سڑکوں کی تعمیر ’ان دیکھی مخلوق‘ کے باعث مؤخر

یورپ میں آئس لینڈ کو آگ اور برف کی سرزمین کہا جاتا ہے۔ اس ملک میں آتش فشاں پہاڑوں سے نکلنے والے لاوے سے اٹھنے والے دھوئیں سے دُھند چھائی رہتی ہے۔ وہاں ’ان دیکھی مخلوق‘ کی کہانیاں بھی عام ہیں۔

ڈوئچے ویلے کی رپورٹ کے مطابق آئس لینڈ کی اس ’ غیبی مخلوق‘ کو ابھی تک کسی نے دیکھا تو نہیں لیکن اب ان کے حق میں باقاعدہ آوازیں بلند ہونے لگی ہیں۔
 

چند لوگ یہ بھی کہنے لگے ہیں کہ اب ان پریوں کو آئس لینڈ میں سیاسی نمائندگی حاصل ہو گئی ہے۔ اَیلف Elf کہلانے والی اس مخلوق کا حامی ایک سماجی گروپ اب بہت سے ماحول پسندوں کے ساتھ مل گیا ہے۔

اس گروپ کا مطالبہ ہے کہ آئس لینڈ میں شاہراہوں اور ساحلی علاقوں کی تعمیر و ترقی کا کمیشن اور مختلف علاقوں کے بلدیاتی حکام ایک بڑی لیکن نئی ہائی وے کی تعمیر کا منصوبہ ترک کر دیں۔ آئس لینڈ کے دارالحکومت رِیکیاوِک سے ملنے والی رپورٹوں کے مطابق یہ نئی ہائی وے جزیرہ نما اَلفتانَیس Alftanes سے لے کر دارالحکومت کے نواح میں گاردا بائر Gardabaer تک تعمیر کی جانے ہے۔

الفتانیس آئس لینڈ کا وہ شہر ہے جہاں ملکی صدر کی ایک سرکاری رہائش گاہ بھی قائم ہے۔ آئس لینڈ میں اس تعمیراتی منصوبے کے خلاف جو سوشل گروپ رائے عامہ کو بیدار کرنے کی کوشش کر رہا ہے، اس کا نام فرینڈز آف لاوا یا ’لاوا کے دوست‘ ہے۔

اس گروپ کے مطابق اس علاقے میں نئی ہائی وے کی تعمیر سے پریوں کا رہائشی علاقہ متاثر ہو گا۔ اس گروپ کے بقول حکام کو ایسا اس لیے بھی نہیں کرنا چاہیے کہ اسی علاقے میں Elves کا ایک چرچ بھی موجود ہے، جس کی ثقافتی اہمیت سے انکار نہیں کیا جا سکتا۔