سعودی شہری کا مسلمانوں کیلیے ایک ارب ریال کا عطیہ

حال ہی میں ایک سعودی شہری نے مسلمانوں کی بھلائی اور فلاح کے لیے ایک خطیر رقم عطیہ کر کے ایک نئی تاریخ رقم کردی ہے-

سعودی عرب سے تعلق رکھنے والے ایک معمر شہری نے اپنی شناخت کو ظاہر کیے بغیر ایک ارب ریال کی خطیر رقم اسلامی ترقیاتی بینک کو عطیہ کی ہے-
 

اس رقم کے حوالے سے اسلامی ترقیاتی بینک کے چئیرمین ڈاکٹر احمد محمد کا کہنا ہے کہ صاحب استطاعت اور عمر رسیدہ سعودی شہری کی جانب سے یہ رقم مسلمانوں کی فلاح بہبود کے لیے عطیہ کی گئی ہے-

اس خطیر رقم کے ساتھ رکھی جانے والی شرائط کے مطابق اسلامی ترقیاتی بینک کو مسلم اور غیر مسلم ممالک کے پسماندہ علاقوں میں رہنے والے مسلمانوں کے لیے 75 موبائل ڈسپنسریاں قائم کرنا ہوں گی-

اسلامی ترقیاتی بینک اس رقم سے پہلے 5 سال میں پاکستان، بھارت اور یمن میں 15، افغانستان اور بنگلادیش میں 10، تاجکستان اور قرغزستان میں 5، 5 موبائل اسپتال قائم کرے گا جب کہ 5 سال بعد دیگر پسماندہ ممالک کے دیہاتوں میں اسپتال قائم کیے جائیں گے۔

جہاں ایک جانب ڈاکٹر احمد محمد اس سعودی شہری کی جانب سے اس خطیر رقم کے عطیہ کیے جانے پر ان کا شکریہ ادا کرتے ہیں تو دوسری جانب ان کا کہنا ہے کہ اس خطیر رقم سے لاکھوں مستحق مریض مستفید ہوسکیں گے-
 

ڈاکٹر احمد محمد نے مخیر حضرات سے اپیل کی ہے کہ وہ بھی سعودی شہری کے نقش قدم پر چلتے ہوئے عطیات دیں تاکہ مسلم دنیا کے غریب شہریوں کو طبی سہولیات کی فراہمی کو یقینی بنایا جاسکے۔