ڈاکٹر محمد ریاض شاہد :بلھے شاہ فرمایا

ڈاکٹر محمد ریاض شاہد :بلھے شاہ فرمایا ،صوفی سانجھ لاہور ،پاکستان ،سال اشاعت 2013
تبصرہ نگار :غلام ابن سلطان

بلھے شاہ (پیدائش :اچ 1680وفات :1757قصور)پنجابی زبان کے ممتاز صوفی شاعر تھے ۔اپنی شاعری میں فلسفیانہ خیالات ، زندگی کی اقدار عالیہ کے فروغ ا نسانیت کے وقار اور سر بلندی اور مذہب کی آفاقی اقدار کو اسلوب کی اساس بنا کر بلھے شاہ نے قارئین کے دلوں کو مرکز مہر و وفا کر دیا ۔ اس کتاب میں ڈاکٹر محمد ریاض شاہد نے بلھے شاہ کی کافیوں کے مشہور اشعار کو اردو نثرکے قالب میں ڈھالا ہے ۔اس طرح دہ تہذیبوں کو قریب تر لانے میں مد ملے گی اور اردو داں طبقے کوپنجابی کلاسیکی ادب کے اس نابغہء روزگار تخلیق کار کے اسلوب کو سمجھنے میں مدد ملے گی ۔بلھے شاہ کے پنجابی عارفانہ کلام کا بہ نظر غائر جائزہ لینے سے یہ حقیقت رور روشن کی طرح واضح ہو جاتی ہے کہ اس یگانہء روزگار صوفی شاعر نے اپنی کافیوں میں ارضی و ثقافتی حوالے کو ہمیشہ پیش نظر رکھا۔بلھے شاہ کی شاعری میں تخلیقی عمل اوراس کے پس پردہ کار فرما لا شعوری محرکات کی متعدد نئی جہات سے قاری آ شنا ہوتا ہے۔قلب اور روح کی اتھاہ گہرائیوں میں اتر جانے والی یہ شاعری قاری کو اپنے من میں ڈوب کر سراغ زندگی پانے کی صلاحیت سے متمتع کرتی ہے ۔یہ عارفانہ کلام قاری کو اپنی حقیقت سے آشنا کر کے اس خطے کی صدیوں کی تہذیب و ثقافت اور تاریخ کے مسلسل عمل کے بارے میں مثبت شعور و آگہی سے فیض یاب کرتی ہے ۔

مترجم نے بلھے شاہ کے پنجابی زبان کے عارفانہ کلام کو نہایت سہل اور عام فہم اردو کے قالب میں ڈھالا ہے ۔بلھے شاہ کا شمار بر عظیم کے ان ممتاز صوفی شعرا میں ہوتا ہے جن کے افکار کی ضیا پاشیوں سے اس خطے میں اذہان کی تطہیر و تنویر کا اہتمام ہوا۔اس شاعری میں جہاں حریت ضمیر سے جینے کا پیغا م ہے وہاں حرف صداقت لکھنے کی ترغیب بھی ہے ۔بلھے شاہ کی صوفیانہ شاعری میں حریت فکر و عمل کا جو عملی نمونہ ملتا ہے وہ قارئین ادب کے فکر و نظر کو مہمیز کرنے کا موثر وسیلہ ہے ۔جبر کا ہر انداز مسترد کرتے ہوئے حریت فکر کا علم بلند رکھنے والے ان صوفی شاعروں نے اس خطے کی قدیم تاریخ ،تہذیب ،ثقافت ،معاشرت اور تاریخ کے مسلسل عمل کے بارے میں فکر پرور اور خیال افروز تصورات کو اپنے افکار میں نمایا ں جگہ دی ۔تاریخ شاہد ہے کہ ان با کمال تخلیق کاروں نے جس انداز میں اپنے اشہب قلم کی جو لانیاں دکھائی ہیں اس کے اعجاز سے طلوع صبح بہاراں کے امکانات روشن تر ہوتے چلے گئے ۔ پوری دنیا جانتی ہے کہ تاریخ کے ہر دور میں قارئین ادب نے سلطان باہو ،بلھے شاہ ،وارث شاہ ،شاہ حسین ،عبدالوہاب ،بابا فرید ،شاہ عبداللطیف بھٹائی ،رحمٰن بابا،سچل سر مست ،شیخ ایاز ۔مست توکلی ،خواجہ غلام فرید ،خوش حال خان خٹک اور میاں محمد بخش کی خدمات کو ہمیشہ بہ نظر تحسین دیکھا ہے ۔ان نامور صوفی شاعروں نے اپنے عارفانہ کلام سے قارئین ادب کو بصیرت کی سکون بخش فضا سے آ شنا کیا۔یہ امر لائق تحسین ہے کہ پاکستان کی علاقائی زبانوں کے کلاسیکی ادب پاروں کو قومی زبان کے قالب میں ڈھالنے کی ایک مضبوط اور مستحکم روایت موجود ہے ۔آفاق صدیقی نے شاہ عبد اللطیف بھٹائی کے سندھی کلام کا منظوم اردو ترجمہ کیا،پروفیسر طحٰہ خان نے رحمن بابا کے پشتو کلام کا منظوم اردو ترجمہ کیا۔ نامور ماہر تعلیم ،محقق اور دانش ور پروفیسر اسیر عابد نے مرزا اسداﷲ خان غالب کے اردو کلام کا منظوم پنجابی ترجمہ کیا۔یہ تراجم قاری کو ایک دھنک رنگ منظر نامے سے آ شنا کرتے ہیں ۔ایک مثال پیش خدمت ہے :
رحمٰن بابا کے پشتو کے ایک شعر کا ترجمہ پروفیسر طحٰہ خان نے اس طر ح کیا ہے :
وصل کہ ہجراں ہوا دونوں مجھے ہیں عزیز ،دونوں مجھے ہیں عزیز وصل کہ ہجراں ہوا
اسی خیال کو مرز اسد اﷲ خان غالب نے پونے دو سو سال بعد کچھ یو ں بیاں کیا ہے :
وداع و وصل جداگانہ لذتے دارد
ہزار بار برو ،صد ہار بار بیا