اولمپک مشعل پاکستان آئےگی

(Source: Jang News)

بیجنگ اولمپکس کی مشعل سولہ اپریل کو اسلام آباد پہنچ رہی ہے۔ پاکستان کی کھیلوں کی تاریخ میں یہ پہلا موقع ہے کہ اولمپک مشعل کے سفر میں پاکستان کو شامل کیا گیا ہے۔

پاکستان اولمپک ایسوسی ایشن کے صدر لیفٹننٹ جنرل ( ریٹائرڈ ) سید عارف حسن نے بی بی سی کو بتایا کہ بیجنگ اولمپکس کی مشعل کے سفر میں بائیس شہروں کا انتخاب کیاگیا ہے اور پاکستان کے لیے یہ قابل فخر بات ہے کہ دارالحکومت اسلام آباد ان شہروں میں شامل ہے۔

جنرل عارف حسن نے کہا کہ پندرہ اور سولہ اپریل کی درمیانی شب اولمپک مشعل پاکستان پہنچے گی۔ اس سلسے میں مختلف نوعیت کے پروگرام ترتیب دیے گئے ہیں، مختلف راستوں سے مشعل کے قافلے کو گزارا جائے گا اور اس کا اختتام لیاقت جمنازیم میں ہونے والی پروقار تقریب میں ہوگا۔

پاکستان اولمپک ایسوسی ایشن کے صدر نے کہا کہ اس مرتبہ اولمپک مشعل کا سلوگن ’جرنی ٹو ہارمونی‘ یعنی ’ہم آہنگی کی جانب سفر‘ ہے اور پاکستان بھی یہی پیغام دینا چاہتا ہے۔ انہوں نے کہا کہ ان کی کوشش ہوگی کہ اولمپک مشعل کی پاکستان آمد کے موقع پر یہ پیغام دنیا کو دیا جائے کہ پاکستان ایک پرامن اور خوبصورت ملک ہے اور یہ وہ نہیں ہے جس کے بارے میں باہر کی دنیا کو بتایا جا رہا ہے۔انہوں نے یقین ظاہر کیا کہ اس موقع کا بھرپور فائدہ اٹھاتے ہوئے پاکستان کے مثبت امیج کو اجاگر کیا جائے گا۔

پاکستان1948ء سے ابتک اولمپکس مقابلوں میں باقاعدگی سے شرکت کرتا رہا ہے تاہم اس بڑے ایونٹ میں اس کی کامیابی صرف ہاکی تک محدود رہی ہے۔ پاکستان نے اولمپکس کے ہاکی مقابلوں میں تین مرتبہ طلائی تمغہ جیتا ہے۔

ہاکی کے علاوہ پاکستان نے دیگر دو کھیلوں باکسنگ اور پہلوانی میں کانسی کے تمغے اولمپکس میں حاصل کیے ہیں۔