عجیب ورلڈ ریکارڈز جنہیں کوئی بھی توڑنا نہیں چاہتا

آپ نے ایک محاورہ تو ضرور سنا ہوگا کہ “ ریکارڈ بنتے ہی ٹوٹنے کے لیے ہیں “- اور اس کا عملی مظاہرہ بھی ہمیں اکثر اس وقت دیکھنے کو ملتا ہے جب کوئی پرانا ورلڈ ریکارڈ توڑ کر نیا ورلڈ ریکارڈ قائم کردیا جاتا ہے- لیکن ہم یہاں آج جن ورلڈ ریکارڈ کا ذکر کرنے جارہے ہیں انہیں کوئی بھی توڑنے کی کوشش نہیں کرے گا اور نہ ہی توڑنے کی خواہش رکھتا ہے کیونکہ ان ورلڈ ریکارڈ میں یا تو چند انتہائی خوفناک ہیں یا پھر کچھ حادثاتی طور پر قائم ہوئے ہیں- آئیے ان انوکھے ورلڈ ریکارڈز کے بارے میں جانتے ہیں-
 

Longest sword swallowed
سب سے طویل تلوار نگلنے کا ورلڈ ریکارڈ Natasha Veruschka کے پاس ہے- اس خاتون نے یہ خطرناک کارنامہ 28 فروری 2009 کو سرانجام دیا- نتاشا نے ایک ایسی تلوار کو حلق میں اتارا جس کی لمبائی 58 سینٹی میٹر تھی- یقیناً یہ ایک انتہائی خوفناک ریکارڈ تھا جسے شاید ہی کوئی توڑنے کی ہمت دکھائے-

Farthest milk squirting distance
آنکھوں سے دودھ کی پچکاریاں مارنے کا عجیب و غریب ورلڈ ریکارڈ Ilker Yilmaz نے قائم کیا- دودھ کی یہ پچکاری 9 فٹ 2 انچ کے فاصلے تک ماری گئی- Yilmaz نے پہلے ناک کے ذریعے دودھ جسم میں داخل کیا اور پھر اسے آنکھوں سے ایک باہر پھینکا-

Largest kidney stone
18 فروری 2004 کو بھارت کے شہر ممبئی کے ایک اسپتال میں Vilas Ghuge نامی مریض کے بائیں گردے سے جو پتھر نکالا گیا اس نے ایک ورلڈ ریکارڈ قائم کردیا- جی ہاں یہ کسی انسان کے گردے سے نکلنے والا سب سے بڑا پتھر تھا جس کا سائز 13 سینٹی میٹر تھا- یہ واقعی ایک ایسا ریکارڈ ہے جس کے توڑنے کی کوئی خواہش نہیں رکھتا ہوگا-

Largest object removed from human skull
1998 میں Michael Hill کے سر میں چاقو گھونپ دیا گیا اور اسے مرنے کے لیے چھوڑ دیا گیا- تاہم خوش قسمتی سے ڈاکٹروں نے یہ 20 سینٹی میٹر لمبا چاقو مائیکل کی کھوپڑی سے باہر نکال لیا اور یوں اس کی جان بچ گئی- تاہم یہ بھی ایک ورلڈ ریکارڈ قائم ہوگیا کیونکہ یہ چاقو درحقیقت کسی بھی انسانی کھوپڑی سے باہر نکالی جانے والی سب سے بڑی چیز تھی-

Most clothes pegs clipped to face
اٹلی کے شہری Silvio Sabba نے اپنے چہرے پر کپڑے سُکھانے کے دوران استعمال ہونے والی سب سے زیادہ چمٹیاں لگا کر ایک ورلڈ ریکارڈ قائم کردیا- اس اطالوی شہری نے یہ تکلیف دہ ورلڈ ریکارڈ 27 دسمبر 2012 کو 1 منٹ میں 51 کِلپ چہرے پر لگائے-

Most bones broken in lifetime
مقبول ترین امریکی اسٹنٹ مین Evel Knievel کو پوری زندگی میں ہڈیوں کے 433 فریکچر کا سامنا کرنا پڑا- تاہم یہ بھی ایک ایسا درد ناک ورلڈ ریکارڈ قائم ہوگیا جسے کوئی بھی ذی ہوش شخص توڑنے کی کوشش نہیں کرے گا-

Most failed driving tests
جنوبی کوریا سے تعلق رکھنے والی ایک بزرگ خاتون Cha Sa-Soon بالآخر 960 ویں بار ڈرائیونگ ٹیسٹ پاس کرنے میں کامیاب ہوگئیں اور انہوں نے ڈرائیونگ لائسنس حاصل کر لیا- اس سے قبل انہوں نے ڈرائیونگ لائسنس کے حصول کے لیے 959 ٹیسٹ دیے جس میں ہر بار ناکام رہیں لیکن اس طرح انہوں سب سے زیادہ مرتبہ ڈرائیونگ ٹیسٹ میں ناکام ہونے کا ایک مضحکہ خیز ورلڈ ریکارڈ ضرور قائم کرلیا-