|
|
Allah Taala se badh kar ham musalmanon ke liye kiya ho sakta hai, uski raza se badh kar kis ki raza ham talaash karein. phir bhi ham hain ki hamare aamal Allah Taala ke Ahkaam ke mutabiq na bana kar apni marzi se apni zindagi jee rahe hain.
Quraan Shareef ki kuchh aayat main yahan par likh raha hoon, har eik muslim ke liye , jo bhi apne maslak se chipka huwa hai, zara thande dil wa dimaag se iss per gaur karein.
''AUR UNHON NE KAHA NAHIN DAAKHIL HO GA JANNAT MEIN BAGAIR INN KE JO YAHOODI HAIN YA ISAEE, YEH UNN KI MANGHADAT BAATEIN HAIN, AAP FARMAIYE LAO APNI KOI DALEEL AGAR TUM SACHHE HO, HAAN JO SHAKHS ALLAH KE AAGE GARDAN JHUKA DE AUR WOH NEIK KAAM KARNE WAALA HO USS KE LIYE HAI USS KA SILA APNE RAB KE PAAS AUR NA DAR HAI UNN PAR AUR NA WOH GAMGEEN HON GE. YAHOOD KAHTE HAIN KI NASRANI HAQUE PER NAHIN AUR NASRAN KAHTE HAIN KI YAHOOD HAQUE PER NAHIN HALAANKI YEH SAB LOG KITAAB PADHTE HAIN, USEE TARAH EIN HI JAISEE BAAT BE ILM WALE BHI KAHTE HAIN TO JIS BAAT MEIN YEH LOG IKHTALAF KAR RAHE HAIN, ALLAH TAALA QAYAMAT KE DIN ISS KA FAISLA KAR DE GA'' (111-112-113 - Surah Baqrah)
Iss aayat ki roshni mein agar ham dekhien ham musalmanon ke maslak ki baatein to woh iss tarah bhi ho sakti hain
''Ahle hadees kahte hain ki sunni jannat mein na jayen ge, sunni kahte hain ki shia jannat mein nahin jayen ge, shia kahte hain ki bohri jannat mein nahin jayen ge, bohri kahte hain ki wahabi jannat mein nahin jayen ge aur issi mein ham aur issi mein hi ham aapas mein hi ladhte hain. jabki Allah Taala farmaate hain ki
''JINHON NE MERI HIDAYAT KI PAIRWI KI UNN KO NA KUCCH KHAUF HO GA AUR NA WOH GAMNAK HON GE'' (28 - Al Baqrah)
''AUR AGAR WOH IMAAN LAATE AUR PARHEZGAARI KARTE TO AALAH KE HAAN SE BAHUT ACHHA SILA MILTA, KAASH WOH ISS SE WAQIF HOTE.''103 - (Al-Baqrah)
''ALLAH TAALA AISE LOGON KE SAATH HAIN JO PARHEZGAAR HAIN AUR NAIK KIRDAAR HAIN'' (118 Al-Nahal)
''AUR JO SHAKHS ALLAH TAALA AUR USS KE RASOOL KA KAHA MAANE AUR ALLAH TAALA SE DARE AUR USS KI MUKHALIFAT SE BACHE AISE LOG BA MURAAD HON GE''(52, Al-Noor)
''AUR TUM APNE RAB KE PAAS SE AAYE HUYE ACHHE ACHHE AHKAMON PER CHALO QABL ISS KE KI TUM PER ACHANAK AZAAB AA PADE AUR TUM KO KHAYAL BHI NA HO''(55- AL-Zamar)
mere bhaiyon, bahnon aur bachchon, maslak, aqeeda, firqa, tabqa, gurohbandi etc. hamare liye kuchh bhi nahin hai, Sirf aur Sirf Itaa'at wa Farmanbardari, bandagi Allah ki aur taqleed Rasool Allah Muhammad (pbuh) ki. Neik aamal hi hain jo Allah ki khushnoodi ka zaria bante hain. Koi maslak wala iss baat ki guarantee nahin de sakta ki Allah ke nazdeek unn ka maslak pasandeeda hai. jab ki Allah Taala
farmaate hain.
''INNAD DEENA INDA ALLAHIL ISLAM'' ALLAH TAALA KE NAZDEE PASANDEED DEEN SIRF AUR SIRF ISLAM HI HAI
Allah Taala ne hi hamara laqab musalman rakha hai, Surah Haj ki aakhri aayat mein hai, Islam aur musalman ka matlab hi yahi hai ki apne aap ko Allah ke hawale kar do.
HAMEIN SOCHNA HAI KI HAMEIN APNE AAP KO KIS KE HAWALE KARNA HAI. IZZAT KE SAATH ZINDAGI GUZARNA HAI YA ZILLAT KE SAATH. SIR BULAND KAR KE JEENA HAI YA SIR JHUKA KAR JEENA HAI.
ALLAH TAALA ham musalmanon ko neik musalman banne ki taufeeq ataa farmaye. (aameen)
|
|
By:
Mushtaque Gafur Ansari,
Mumbai - India
on
Aug, 27 2012
|
|
|
|
|