سعودی عرب: غیر ملکی کارکن مصیبت میں گرفتار

پیر کے دن، سعودی عرب کے دارالحکومت ریاض میں بظاہر سناٹا اور ایک سکوت دیکھنے میں آیا۔ اس کی وجہ سعودی عرب کی حکومت کی جانب سے کیا جانے والا وہ اعلان تھا جس میں کہا گیا تھا کہ مملکت میں غیرقانونی طور کام کرنے والے غیر ملکی کارکنوں کے خلاف کارروائی اور پکڑ دھکڑ شروع کردی گئی ہے۔

وائس آف امریکہ کے مطابق سعودی حکومت نے چھ ماہ پہلے لاکھوں غیرملکی ورکرز کوملک میں قیام کے لئے مطلوبہ ضروری دستاویزات۔۔۔ یعنی اقامہ سے متعلق کاغذات ۔۔درست کرانے کے لئے 3 نومبر تک کی مہلت دی تھی جو اتوار کو ختم ہوگئی جس کے بعد حکام اور سیکورٹی اہلکاروں نے ملک بھر میں کارخانوں ، مارکیٹوں اور دکانوں پر چھاپے مارنے شروع کرد دیئے ہیں۔
 

چھاپوں سے بچنے کی خاطر غیرملکی ورکرز کی بڑی تعداد نے اپنے کام پر جانے کے بجائے گھروں پر رہنے کو ترجیح دی۔ یہی وجہ ہے کہ پرہجوم مارکیٹس اور بزنس سینٹرز میں سناٹا چھایا رہا۔

ریاض کے انڈسٹریل زون کی زیادہ تر دکانیں جہاں غیرملکی ورکروں کی بڑی تعداد کام کرتی ہے بند رہیں۔برطانوی خبر رساں ادارے ’رائٹرز‘ سے بات چیت میں ایک عینی شاہد کا کہنا تھا کہ اس نے پولیس کی گاڑیوں میں لگے سائرن پر درجنوں افراد کو ادھر ادھر بھاگتے ہوئے دیکھا ہے۔

انڈسٹریل زون میں واقع پارٹس کی دکان کے مالک ابو صفات نے بتایا ” صبح سے کوئی گاہک کچھ خریدنے نہیں آیا ۔ یہ انتہائی بری صورتحال ہے۔“

سعودی حکومت کی طرف سے ویزا قوانین میں سختی کا مقصد کم اجرت پر غیرملکی ورکرز کی ملک میں آمد کو روکنا اور پرائیوٹ سیکٹر میں سعودی شہریوں کے لئے روزگار کے زیادہ سے زیادہ مواقع فراہم کرنا ہے۔

اتوار کو سعودی وزارت داخلہ کے ترجمان میجر جنرل منصورالترکی نے ایک پریس کانفرنس میں اعلان کیا تھا کہ وزارت محنت کے تعاون سے غیر قانونی طور پر مقیم غیر ملکی ورکرز کے خلاف جاری مہم ملک کے تمام شہروں، قصبوں اور دیہاتوں میں چلائی جائے گی۔