئے برابر ہے
کہ وہ یہودی ہوکر مرے یا عیسائی ہوکر۔ (سعید نے اپنی سنن میں روایت کیا)
حج کی اہمیت وفضیلت:
احادیث نبویہ میں حج بیت اﷲ کی خاص اہمیت اور متعدد فضائل احادیث نبویہ میں
وارد ہوئے ہیں ، چند احادیث حسب ذیل ہیں:
٭ حضرت ابوہریرہ رضی اﷲ عنہ فرماتے ہیں کہ نبی اکرم ﷺ سے پوچھا گیا کہ کون
سا عمل سب سے افضل ہے؟ آپ ﷺ نے فرمایا: اﷲ اور اس کے رسول پر ایمان لانا۔
پھر عرض کیا گیا کہ اس کے بعد کون سا؟ آپ ﷺ نے فرمایا: اﷲ کی راہ میں جہاد
کرنا۔ پھر عرض کیا گیا کہ اس کے بعد کون سا؟ آپ ﷺ نے فرمایا: حج مقبول۔ (بخاری
ومسلم)
٭ حضرت ابوہریرہ رضی اﷲ عنہ سے روایت ہے کہ رسول اﷲ ﷺ نے فرمایا: جس شخص نے
محض اﷲ کی خوشنودی کے لئے حج کیا اور اس دوران کوئی بیہودہ بات یا گناہ
نہیں کیا تو وہ (پاک ہوکر) ایسا لوٹتا ہے جیسا ماں کے پیٹ سے پیدا ہونے کے
روز (پاک تھا)۔ (بخاری ومسلم)
٭ حضرت ابوہریرہ رضی اﷲ عنہ روایت کرتے ہیں کہ رسول اﷲ ﷺ نے فرمایا: ایک
عمرہ دوسرے عمرہ تک ان گناہوں کا کفارہ ہے جو دونوں عمروں کے درمیان سرزد
ہوں اور حج مبرور کا بدلہ تو جنت ہی ہے۔ (بخاری ومسلم)
٭ حضرت عمر فاروق رضی اﷲ عنہ نبی اکرم ﷺ سے روایت کرتے ہیں کہ آپ ﷺ نے
فرمایا: پے درپے حج وعمرے کیا کرو۔ بے شک یہ دونوں (حج وعمرہ) فقر یعنی
غریبی اور گناہوں کو اس طرح دور کردیتے ہیں جس طرح بھٹی لوہے کے میل کچیل
کو دور کردیتی ہے۔ (ابن ماجـہ)
٭ حضرت عمرو بن عاص رضی اﷲ عنہ کہتے ہیں کہ میں نبی اکرم ﷺ کی خدمت میں
حاضر ہوا اور عرض کیا: اپنا دایاں ہاتھ آگے کیجئے تاکہ میں آپ ﷺ سے بیعت
کروں۔ نبی اکرم ﷺ نے اپنا دایاں ہاتھ آگے کیا تو میں نے اپنا ہاتھ پیچھے
کھینچ لیا۔ نبی اکرم ﷺ نے دریافت کیا، عمرو کیا ہوا۔ میں نے عرض کیا، یا
رسول اﷲ! شرط رکھنا چاہتا ہوں۔ آپ ﷺ نے ارشاد فرمایا: تم کیا شرط رکھنا
چاہتے ہو؟ میں نے عرض کیا ( گزشتہ) گناہوں کی مغفرت کی۔ تب آپ ﷺ نے فرمایا:
کیا تجھے معلوم نہیں کہ اسلام (میں داخل ہونا) گزشتہ تمام گناہوں کو
مٹادیتا ہے، ہجرت گزشتہ تمام گناہوں کو مٹادیتی ہے اور حج گزشتہ تمام
گناہوں کو مٹادیتا ہے۔ (مسلم)
٭ حضرت عبد اﷲ بن عباس رضی اﷲ عنہما فرماتے ہیں کہ میں نے رسول اﷲ ﷺ کو
فرماتے ہوئے سنا: جو حاجی سوار ہوکر حج کرتا ہے اس کی سواری کے ہر قدم پر
ستّر نیکیاں لکھی جاتی ہیں اور جو حج پیدل کرتا ہے اس کے ہر قدم پر سات سو
نیکیاں حرم کی نیکیوں میں سے لکھی جاتی ہیں۔ آپ ﷺ سے دریافت کیا گیا کہ حرم
کی نیکیاں کتنی ہوتی ہیں، تو آپ ﷺ نے فرمایا: ایک نیکی ایک لاکھ نیکیوں کے
برابر ہوتی ہے۔ (بزاز، کبیر، اوسط)
عورتوں کے لئے عمدہ ترین جہاد حج مبرور:
٭ ام المؤمنین حضرت عائشہ رضی اﷲ عنہا فرماتی ہیں کہ میں نے عرض کیا، یا
رسول اﷲ! ہمیں معلوم ہے کہ جہاد سب سے افضل عمل ہے، کیا ہم جہاد نہ کریں؟
آپ ﷺ نے ارشاد فرمایا: نہیں (عورتوں کے لئے) عمدہ ترین جہاد حج مبرور ہے۔
(بخاری)
٭ ام المؤمنین حضرت عائشہ رضی اﷲ عنہا سے روایت ہے کہ میں نے رسول اﷲ ﷺ سے
پوچھا کیا عورتوں پر بھی جہاد (فرض) ہے؟ آپ ﷺ نے فرمایا: ان پر ایسا جہاد
فرض ہے جس میں خوں ریزی نہیں ہے اور وہ حج مبرور ہے۔ (ابن ماجـہ)
حجاج کرام اللّہ کے مہمان ہیں اور ان کی دعائیں قبول کی جاتی ہیں:
٭ حضرت ابو ہریرہ رضی اﷲ عنہ سے روایت ہے کہ رسول اﷲ ﷺ نے فرمایا: حج اور
عمرہ کرنے والے اﷲ کے مہمان ہیں۔ اگر وہ اﷲ تعالیٰ سے دعائیں کریں تو وہ
قبول فرمائے، اگر وہ اس سے مغفرت طلب کریں تو وہ ان کی مغفرت فرمائے۔ (ابن
ماجـہ)
٭ حضرت عبد اﷲ بن عمر رضی اﷲ عنہما سے روایت ہے کہ رسول اﷲ ﷺ نے ارشاد
فرمایا: جب کسی حج کرنے والے سے تمہاری ملاقات ہو تو اُس کے اپنے گھر میں
پہونچنے سے پہلے اس کو سلام کرو اور مصافحہ کرو اور اس سے اپنی مغفرت کی
دعا کے لئے کہوکیونکہ وہ اس حال میں ہے کہ اس کے گناہوں کی مغفرت ہوچکی ہے۔
(مسند احمد)
حج کی نیکی‘ لوگوں کو کھانا کھلانا، نرم گفتگو کرنا اور سلام کرنا:
٭ حضرت جابر رضی اﷲ عنہ سے روایت ہے کہ رسول اﷲ ﷺ نے ارشاد فرمایا: حج
مبرور کا بدلہ جنت کے سوا کچھ نہیں۔ آپ ﷺ سے پوچھا گیا کہ حج کی نیکی کیا
ہے تو آپ ﷺ نے فرمایا: حج کی نیکی‘ لوگوں کو کھانا کھلانا اور نرم گفتگو
کرنا ہے۔ (رواہ احمد والطبرانی فی الاوسط وابن خزیمۃ فی صحیحہ)۔ مسند احمد
اور بیہقی کی روایت میں ہے کہ حضورِ اکرم ﷺ نے فرمایا: حج کی نیکی‘ کھانا
کھلانا اور لوگوں کو کثرت سے سلام کرنا ہے ۔
حج وعمرہ میں خرچ کرنا اجروثواب کا باعث:
٭ حضرت بریدہ رضی اﷲ عنہ سے روایت ہے کہ رسول اﷲ ﷺ نے ارشاد فرمایا: حج میں
خرچ کرنا جہاد میں خرچ کرنے کی طرح ہے، یعنی حج میں خرچ کرنے کاثواب سات سو
گنا تک بڑھایا جاتا ہے۔ (مسند احمد)
٭ حضرت عائشہ رضی اﷲ عنہا فرماتی ہیں کہ رسول اﷲ ﷺ نے فرمایا: تیرے عمرے کا
ثواب تیرے خرچ کے بقدر ہے یعنی جتنا زیادہ اس پر خرچ کیا جائے گا اتنا ہی
ثواب ہوگا۔ (الحاکم)
حج کا ترانہ لبیک:
٭ حضرت سہل بن سعد رضی اﷲ عنہ سے روایت ہے کہ رسول اﷲ ﷺ نے ارشاد فرمایا:
جب حاجی لبیک کہتا ہے تو اس کے ساتھ اس کے دائیں اور بائیں جانب جو پتھر،
درخت اور ڈھیلے وغیرہ ہوتے ہیں وہ بھی لبیک کہتے ہیں اور اسی طرح زمین کی
انتہا تک یہ سلسلہ چلتا رہتا ہے (یعنی ہر چیز ساتھ میں لبیک کہتی ہے)۔
(ترمذی، ابن ماجـہ)
بیت اﷲ کا طواف:
٭ حضرت عبد اﷲ بن عباس رضی اﷲ عنہما سے روایت ہے کہ رسول اﷲ ﷺ نے ارشاد
فرمایا: اﷲ جل شانہ کی ایک سو بیس (۱۲۰) رحمتیں روزانہ اِس گھر (خانہ کعبہ)
پر نازل ہوتی ہیں جن میں سے ساٹھ طواف کرنے والوں پر، چالیس وہاں نماز
پڑھنے والوں پر اور بیس خانہ کعبہ کو دیکھنے والوں پر ۔ (طبرانی)
٭ حضرت عبد اﷲ بن عمر رضی اﷲ عنہما سے روایت ہے کہ میں نے رسول اﷲ ﷺ کو یہ
فرماتے ہوئے سنا: جس نے خانہ کعبہ کا طواف کیا اور دو رکعت اداکیں گویا اس
نے ایک غلام آزاد کیا ۔ (ابن ماجـہ)
حجر اسود، مقام ابراہیم اور رکن یمانی:
٭ حضور اکرم ﷺ نے ارشاد فرمایا: حجر اسود اور مقام ابراہیم قیمتی پتھروں
میں سے دو پتھر ہیں، اﷲ تعالیٰ نے دونوں پتھروں کی روشنی ختم کردی ہے، اگر
اﷲ تعالیٰ ایسا نہ کرتا تو یہ دونوں پتھر مشرق اور مغرب کے درمیان ہر چیز
کو روشن کردیتے۔ (ابن خزیمہ)
٭ حضور اکرم ﷺ نے ارشاد فرمایا: حجر اسود جنت سے اترا ہوا پتھر ہے جو کہ
دودھ سے زیادہ سفید تھا لیکن لوگوں کے گناہوں نے اسے سیاہ کردیا ہے ۔
(ترمذی)
٭ حضرت عبد اﷲ بن عباس رضی اﷲ عنہما سے روایت ہے کہ نبی اکرم ﷺ نے ارشاد
فرمایا: حجر اسود کو اﷲ جل شانہ قیامت کے دن ایسی حالت میں اٹھائیں گے کہ
اس کی دو آنکھیں ہوں گی جن سے وہ دیکھے گا اور زبان ہوگی جن سے وہ بولے گا
اور گواہی دے گا اُس شخص کے حق میں جس نے اُس کا حق کے ساتھ بوسہ لیا ہو۔
(ترمذی ، ابن ماجـہ)
٭ حضرت عبد اﷲ بن عمر رضی اﷲ عنہما سے روایت ہے کہ میں نے رسول اﷲ ﷺ کو یہ
فرماتے ہوئے سنا: ان دونوں پتھروں (حجر اسود اور رکن یمانی) کو چھونا
گناہوں کو مٹاتا ہے۔ (ترمذی)
٭ حضرت ابو ہریرہ رضی اﷲ عنہ سے روایت ہے کہ حضور اکرم ﷺ نے ارشاد فرمایا:
رکن یمانی پر ستّر فرشتے مقرر ہیں، جو شخص وہاں جاکر یہ دعا پڑھے:
(اللّٰھُمّ اِنِّی اَسْئَلُکَ الْعَفْوَ وَالْعَافِےَۃَ فِی الدُّنْےَا
وَالْاخِـرَۃِ رَبّنَا آتِنَا فِی الدُّنْےَا حَسَنَۃً وّفِی الْاخِـرَۃِ
حَسَنَۃً وّقِنَا عَذَابَ النّارِ) تو وہ سب فرشتے آمین کہتے ہیں ۔ (یعنی
یا اﷲ! اس شخص کی دعا قبول فرما) (ابن ماجـہ)
حطیم‘ بیت اللّٰہ کا ہی حصہ:
٭ حضرت عائشہ رضی اﷲ عنہا فرماتی ہیں کہ میں کعبہ شریف میں داخل ہوکر
نمازپڑھنا چاہتی تھی۔ رسول اﷲ ﷺ میرا ہاتھ پکڑکر حطیم میں لے گئے اور
فرمایا: جب تم بیت اﷲ (کعبہ) کے اندر نماز پڑھنا چاہو تو یہاں (حطیم میں)
کھڑے ہوکر نماز پڑھ لو۔ یہ بھی بیت اﷲ شریف کا حصہ ہے۔ تیری قوم نے بیت اﷲ
(کعبہ) کی تعمیر کے وقت (حلال کمائی میسر نہ ہونے کی وجہ سے ) اسے (چھت کے
بغیر) تھوڑا سا تعمیر کرادیا تھا۔ (نسائی)
آب زمزم:
٭ حضرت جابر رضی اﷲ عنہ کہتے ہیں کہ میں نے رسول اﷲ ﷺ کو یہ فرماتے ہوئے
سنا: زمزم کا پانی جس نیت سے پیا جائے وہی فائدہ اس سے حاصل ہوتا ہے۔ (ابن
ماجـہ)
٭ حضرت عبد اﷲ بن عباس رضی اﷲ عنہما سے روایت ہے کہ نبی اکرم ﷺ نے فرمایا:
روئے زمین پر سب سے بہتر پانی زمزم ہے جو بھوکے کے لئے کھانا اور بیمار کے
لئے شفا ہے۔ (طبرانی)
٭ حضرت عائشہ رضی اﷲ عنہا زمزم کا پانی (مکہ مکرمہ سے مدینہ منورہ ) لے
جایا کرتی تھیں اور فرماتیں کہ رسول اﷲ ﷺ بھی لے جایا کرتے تھے۔ (ترمذی)
عرفہ کا دن:
٭ حضرت عائشہ رضی اﷲ عنہا فرماتی ہیں کہ رسول اﷲ ﷺ نے ارشاد فرمایا: عرفہ
کے دن کے علاوہ کوئی دن ایسا نہیں جس میں اﷲ تعالیٰ کـثرت سے بندوں کو جہنم
سے نجات دیتے ہوں، اس دن اﷲ تعالیٰ (اپنے بندوں کے) بہت زیادہ قریب ہوتے
ہیں اور فرشتوں کے سامنے اُن (حاجیوں) کی وجـہ سے فخر کرتے ہیں اور فرشتوں
سے پوچھتے ہیں (ذرا بتاؤ تو) یہ لوگ مجھ سے کیا چاہتے ہیں ۔ (مسلم)
٭ حضرت طلحہ رضی اﷲ عنہ سے روایت ہے کہ حضور اکرم ﷺ نے ارشاد فرمایا: غزوۂ
بدر کا دن تو مستثنیٰ ہے اسکو چھوڑکر کوئی دن عرفہ کے دن کے علاوہ ایسا
نہیں جس میں شیطان بہت ذلیل ہورہا ہو، بہت راندہ پھر رہاہو، بہت حقیر ہورہا
ہو، بہت زیادہ غصہ میں پھر رہا ہو، یہ سب کچھ اس وجـہ سے کہ وہ عرفہ کے دن
اﷲ تعالیٰ کی رحمتوں کا کثرت سے نازل ہونا اور بندوں کے بڑے بڑے گناہوں کا
معاف ہونا دیکھتا ہے۔(مشکوۃ)
حج یا عمرہ کے سفر میں انتقال:
٭ حضرت ابو ہریرہ رضی اﷲ عنہ سے روایت ہے کہ رسول اﷲ ﷺ نے فرمایا: جو شخص
حج کو جائے اور راستہ میں انتقال کرجائے، اس کے لئے قیامت تک حج کا ثواب
لکھا جائے گا اور جو شخص عمرہ کے لئے جائے اور راستہ میں انتقال کرجائے تو
اس کو قیامت تک عمرہ کا ثواب ملتا رہے گا۔ (ابن ماجـہ)
اﷲ تبارک وتعالیٰ تمام عازمین حج کے حج کو مقبول ومبرور بنائے، آمین۔ |
|