پاکستان: مفت آن لائن کورسز کیلئے سرچ انجن تیار

پاکستان دنیا کا واحد ملک ہے جس نے دنیا بھر کے مفت اور بہترین آن لائن کورسز کیلئے ایک میٹا سرچ انجن تیار کرلیا ہے۔ اس واحد پلیٹ فارم پر دنیا کی بہترین یونیورسٹیوں پر پیش کئے جانے والے سینکڑوں ہزاروں مفت آن لائن کورسز کو باسہولت انداز میں سرچ کیا جاسکے گا۔

ڈان نیوز کے مطابق اس بات کا انکشاف اعلیٰ تعلیمی کمیشن کے سابق چیئرمین اور ممتاز پاکستانی کیمیادان ڈاکٹر عطاء الرحمان نے خلائی علوم پر منعقدہ دوسری قومی کانفرنس کی افتتاحی تقریب میں کیا۔
 

ڈاکٹر عطاء الرحمان نے کہا کہ جامعہ کراچی میں واقع حسین ابراہیم جمال ( ایچ ای جے) ریسرچ انسٹی ٹیوٹ آف کیمسٹری اگلے ماہ اس میٹا سرچ انجن کا افتتاح کرے گا جس کے ذریعے دنیا کے بہترین مفت کورسز مثلاً ایم آئی ٹی اوپن کورس ویئر، کورسیرا، یوڈاسٹی، خان اکیڈمی، ورچول یونیورسٹی آف پاکستان اور دیگر سینکڑوں اداروں کے کورسز کو باآسانی سرچ کیا جاسکے گا۔ اس سے طلبا و طالبات کو کورسز کی تلاش میں سہولت ہوگی اور وہ کم وقت میں اپنے کورس کو تلاش کرسکیں گے۔

ڈاکٹر عطاء الرحمان نے کہا کہ تربیت یافتہ اور قابل اساتذہ کی کمی خصوصاً تیسری دنیا میں آبادی کی بڑی تعداد کو پڑھانے میں سب سے بڑا مسئلہ ہے۔ انہوں نے کہا کہ ایم آئی ٹی اور ہارورڈ جیسے ممتاز اداروں کے مفت کورسز سے نہ صرف پاکستان بلکہ دیگر ترقی پذیر ممالک کے ہزاروں لاکھوں طالبعلم مستفید ہوں گے۔

ایچ ای سی کے سابق چیئرمین کے مطابق پاکستان واحد ملک ہوگا جو پوری دنیا کے بہترین اور مفت آن لائن کورسز اور علمی خزانے کو ایک پلیٹ فارم پر پیش کررہا ہے۔